¹ Atel ne lofa nanga labore nebuburit abito, cebu etiyir ne nasinge abito niho nareji huja isuji ojo to namurut na okwat toho nahila, ' 'Kwo!'' ² Ne ho nateliniso ibwo nasingira nabwong !Lahayirene hongete ibunguto nohopwo, cebu esiarahini fa ngete natarabuk na ora abilat. Ngete ho na lotoniso niger ala ilanyuo ojo ongida italu. ³ Lofa nanga labore nebuburit noho harik, etiyir ne nasinge na isu noho harik ojo, ''Kwo!'' ⁴ Tiye ibwo nasingira ho nalotiniso niger-na odo ta ta. Isieri lahayireni hongete iyaru nayomo to fok, ojo ongida lati hongete fad ongote nakwanite hosing. Isiarahini fa ale ayireni nademi nahitwahaji. ⁵ Lofa nanga labore nebuburit noho hutik, etiyir ne nasinge na isu noho hutik ojo, ''Kwo!'' ne ho nateliniso nasingira nemoli, cebu lahayireni hongete nareji huja orwate nihene hongete. ⁶ Etiyir ne ibwo na okialare toho namurut nihiji hehwe reji isuji lotianye, ''Netemit ho ngamang noho nadenar abito, cebu netamita hutik noho ngamang nadenarius). Nyuo hati hepalaya nelata ho nabalu.'' ⁷ Lofa nanga labore nebuburit noho ongon, etiyir ne namurut noho nasinge na isu noho ongon otianya, ''Kwo!'' ⁸ Tiye ne ho nateliniso nasingira na ofurujoyo. Onya fa lahayireni hongete Loyee, cebu nohosiereji ijifito ngete. Isiarahini fa sing nahiram ho hinefito niho anya netongoni ho fok, ongida ifadarita to nanademi, ho nahure ho nediahita, ho to natiangi honimiyang ho fok huja ingereji. ⁹ Lofa nanga labore nebuburit noho miyiet, atel ne nifotiri ho Altari nolohailongi hehule fa ifadari to natianya ho Najyok cebu to na natianya lofa otunute sing to nahiruk. ¹⁰ Sing ho nayio tanamurut na okwat, ''Many hanu, Lahinefiteni fad, lahanyilajani cebu latarihe, many nengot ji nahiram ho hule omanyie inyi nifok, cebu many hatii nefadaya iji hotoji hojie?'' ¹¹ Tiye isiarahini fa sing abito abito nohofi huja opwori, iramahini fa sing ojo ongida sing italani kai many natube haletok hosing lahegiamak cebu hilasira ho hinasira hosing fa nesiahi hula ongida ifadari, toho ifadajierete sing. ¹² Lo fa nanga labore nebuburit noho ilee, eririne obwon fa nelihilik. Alotu fa noholong irwok tik tik toho nabongo na ora alohodo, nayafa na eluro olotu rahan toho nohoto. ¹³ Nahanger tohide ho nadoniso nifok, toho nakiani ho ngaboli itodonita nahanger hongete noho hameu nomo neteneneng nolobwangi na ogol. ¹⁴ Okialare fa nahide toho nahigieri na itutuli. Nadengeto fad ho ladengeto huja obwoni nihari ho nahiduhariso sing to maji hosing. ¹⁵ Tiye Lohobwok ho nifok cebu lati lolohitwaha, cebu hula obolori ilanyi, lahabarak, lahefirangak, ho niho lati fad abito abito, lati hula etenyiangari fa cebu hula isabite, ho nahidimito ninomi hodngetio. ¹⁶ Sing ho najiman nidenge ho nimori, ''Tohuyayune nihojie! Idimaye ijie to homomom hongete la itwongo naseger ho lohobu cebu tohilongojita ho labore. ¹⁷ Alotiniso noholong hemwoc hosing, ngai lotum obotia?''