¹ Tiye atel ne anjelo olotiniso tohide toho nifok, obwonitere ho nengata noho iwure na obe nolohichungi cebu obwonitere nanyororo nihene hongete. ² Inef fa ngete noloworokoko, natate ho hiriahu, ngete Laharohojiani, kuya cebu Lahesuswani, ho natwarahiso ngete nengaji nalif abito(1,000). ³ Ibirehi fa ngete ele niwure, ngete ho nahikianahiso ngete ho nadwanyahiso niho ngete. Obwon fa anya ojo ongida ngete obu itonong nafohi fohi hari many natuhohine huja ngasi nalif abito. Nihalu hene, ongida olahahini ngete isabita niholong kai. ⁴ Tiye fa atel ne lohobwok. Hula itwonge da hosing fa orahi sing ahulo fa isieri nahinefito nohongoto ho hiramita. Cebu atel ne nolohailongi hehule fa ongutori nohosi hosing tanatianya nahiram ho Yesu honoho Najyok. Abu fa sing omojite natiang kuya cebu nakialare hongete, cebu edayari sing nahifwotiniso nagwara hohomomite hosing kuya cebu nilohoye. Sing ho na fwoniso nihisu, cebu sing ho nahinefito kristo nengaji nalif abito(1,000) ⁵ Obu fa latonge ho lahayeyak ofwoni nihisu many otuhohine ehwe nganyi nalif abito. Ngete anya nolochifot hebuhuniso. ⁶ Ikie najwaha ho nanyilaji obwon niho la itilahino ningati ho lohichahi hebuhuniso! Obe nayeyi noho harik obwon ho nahifirang to ho niho hunya. Orahi hadi sing apadiri ho Najyok ho noho Kristo cebu inefite hongete niho nengaji nalif abito. ⁷ Nomo hadi nafwoni huja ngasi nalif abito hichung, olahahini hadi Lahesuswani to lotwarari hongete. ⁸ Olo hadi ngete niger hitonwanga nafohi fohi niguleji ongon noho nifok-Gog ho Magog-nihiyenere sing harabito nirem. Olwajari hadi sing toho nalwajan ho singati ho hari. ⁹ Sing ho nafwoten fa nitodo ho fok na otada cebu ho nahilur napore ho lahanyilajak, nahang na owahi bebe. Nyuo hati nahima ho nalotiniso nifok tohide ho natuhohiso sing. ¹⁰ Laharahojani, lofa itonong sing, ebirehini fa ngete nihotwa ho hari nahitwahaji na owulo ho namorwo nabule, niho namaji nofa ibirehinerete natiang cebu laheramahitani ho hiramita la ogesem. Itingiame hadi sing to nafarani ho naharie jik many jik. ¹¹ Tiye atel fa ne naseger na imoc tona pwaran cebu ele itwongo da hongete. Nafok ho nahide ho nahinam tiye obwonitere ngete, nyuo hati obe fa ibwo namaji na otum sing ofwojierete. ¹² Atel fa ne lahayeyak-lahagolok ho hula obu ongidari-obotie nihatemeni ho seger hohobou, cebu ongase fa nabuhi. Tiye ibwo nabuk cebu ho nangasu-Nabuk hohisu. Ongote fa nahiramita hayeyak niho nareji huja fa igierehine niho nabuhi, naleyeji noho nasinge nafa ehoni sing. ¹³ Nahari ho nachwarahiso fa ehule lahayeyak sing hula obwoni fa nihongete. Nayeyi ho najiok ho Grik ho nachwarahiso fa lahayeyak hulo fa angoti netenyita hosing niho nareji huja igemi sing. ¹⁴ Ho nahibirehiso naayeyi ho najiok ho Grik nihotwa ho hima na hitwahaji. Ngete anya netarihi ho yeyi-noho hima na hitwahaji. ¹⁵ Nabu fa nafure ho lobo abito igierehino Niwaraga ho hisu, ipulohino fa ngete nihotwa ho hima.