¹ Niho anjeloji ho nekelesia niho Sardis igieri: Nahiramita ha la obwonitere Nolohailongi metaharik noho Najyok cebu ho nahanger metaharik. ''Ajien ne nanyuo te ihwanata. Ibwanatate ho najianan ojo ibwanatate ho nemanyita ojo isujotote, nyuo hati iyeyatate. ² Todetete nihide, itogoloto nahotong, nyuo hati anyiha nayeyeyiso, tananyuo abu ne ahorihi nahigemita hote fad nehatemeni ho Najyok ho ne. ³ Ihuyausu ha, inaha, na ifwotusu te cebu n itiyirusu te. Tobayanga ngete, cebu iwahati. Nyuo hati nabu te idetinete nihide, alotu hadi ne toho lahahohwalani, cebu obu hadi ijianata ojo ani holong ba ne alotu hidayariso ite. ⁴ Nyuo hati obwoni nafureto kai noho lati ho Sardis hula fa obu idahini nabongoji hosing iboti. Odahe ba sing ho ne, ijiefite nabong, orahi basing ahangidarak. ⁵ Ngete la ilanyu itejiafahini ba natolbongo nabong, cebu obu ba ne efufusoyo nafure hongete tohotwa hobuk hohisu, cebu atianyari ba ne nafure hongete nihatemeni ho Monye ho ne, cebu nihatemeni ho anjeloji hongete. ⁶ Nebwanatate ho najohe, itiyirati toho otianyari Nolohailong nikelesiaji.'' ⁷ Niho anjeloji noho nikelesia niho Filadelfia ligieri: Natiana hongete la onyila cebu latarihe-inef ngete nengata ho Davide, onga ngete obe lobo ikianahi, ikianahi ngete obe lobo onga. Ajien ne nanyuo te ehwanata. Totialati, ehwanahi ne nihatemeni hote nekat na owat ongida obe lobo otum ikianahi. ⁸ Ajien ne ojo ibwanatate ho nagolon kai, nyuo hati ebayangatate natianya ho ne cebu obu imwanata nafure ho ne. ⁹ Totialati! Ehule orahi noho nolomojere ho Lahesuswani, ehule ojimi ojo sing lati ho Yahud obe hati orahi,- ogesemi sing ohorihi. Esiarahi ba ne sing ofwoni ichumo nihatemeni hehejiaha hote, cebu ofwoni ba sing jianan ojo ahikwama ne ne. ¹⁰ Toho etunatate nechihit ho ne itilasete to nariajan, ahitun ba cebu ne ite niho noholong ho tiama na olotiniso inyi nifok fad, nitiamari hula omanye nifok. ¹¹ Alotiniso ne kerem. Iniafata tonagolon nasinge na ibwoniteretete ongida lobo latwani obu otum tingoro neyalita niger nihote. ¹² Ehuhumahi ba ne ngete la ilanyu olotu asihidi nitempol ho Najyok ho ne, cebu ob bu ngete olo toda toho ibwo namaji. Egierehi ba ne nihongete nafure ho Monye ho ne, naure hohang nahitwahajik noho Najyok ho monye ho ne(nangejuk ho Yerusalem, na olotu nifok tohide niho Monye ho ne), cebu to nafure ho ne nangejuk. ¹³ Ngete la obwon ho nahijiok, ikie ngete itiyira nanyuo Nolohailong otianya niho nakelesiaji. ¹⁴ Niho anjeloji ho kelsia noho Laodisea ligieri: Natianya ho Amen, la oleyejita cebu ora ahatafani la otirahi, lahenefiteni ho nareji huja obieu Najyok. ¹⁵ Ajien ne ojo egiamatate, cebu ojo obu te irebijata kuya cebu inwahata. Ajo fa ne ojo kuya obu te irebijata kuya inwahata! ¹⁶ Tanabiangan hote tuturi-obu onok kuya irebi-ajo ne ahimitariso ne ite niger tohutuk ho ne. ¹⁷ Ijimatate, ''Asam ne, abwonitere ne nareji huja ahorihi ne, obe ibwo singe na awak.'' Nyuo hati obu ijianata ojo inyi imehino ji bebe, lahapariteni, lahangodoni cebu ibwon nolongature. ¹⁸ Itiyire nihisingita ho ne: Inyiangu niho ne namorwo na ora abilet na idwonge to nahima ongida ji ilotu bara,ce bu natolbongo na onyila opwor cebu ojo ongida iji ijiafahi nikwan hoji cebu obu itelehi narohoji hengudur hoji, cebu nelata okatahini nihonyiehite hoji ongida iji ikeny. ¹⁹ Lati fad akwma ne etejien cebu etejiana sing ojo tatali sing otum omanye. Inaha, togoloto cebu iwahati. ²⁰ Totiale, abotia ne nikat cebu edidingo. Netiyir lobo namurut ho ne,onga nekat, alotu ba nihotwa hohang hongete, ohinyasu hongete, cebu ngete ho ne. ²¹ Ngete la ilanyu, esiarahi ba ne ngete napitan hohitwongo nifok ho ne nilohitwengere ho ne, toho fa ilanyinere ne ho nahitwongo fa nifok ho Monye ho ne nilohitwengere hongete. ²² Nebwanata ho najohe, itiyirati niho nanyuo Nolohailong otianya nikelesiaji."