1 Ikie nolohailongi fad obayangi lati hula ihwanahini ahatialak, obe lobo lahatialani, mayak na olotu niho Najyok. Lahatialak hula obwoni Najyok lonyumu sing. 2 Inaha, latuani la inaya lahatialak idaya natianya ho Najyok; cebu lati hula idayari ngete ohorihini hadi nahitegiama nikwanite hosing. 3 Lahabolok obu orahi ahehwanak ho higiemita huja ongidari, nyuo hati nahigiemita huja orohoji. Iwahatate biangan bayangi lahatialak? Igiamati na ongida ihorihisi ba te nahitokwama niho ngete. 4 Toho ora ngete ahegiamani hojyok nihote la ongida. Nagiamatite nasinge na orohojaya, to bayangata; obu ngete onefito nanyaliru naharus. Toho ora ngete ahegiamani ho Najyok, la iyarite nahilongojita ho Najyok lituani la ogiama na orohojaya. 5 Inaha, ongida ite ibayangata, obu lora to nahilongojita hama, cebu to nahigigilita. 6 To anya idumatite namochoro. Latialak orahi ahegiamak ho Najyok, hula ohihume hunya reji noholongi fad. 7 Todumahi niho latwani nasinge na iyaruji niho sing: nomochoro niho latwani ho mochoro; nedumuta ho toromile, niho latwani la iyarita nedumuta ho toromile; nabayangi niho latwani la obayangi. 8 Hebwon hebwo namongijo holobo latuani, mayak to nakwama ho kwanite hote. Latwani la okwama latwani la omanya niger hongete otufut nechihita. 9 "Toho, obu beji ijiau nguru twani, obu beji ifadaya, obu beji ihoholiso, obu bejiihuanahi nataji hoji nireji ho lobo," Cebu hobwon ibwo nechihit,itilahine fad niho hunya ichihita: "Tokwame latwani la omanya niger hoji to ikwamari iji nakwan hoji. 10 "Obu nakwama iriafu latwani la ojihi nihoji. Inaha, nakwama ora ahetufuti hechihita. 11 Tanya, ijianatate noholong, ojo ngete anaya noholong nihote nidetinere to logetere. Tahanya anyiha nahitalahino hojie lofa ho hichak iji hiruk. 12 Aringaya naharie, cebu alotu nafarani tang. Eduhasi niger nihigemita he dimele, cebu ohihwanahi nabuhu ho fangan. 13 Adahati angida, to nafangan, obu to neyom na ingere kuya to naruma. Cebu ikie obu ohidaha nahoiha hosomon kuya nawahan na obujie ohitum hitik, cebu obu to nangalasu kuya to nahayini. 14 Nyuo hati ihwanahisi Hobu Yesu Kristo, hesiarahisi nehoi niho nakwan niho niwahiti ho ngete.