¹ Niho Anjiloji nohokelesia na obwon Ephasus igieri: Sing hunya nahiramita hongete la ibunguto nahanger metaharik niteten hehene hongete. Ngete la odaha nihiji hehwe ibwojita ho hima omimili metaharik ahatingitok hodahab lotianya anya, ² '''Ajien ne nanyuo te ehwanata ho na golon ho higiama hote cebu ho nadihan ho horiajian hote, cebu habu te ibwanata harabito ho hula orahi ahebwatak hemanyita, cebu etiamatate hula orose nakwanite hosing alati hula iyarite nahiram ho Najyok, nyuo hati obu otenini, cebu sing ho nahorihiso nakwanite hosing ahagesemok. ³ Ajien ne ibwanatate ho nadihan ho riajian, cebu efwasi te tongete bebe tananyuo to na fure ho ne, cebu obu te ibwanata ho naniama. ⁴ Nyuo hati ngete anya nasinge na emwocerene nihote-edahisi te nolochifot ho kwama hote nihalu. ⁵ Ihuyasusoni tayi ihuyunerete. Iwahati cebu ihwanata nareji huja fa igiamatate berien. Mayak newahatite, alotu ba ne niho te ho na hiduduhariso nebwojita ho lohituwulorere ho hima hote to maji hongete. ⁶ Nyuo hati ibwanatate hanya-idayasi te nasinge na ehoni lati ho Nikolaita, na cebu edaya ne. ⁷ Nebwon ji ho nahijiok, itiyire niho nanyou Nolohailong otianya nikelesiaji. Niho la inefu angahi ba ne onyasu to kiani ho hisu, na obwon Paradiso ho Najyok. ⁸ Niho Anjeloji hekelsia na obwon Smirna ligieri: Sing hunya nahiramita ho ngete la ora alolochifot ho lolohichungi-ngete lofa aye cebu olotu hisu hari: ⁹ '''Ajien ne naniama hote ho naparita(nyuo hati isamatate), cebu lahetwobok hehule ojimi sing lati ho Yahud(nyuo hati obu sing-orahi, orahi sing Alomojere ho lahetononongani. ¹⁰ Hebayanga nasinge na efwasi te ipadata. Totialati! Anyiha lahepapalini ebirehi hilihe nihote nihotwa ho lotwarari ojo ongida otemi sing, cebu ipaditete ba te niho noholongi tomon. Iniafata nahiruk many niyeyi, ahisiarahi ba ne ite nangidari homanya. ¹¹ Nebwon ji ho nahijiok, itiyire niho nanyuo Nolohailong otianya nikelesiaji. Ngete la ilany obu ba ngete iriafino niho nayeyi noho harik. ¹² Niho Anjeloji noho kelesia ho Pergamum ligieri: Sing hunya netenyita hongete ele obwon ho nakalse, na iram bebe: ¹³ '''Ajien ne iji imanya-namaji na obwanari nolohitwengere ho lahesuswani. Nyuo ati inefitetete tanagolon nafure ho ne, cebu obu fa te imwanata nahiruk hote niho ne, dobu niholongi ho Antipas la lahapiahani ho ne, nahiruk ho ne abito, lo fa ifadari to hiji hote, da namaji na omanyari Lahesuswani ¹⁴ Nyuo hati obwonitere ne nareji kai huja orohoji nihote: Ibwoniteretete hinihe da hula ogolihini rod to nahitejiana ho Balaam, lofa itejien Balak ojo ongida obe obwon ho nahiruk nihatemeni ho lemusak ho Isarayil, ojo ongida sing onye hadi nanyasu na iyilahini nimininga cebu obwoni ho nasomon. ¹⁵ Niho anya hoi, ibwoniteretete cebu ho hilihe ogolihini rofodok nihitejiana ho lati ho Nikolaita. ¹⁶ Iwahati, inaha! nabu te, alotu ba ne nihote na obe nahiguria, ehon cebu narem nihosing to nanademi na olotu tohutuk ho ne. ¹⁷ Ne bwanatate ho nahijiok, itiyirati niho nanyuo nolohailong otianya nikelessiaji. Niho ele ilanyu, esiarahi ba ne nahiramita hinihe huja idimare, cebu esiarahi namorwo nabong ho nafure nangejuk igierehini nitodo homorwo, nafure na obe lobo ojien nyuo hati ngete la ofwotu ngete.' ¹⁸ ''Niho Anjiloji ho nikelesia ho Tiatira igieri: Sing hunya netenyita Heha Najyok, la obwonitere nohonyehite toho nangadief ho hima cebu nahidanye hehejiaha toho namuchudunga hobilat: ¹⁹ '''Ajien ne nanyuo te ihwanata-nakwama hote hona hiruk cebu nahigiama ho nariajan hote to nadihan, cebu ojo nasinge na igiamatate hunya holongi ilany lo fa igiamatate to lohichahi. ²⁰ Nyuo hati abwonitere ne anya hidayariso nihote: Ite idihusu te nangorite Yesebel, na ongele nakwan hongete aheramahitani ho hiramita (ajayio). To nahitejiana hongete itonong ngete lahigiamak ho ne ojo ongida igiama nahigiama ho somo cebu ojo ongida onyase nagirang na iyalahini nijiohi. ²¹ Esiarahi fa ne ngete noholong noho iwaha, nyuo hati obu ngete obwon ho na wahan noho nahiwaha niho nahimomolita hongete. ²² Totiala! Ebirehi ba ne ngete nihotwa hokeni ho diahak, cebu hehule hula igiemi nahiram hosomon hongete obwoni sing nimehino na obolo, mayak niwahari sing niho nasinge na ihon ngete. ²³ Esiarahi hadi ne lemusak hongete oyeyi, cebu nakelesiaji fad ongida ojieni ojo ne ale la atahitito nahigigilita ho nawahita hotajio. Esiarahi ba ne nihote abito abito nareji huja ihwanatate. ²⁴ Nyuo hati niho nalohoi hote hilihe noho Tiatira, niho lati fad hula obu inefi anya hitejiana, cebu obu ijianata nanyuo hilihe ongele newure horeji noho Lahesuswani-niho te ajo ne, 'Abu ne ehwanahi nihote ibwo narohoji.' ²⁵ Niho ibwo nahiram, ongida te iniafata angida many nalotu ne. ²⁶ Ngete la ilanyu cebu la ihon nasinge na egem ne many nilochungi, niho ngete esiarahi ne nahinefito ho hangite. ²⁷ Otum ngete inef sing to nachol na ora abilat, toho nahufoyiji ibobor ba ngete many isarari.' ²⁸ Toho anya efwotinere ne niho Monye ho ne, cebu esiarahi ba ne ngete nahangeri ho fangan. ²⁹ Nebwanatate ho najohe, itiyirita nanyuo Nolohailong otianya niho nakelesiaji.