¹ Tomojusu latwani la oniama nihiruk, na ibe isiarata nangoto niho narisa. ² Obwon latwani ho nahiruk ninyesere ibwo nasinge, lobo la oparita onyasu nenyori hama. ³ Ikie la onyasu nareji fad obu omoro latuani la onyasu nanyori ijia. Ikie cebu la onyasu nenyori ijie obe omoro latuani la onyasu nareji fad.Amoju Najyok ngete. ⁴ Ngai iji, iji la ingoto lahegiamani la ora loholobo latuani hama? Nihatemeni ho lolohitwahaji hongete ngete otum obotie kuya ohuya. Nyuo hati, isieri ba ngete obotia, otum Lohobu nihisiarahinere ngete obotia ⁵ Ihwanahi lobo latwani noholong ibwo ilany ibwo. Lobo ihuanahi noholongi fad okialare. Ikie latwani iruk nigigilita ho ngete. ⁶ Ngete la ijifito noholong, ijifito ngete niho hobu. Cebu ngete la onyasu, onyasu niho Hobu, isiarahi ngete nawa niho Hobu. Ngete la obu onyasu, idahi ngete nanyasu to Hobu. Isiarahi na awa niho Hobu. ⁷ Obe lobo nihojie omanya to nakwan hongete. Nahimanya ijie, ohimanya ijie to Hobu. ⁸ Nahiye ijie ohiye ijie to Hobu. Kuya ohimanya ijie kuya ohiye ijie, ohira ijie aloho Hobu. ⁹ Toho anya hiram oye fa Kristo cebu ibuhu to yeyi hari, ojo ongida ngete ora ahobu ho lahayeyak ho lahesujok ¹⁰ Nyuo hati ite, nanyote ingotete hilasira hote? Cebu ite, nanyote imorete hilasira hote? Ijie fad ohibotia hadi ijie nilongotere ho Najyok. ¹¹ Toho igierehini, "Hesu ne," Ojo Lohobu, "niho ne orugungi hadi nahungita fa, cebu nangadiefo itokwate Najyok." ¹³ Inaha, ongida ijie obu ohongoto nepalita ho lati, nyuo hati, ikie lobo latwani obu ora ahetitihiteni niho hilasi hongete. ¹⁴ Ajiene cebu etipisa ne niho Lohobu Yesu, ojo obu ibwo nasinge ibot tonakwan hongete. Latwani la itarak ibwo nasinge na ibot, ibot niho ngete. ¹⁵ Nara tonahiram honangirang iriafinerete hilasi hoji, abu ite idahati to nakwama. Hepalasi to nangirang hote latwani la oye Kristo to ngete. ¹⁶ Hati bangi hedahisi nahigemita hote huja ongidari isiarahi lati okeniterete sing. ¹⁷ Toho nahang hojyok obu ora tonahiram hongirang hona namata, nyuo hati tonapitan homantya, nayomo, cebu nakwama bebe tonolo hailong na onyila. ¹⁸ Toho latwani la igemitito niho Kristo tanya ihoi iruhi ngete niho Najyok cebu iruhi miji. ¹⁹ Hati tiye, ijifitete nareji ho yomo cebu nareji huja itobolori latuani. ²⁰ Hepalasi nahigiama ho Najyok to hiram honyiasu. Nareji fad tarihe onyilaji, nyuo hati orohojaya niho latwani la onya cebu iyieno nahiram niho ngete. ²¹ Obu ongida huanyari natiang, kuya nimatari nabalu, kuya ibwo nasinge na isiarahi hilasi hoji ilongojita. ²² Huja hiruhuta ibwanaritite, totunatasing nihiji hote ho Najyok. Ikie najwaha obwon niho latwani la obu itorohoc nakwan hongete to nasinge na iruk ngete. ²³ Ngete latwani la ogogio itorohojiari nara ngete lonya, to nanyuo obu lora to nahiruk. Cebu nasinge na obu olotu to hiruk ora epal.