1 Lobo anjelo abito niho metaharik lofa obwonitere ho naranyi metaharik hona jiman niho ne, ''Kwo, ahitelehi ba ne iji narohoji ho nahasomoni na imoc na itwongo niho nalohoi ho haria, 2 na igemitite lohobwok ho nifok nahiramita hosomon nihongete, cebu nabalu hongete nohosomon isiarahita lati hula omanye nifok ngete orumatite.'' 3 Anjelo ho natingoro ne niger niho Nolohailong nitimere, ne ho natialan nangorite itwongo nitiang honiwaha na ilokokori na fut ho nafureto hepacita. Obwonitere fa ene tiang honohosi metaharik ho namwaraha tomon. 4 Ijiafahi fa ene ngorite na opwaraya cebu na ilokokori cebu itingidari to na omimil, tona fanga, ho namaji na ogol. Oyihito fa ngete nihene hongete nechuoli na omimil na ifut ho nareji huja idayari cebu huja iboti na hiram hosomon hongete. 5 Nihomom hongete igierehini fa nafure na obwon ho nahidimaru ho hiram hongete: BABILONIA NA ITABAYANGA, HOTO NAHASOMOK CE BU NA IDAYARI NAREJI HONIFOK.'' 6 Atel fa ne ibwo nangorite na oruma honohoto ho lahanyilajak cebu honohoto ho lati hula ifadari to nahiram ho hiruk niho Yesu. Abayangahi fane bebe lo natel ne ngete. 7 Nyuo hati anjelo ho najiman niho ne, ''Nanyuo ji ibayang? Ahititimahi ba ne iji nafotiri hanya ngorite ho noho natiang ho niwaha na ibwohitito ngete(natiang na obwon ho nohosi metaharik ho namwaraha tomon). 8 Natiang lo fa ene itel iji obwon, abu obwon tahanya, nyuo hati anyiha nalotiniso nitodo tofotiri hewure. Tiye olo ba ngete hitiringa hipapala. Ehule omanye nifok, ehule obu fa bu nafureto hosing igierehine nihotwa hewaraga ho hisu many tofotiri ho fok- obayangahini hadi sing lomo nateli sing natiang lo fa obwon, na obu obwon tahanya, nyuo hati anyiha nalotiniso hongete. 9 Owak anya nohou na obwon ho nolofero. Nohosi metaharik sing nohosi natodoji niho namaji na itwongere ngorite. 10 Orahi cebu lohobwok metaharik. Lohobwok miyet a huyari, ho hobwon abito, cebu lobo hobu olotu; nomo nalotu ngete, otum ngete itwong kai. 11 Natiang ho niwaha lofa obwon, nyuo hati abu obwon tahanya, ngete to nakwan hongete lohobu loho metohutik; nyuo hati ngete niho ehule lohobwok metaharik, la odaha nihipapala. 12 Namwaraha tomon ehwe itelu ji orahi lohobwom tomon hula hobe bu ifwotini nahang ho hobu, nyuo hati ifwotini sing hadi nahinefito ho rahan ahobwok noho noholong abito ho natiang. 13 Sing huja obwoniterete ho negigil abito, sing ho nahi isiarahiso nahifirang ho nahinefito hosing niho natiang. 14 Itangale hadi sing Labore. Nyuo hati ilanyu hadi Labore sing tananyuo ora ngete Lohobu ho hobwok cebu niho ngete obwoni hula longeleni, hula onyumuni, hula iruhi to nagolon.'' 15 Anjilo ho najiman niho ne, ''Naharia hulo fa itel ji, namaji na itwengere nahasomoni, orahi lati, naloha-oi, nahangite, ho netenyita. 16 Namwaraha tomon hulo fa itel ji-sing ho natiang idayari hadi nahasomoni. Ocharahini hadi sing ngete hama cebu nolangature, cebu ohonyi hadi sing natiang hongete, cebu osuahahini hadi sing ngete tur to nahima. 17 Ehwanahi Najyok ngete nihotwa ho tajio hosing ojo ongida iyare nahiram hongete to nahiruk hosing nihisiarahiso nahifirang hohinefito niho natiang many netufuti natianya ho Najyok. 18 Nangorite ene fa itel iji ora ahang na itabayanga na inefito lohobwok ho nifok.''