Nengat 18

1 Nihalu ho hunya reji, ne ho nateliniso anjelo lobo ongiriniso tohide nifok. Obwon fa ngete ho nahifirang na obolo, cebu fa nifok inwohito to nakwatan hongete. 2 Oyo fa ngete to namurut na ogol, jiman, ''Ahuya, ahuya ngete Babilonia lahaboloroni! Ara ngete ana maji na igiamariti nahiramita hebwanak, namaji na omanyariti nolohailongi abito huja iboti, cebu namaji na omanyariti nahibwatak ho reji ho nakenyi na edayari. 3 Toho niho nafohi fohi fad amati nabalu noho reji omanyitere ngete nohosomon hongete na iyeno niho ngete nahilongojita na iwasihi. Asomohine lohobwok ho nifok hongete. Lahetenyangak ho reji ho nifok ho nafwoniso bara to na hifirang ho reji huja omanyari ngete. 4 Tiye etiyir ne ibwo namurut tohide otianya, "Ifwosu niger toda hongete, lati ho ne, ongida ite obu ihwarata nepalita hongete, cebu ongida ite obu imojusu ibwo nediahita hongete. 5 Etutufahine nepalita hongete many to fok many nihide, cebu ehuyau Najyok narohoji hegemita hongete. 6 Inyahahisi nedumuta ho ngete toho fa inyahahinere ngete nidumuta ho hilihe, cebu inonwosoto nedumuta ho reji h6nya ihon ngete; ngete ho nahiharut, ihaharutohi hari narobia ni hongete. 7 Toho itokwatari fa ngete nakwan hongete cebu omanya nemanyita na ogol, isiarahi ngete nalumo na obolo bebe hovnahilongojita. Ojo ngete nitaji hongete, 'Etwongo ne toho Nohobu; abu ne ara anguru hafereni, cebu obu hadi ne atel nahifuro honitwari.' 8 Inaha niholong ibwo nediahita hongete ilanyini hadi ngete: nayeyi, nafuro ho nitwari, ho nahure na obolo. otuk hadi nahima ngete, ogol Lohobu Najyok , cebu ngete lahangotoni ho hiramita hongete. 9 Lohobwok ho nifok hulo fa ijiani nakwanite hongete cebu ipawuore hongete oyio hadi cebu ingunyute hadi niho ngete lomo hadi nateli sing nahudunyuo na oswahajierete ngete. 10 Many obotie sing hadi lolamajie, obayangi nalumo hongete, ojimi, ikie narohoji, narohoji, obwon nihang nahitwahajik, Babilonia, nahang na ifirang! Niho noholong abito alotu nahitegiama hoji ." 11 Lahetenyangak ho nifok oye cebu itarihe hongete, toho obe lobo inyangu nareji hongete hari- 12 nareji ho morwo na imedek, namorwo na ilumuyak, namori na ora alofalange, nagutuny, nareji fad huja orahi agutunyi, namwaraha hemoi, nahijek huja ongidari to kiana, neheruha ho nasoyaji ho kiana, 13 nabalu, nelata, nahufa huja onyidite, negeme, nahusuk, ho nehoriangi, nasingiraji, lati hula inyangini ahegiamak ho nolohailongi ho lati. 14 Nahangeri lofa itilasetete to nagolon hoji fad alo tinyia hoji. Nareji hulo fa ipufari iji ho nakwatan hoji amuyuhi, abebu ohorihine hadi hari. 15 Lahetenyiangak hohunya reji sing hulo fa afwoni bara tongete obotie hadi sing nololamajie tananyuo tanabayangi ho hitegima hongete, oyo to nakwatan ho fure hotwari. 16 Ojimi hadi sing, ''Narohoji, narohoji nihang na itabayanga no fa itejiefi to nafuta, na ilokori, cebu nidware, cebu itibibili to nasingati na omimil, cebu tona sihira!'' 17 Niholong kai ehwe fa reji obare fad ho nahipalaru. Lahinefitok ho tigoli abito abito, lati hula odahe tona hari, lahetenyangak niho ni, ho lati hula isuji to nahigiama nihari, ho nabotia lolamajie. 18 Sing ho nayo toho oteli sing nahudunyuo na oswahajierete ngete. Sing ho najiman, ''Ani hang lobwon toho nahang na imoc?'' 19 Sing ho napupulahiso namodie nihosi hosing, cebu ho nahigworita, nayo hona gurahiso natwari, ''Namehino, namehino niho nasiti na imoc, niho namaji ngete hulo fa fad obwoniterete nagatari hosing totodo hohari afoni bara tosaman hongete. Niho nasa abito ngete fa ho nahitumuyuhiso.'' 20 ''To kwamati niho ngete, Nahide, ite hula iruhoto niho Najyok, lati hula otianye hula iramahitati nahiramita ho Najyok, toho eyeno Najyok nangoto ho hiramita hoji niho ngete!'' 21 Anjelo lahagoloni ho nahiyaru namorwo na okialare toho nolobunge hona hibirehiso ngete nihotwa ho hari, ho na jiman, ''Niho anya ihoi, Babilonia, nahang na itabayanga, ibirehini hadi nifok to na ngalasu cebu abu otelini ngete hari. 22 Nakwatan ladingok ho dunguji, laheruhok ho laheramahitak ho hiramita ho Najyok, laheruhok ho fureto,lahahutak elwereji,lahahutak hongobwoji obu hadi itiyirine niho iji hari. Obe lobo lahabiani horejiji hadi ohorihino niho iji. Obe nahiguruta hotawuna hadi itiyirino hari niho iji. 23 Obu hadi nafarangi ho owulo niho ji hari. Namuruto ho hula owahi iyama cebu naharuk huja owahi yaman obu hadi itiyire niho ji hinyahat, noho lahitenyangak ho reji hoji orahi fa lemusak hohobwok ho nifok, ho nafohi fohi fa cebu etonongi to nakiana hoji. 24 Niho ngete nohoto heramahitak ho hiramita ho Najyok cebu noho lahiruhok niho Najyok fa ahorihino, cebu nohoto ho ehule fad ifadahini fa nifok.''