1 Inaha elilia ne nihote, hilasira, to namehino ho Najyok, isiarahisi nakwanite hote ahiyalita huja isuji, onyilaji, iruhi niho Najyok. Ngete anya nahigiama hote na ongida. 2 Hesiarahisi nafok ohidiloyo ite nyuo hati ibieloto nakwanite hote nehitelengejuhere negigilita hote. Ihwanata anya nijianari nanyo longida, na iruhi, cebu nawahan na ongida noho Najyok. 3 Toho ajo ne, to namehino nafa isieri niho ne, na lati fad nihiji hote ikie obu igigile bebe to nakwanite hosing ilany nawahan hosing nihigigilere. Ongida hatum, sing igigile tonehoi helefere, to ho isiarahinere Najyok lati nahiruk. 4 Ohibwon ijie ho nangatio nikwanite hojie, obu hunya nangatio igiame nahigiama abito. 5 Nihoi na okialare, ijie hule ohilwa obwon nikwan abito niho Kristo, cebu ohibwon hama hama. 6 Ohibwon ijie ho neyalita hama hama to namehino naisieri nihojie. Nesieri lobo neyalita ho hiramahite nahiramita, ikie ngete ihwana to ho nahiruk hongete. 7 Nara neyalita ho lobo nahigiama, ikie ngete igiama. Nabuon lobo ho neyalita ho hitejiana, ikie ngete itejiana. 8 Nara neyalita ho lobo nahitogolo, ikie ngete itogolo. Nara neyalita ho lobo nahisiarahita, ikie ngete isiarahita obe naniningita. Nara neyalita ho lobo nahinyamito, ikie ngete inyamito to nagianyan. Nara neyalita ho lobo namehino, ikie ngete ihon to nakwama. 9 Ikie nakwama obwon obe nahitonononga. Idayasi nasinge na orohojaya; iniafata nasinge na ongida. 10 To nakwama ho hilasira, to kwamati nakwanite hote. To nabayangi, tobayangata nakwanite hote. 11 To nangidari, hedayasi. To no lohailong, to wahata.To Hobu, igiamati niho ngete. 12 Tokwamati niho nahiruk na obwon to namoi. To dihata nitegemita hote. Itiringati imojo. Itiringati ihwara niwahita ho laheruhok. 13 Tohorihisi nahoiha nehitetelehinere nahifwotinita. 14 Isiarahi najoha niho hula ohitegiame iji; tojoha cebu hepita. 15 Tokwame ho lati hula okwame; toyiye ho lati hula oye. 16 Ihwanahi negigilita hoji ho nohosing harabito. Hegigilo to napufa, nyuo hati tomoju lati hula oparite. Helefere nihigigilita hoji. 17 Helienete narohoji to narohoji. Igiamariti nareji huja ongidari nihatemeni ho lati. 18 Natum, to ho iwahatate, tobuana ho nayomo niho lati fad. 19 Hepalaya, nyuo hati isiarahi nehoi nihilongojita ho Najyok. Igierehini ojo, "Nabeho ora ano ho ne; elieno hadi ne; ojo Hobu." 20 "Nyuo hati lobo nelongojita lamereni hoji, isiarahi ngete nangirang. Nanyasu nahifiriyong ngete, isiarahi nahari ho mata. Nehon iji hunya, ofurohiji namirino nihou ho ngete. 21 "Ikie narohoji obu ohilanyu ite, nyuo hati ilanyu narohoji to nangidari.