¹ Tiye atel ne neteten hehene hongete ele itwongo fa nihitwongi ho Lohobu, nahigieri igierehini nahatemeni nihorwong, cebu ipidahini to nahipichita metaharik. ² Ne ho nateleniso anjelo la ifirang itejiana to na murut na okwat, ''Ngete lahangidarani la onga nahigieri cebu obor netorit hongete?" ³ Obe fa lobo tohide kuya tinyi tofok kuya ce bu nihotwa hofok otum onga nahigieri na iluluro kuya cebu iken ngete. ⁴ Ayio ne tona nahingereji tananyuo obe fa lobo ohorihino la ongida ningasere na nahigieri na iluluro kuya ce bu iken ngete. ⁵ Lobo lolohitwahaji ho najiman niho ne, "Heyio. Totiale! Noloyime ho hemanit ho Yuda, namoriti ho Davide, enef, cebu otum ngete onga nahigieri na iluluro ho na hutuhe hongete metaharik." ⁶ Nihiji ho nahitwongi ho nareji ongon huja isuji cebu ho nihiji holohitwaha, atelu ne labore obotia, otiala toho lomo efadari. Obwojnitere ngete ho namwaraha metaharik ho nohonyehite cebu metaharik-sing hunya Nolohailongi ho Najyok huja fa osuluni inyi nifok. ⁷ Ngete ho naloten ho narujuniso nahigieri teteten hehene hongete lo fa itwongo niseger ho lohitwengere ho Lohobu. ⁸ Lofa neyaru ngete nahigieri, sing ehwe nareji isuji ongon ho lolohitwaha nehejek harik-ho ongon itegetehini nakwanite hosing nifok nihatemeni hobore. Sing abito abito obwoniterete ho nolokeme ho narany heheru, na ora emojit ho lahanyilajak. ⁹ Sing ho nahiruho nangejuk ho fure: "Isiriu ji nihiyajiere nahigieri cebu inga nedwanyita ho ngete.Ohingoti fa iji, cebu tonohoto hoji inyiangu ji niho Najyok lati temaniti abito abito, natianya, lati, ho na hang. ¹⁰ Ehuhumahi ji sing nahang ho lapadiri nihigiama niho Najyok hojie, cebu inefite ba sing inyi nifok." ¹¹ Tiye ne ho natiala ho nahitiyiriniso nangungunuta ho lohoi ho anjeloji hula obwoni iluri nolohitwengere-orahi fa nabwanan hosing namilioni harik (200,000,000)-cebu ho na reji huja isuji ho nolohitwaha. ¹² Sing ho najiman tonamurut na okwat, "Ngete labore la ongida ongoti fa nihifwotinere nihifirang, nabara, nolofero, nagolon, nabayangi, nakwatan, ho nahitokwata. ¹³ Etiyir ne fa nareji fad huja obieni huja obwoni nihide cebu nifok cebu nihotwa ho fok ho nitodo ho hari-nareji fad nihongete-otianye, ''Niho ngete la itwongo naseger ho Lohobu cebu niho labore, ikie nahitokwata, nabayangi, nakwatan, ho na hifirang ho hinefito, jik many jik.'' ¹⁴ Nareji ongon huja isuji lojimi, ''Amen!'' cebu nolohitwaha ho nageto nifok ho namojo.