1 Ngete anya nahitejiana hoYesu Kristo nofa isiarahi Najyok ngete ongida itelehi niho lahegiamak hongete naja anyiha nabwanan. Isiarahi ngete ojianari tona sulahiso hongete Anjilo niho lahegiamak hongete. 2 Yuwana otuju fa nahiramita hongete niho nareji huja otel fa ngete ahuja otanyi toho nihiram hojyok hoce bu nahitelehiso hohiram na fa isiaahini to Yesu Kristo. 3 Tojwaha ngete la ikiana ana okwat- cebu ehule itiyiri- nahutuk ho anya hiram iramahini many berien cebu ibayangata nasinge na igierehino da hongete, nyuo eliaha noholong. 4 Yuwana, niho nakelesiaji ho Asia: Nangidari nihote ho nayomo niho ngete ale, ho ngete lo fa, hongete la olotiniso, niho nolohailongi metaharik huja fa obwoni berien nilohitwengere hongete, 5 ho niho Yesu Kristo, ngete la ora ahapiahani la iruk, nolokang ho ayeyak,ce bu lahenefiteni hohobwok niho nifok. Niho ngete la ohikwama ijie cebu ohilahu ijie niho nepalita hojie tonohoto hongete, 6 ehuhumahi nihojie niho ijie nahang, lapadiri niho Najyok ho niho Monye hongete-ikie nakwatan ho nagolon obwon niho ngete jik many jik. Amen 7 Totialata, alotiniso ngete ho nedis; oteli ba nohonyehite fad ngete, ho hula fa ochuhi ngete. Ho nemaniti ho fok fad itarihe ba ngete. Ee'e, Amen. 8 ''Ara ne alochifot cebu alohichungi(alpha and omega),'' ojo Lohobu Najyok, ''ngete loho tahanya, cebu lofa, cebu la olotiniso, Lahefirangani.'' 9 Ne, Yuwana - hilasi hote cebu ngete la ihwarata hote nahipadata ho nahang cebu niriajan ho nidihan huja obwoni niho Yesu-obwoni fa lidenge na obwon nahari na ongele Patmo tananyuo to natianya ho Najyok ho nahiramahiso Yesu. 10 Abwon fa niholong ho lohailong. Etiyir ne tehalu ho homurut na okwat toho nangobwo. 11 Ojo ngete, ''Igierehi nibuk nasinge na itel ji, isulahahi ngete niho nakelesiaji metaharik-niho Ephesus, niho Smirna, niho Pergamum, niho Tiatira, niho Sardis, niho Philadelfia, cebu niho Laodisea.'' 12 Angongolita ne netialari ojo noho ngai ba namurut lotianya niho ne, lo fa nebielo ne, ne ho nateliniso nabwojita ho hima metaharik huja omimili. 13 Nihiji hebwojitavho hima obwon fa lobo abito toho lahito ho twani, la ijiefito nahofito na ohadu otum isiahita nihejiaha hongete, ho nabuhunyoti na imedek obwon nilocholo hongete. 14 Nohou ho nafofi hongete opwori fa toho nagutuny-opwarari toho nolopu, cebu nohonyiehte hongete okialare to honangadief ho hima. 15 Okialare nehejiaha hongete toho namilat na omuchudunga, navidwongi to lohipuhere, cebu namurut hongete fa okwat toho nahitoniso ho hari. 16 Obwonitere ngete teten hehene hongete nahanger metaharik, olotiniso niger tohutuk hongete fa nademi nabiram na orahi nangatio harik. Ofarang fa nohomom hongete toho noholong ofarang tonagolon. 17 Lofa natel ne ngete,ne ho nahuyari nihejiaha hongete toho latwani lahayeyiani. Ngete ho natirehiso neteten hehene hongete niho ne ho najiman, ''Hebayang. Ne ale nolochifot ho lohichungi, 18 cebu isu. Ayee fa ne, nyuo hati totiala, esu ne noho jik! Abwonifere ne ho nengata noho yeyi ho noho lahaferok. 19 Inaha igierehisi nifok niho nasinge na itelusu te tahanya, ho nanyuo ba lobwon nihalu hanya. 20 Toho nahidimaru ho fotiri ho hiram no nahanger metaharik huja itelu ji tehene ho ne, cebu nebwojita ho hima metaharik huja omimili: nahanger metaharik sing na anjeloji hekelesiaji metaharik, nebwojita ho hima sing nakelesiaji metaharik."