¹ Ajo ne, hatum Najyok idaya lati hongete? Ikie obu ora tohoja. Ara cebu loho Isarayile, niho nekat ho Abramo, niho nemanit ho Benjamin. ² Obu Najyok idaya lati hongete, hula ojien ngete. Ibete ijianata nanyuo nabuk otianya to Elija, tatali ngete ilelia niho Najyok to Isarayile?" ³ Lohobu, efadari sing laheramahitak ho hiramita hoji, angeli fa sing nolohitwengere hoji, atong ne abito cebu otahite sing nahisu ho ne." ⁴ Nyuo hati nahitarangi ho Najyok ojo niho ngete? "Ehuhumahi ne lati nalif metaharik hula ohumu orugungi niho Baal." ⁵ Adobu ora tohoja, nihanya holong ho tahanya obwon natonge to nanyumo ho mehino. ⁶ Nyuo hati nara ta namehino, abu lora to nahigiama. Tarihe habu namehino ora amehino. ⁷ Nanyuo hati fa? Nasinge lofa otahito Isarayile, obu ngete ohorihi, nyuo hati la onyumuni lohorihi ngete, huja inihi itogolohini. ⁸ To ho igierehini ngete: "Esiarahi Najyok sing no lohailong ho dataru, nohonyehito huja obu otiale, cebu najohe huja obu itiyire, niho anya holong." ⁹ Cebu Davide ojo, "Ikie ihuhumi nahitwongi hongirang angerie, akitu, netitihito, cebu ilieno sing. ¹⁰ Ikie nohonyehite hosing irwohi ongida sing obu otiale. Isiarahi nohorwongite hosing okude." ¹¹ Ajo ne hati, "Atwamahine sing ojo ongida sing ohuyari?" Ikie obu ora tohoja. Nyuo hati to nadahan hosing, alotu nahitalahino niho paganoji, ongida isiarahi sing nihaini. ¹² Tahanya nara nahuyari hosing nebarita ho nifok, cebu nara na ngotihiso hosing neparita ho paganoji, baya nabolori hadi nohosing nituhohiso ora? ¹⁴ Kuya esusuhi ba ne hula ohibwon ho ne nikwan harabito nihaiyini. Kuya hatum ije ohitalahu hilihe nihosing. ¹⁵ Toho nara nahidayariso hehule ngete nayomo ho nifok, nanyo hadi nahifuotiniso hosing nyo hati nahisu to yeyi? ¹⁶ Natunahini naturuhak nangejuho, cebu na nalilingit he bune, natunahini namoriti, cebu nakana. ¹⁷ Nyuo hati nagilare fa hinihe nakana niger, nara iji, nakanati ho kiani ho olive niho nitimere, nihuyarahino iji nihiji hosing nyo hati ihwarata hosing namori, ¹⁸ hepufa to na nakana. Nyuo hati nepufa iji, obu lora iji linefito iji. ¹⁹ Ijo beji, "Hunya kana to huyarata ongida ohiduanyahini ne." ²⁰ Otir ngete. To nabiangan hosing hiruk angilari sing, nyuo hati to botiati angida nihiruk hote. Hegigilete bebe nikwanite hote, nyo hati to bayangata. ²¹ Nabu Najyok idahi nakana ho nitimere, obu ba cebu ngete idaha ite. ²² Totialata, nahigiama ho Najyok. Nihene abito, Olotu fa narohoji niho Yahud hula ohuyari. Nyuo hati te nehoi ibwo, olotu nangidari ho Najyok nihote newasihisite ningidari hongete. Nebete itialata angida, ohingutori ba cebu ite. ²³ Cebu nabu sing iwasihini nibangan hiruk hosing, oduanyahini hadi sing hari. Toho Najyok otum odwanyahi sing hari. ²⁴ Toho nahingutori fa ite niger niho nakire hokiani na orohojaya, nyuo hati ohidwanyahini iji nikiani na ongida, baya hadi hule Yahud, hula ora akana tarihe, hadi inyahahine odwanyahino niho nakiani. ²⁵ Toho abu ne awak ite ibwanata na obu ijianata, hilasira, tanya dwaran, ongida ite ileferojoto nigigilita hote. Anya dwaran edwong niho Isarayile many niholong hotuhohino ho paganoji. ²⁶ Italahini hadi Isarayale fad, toho igierehinerete: "Olotu hadi lahetalahini to Sion. Iduhai hadi lati hula obu omanye to nehoiha ho Najyok niho Yakobo. ²⁷ Cebu ora hadi anya ahiruhohino ho ne hosing,nomo neduhaya ne nepalita hosing niger." ²⁸ To nahiram ho Efanjelio, idayari sing to te. Ta nehoi ibuo to nawahan ho Najyok, okwame sing to fafairok hosing. ²⁹ Neyalita ho nangeleso ho Najyok obu ibebielo. ³⁰ Toho obu fete ibayangata Najyok, tahanya ehorihisi te namehino to nabangan hosing bayangi. ³¹ To na ihoi okialare, tahanya hula Yahud itwenge sing na obu obayangi. Nahitetelehiso fa anya, to namehino na isieri nihote ongida cebu sing ohorihini. ³² Toho ikianahinere Najyok fad niho nabiangan bayangi, ongida ngete itetelehi namehino niho lati fad. ³³ O, nawudori ho bara ho lofero cebu najianan ho Najyok! Obu otum ohorihini nagoto hongete, ilanyi nihoiha ho ngete fad. ³⁴ "Toho ngai ajien negigilita ho Hobu? Kuya ngai alotu rahan ahesingani ho ngete? ³⁵ Kuya ngai ichak isiarahiso nareji fad niho Najyok, ojo ongida odumahini niho ngete?" ³⁶ Toho many niho ngete, cebu niho ngete, cebu to ngete obwoni nareji fad. Ikie nakwatan obwon niho ngete jik Amen.