¹ Etel fa ne ho nateliniso labore ho Najyok obotia da nihatemeni ho ne nihide ho denge ho Sion. Hongete obwoni fa Namiya abito ho nalif nehejek ongon ho ongon (144,000) hulo fa obwoni ho nafure hongete cebu nafure ho Monye hongete igierehini nihomomite hosing. ² Etiyiri ne namurut tohide okwat toho nayo ho lohoi ho haria cebu nakwatan ho hila. Nakwatan ene itiyiru ne okialare cebu fa toho lahahutak helwereji lohute nelwereji hosing . ³ Sing ho nahichurahiso nangejuk ho fure nihatemeni ho Lohobu ho niho natiangi huja isuji ongon ho lolohitwaha. Obe lobo ojien ene fure mayak ehule namiya abito ho nalif nehejek ongon ho ongon hulo fa inyiahini tolohitenyiangajere ho fok. ⁴ Sing hula lati hula obe fa ojiani nakwanite hosing ho nangorwo, otuni sing nakwanite hosing ahula onyilaji. Sing hule lati hula otum ijifi Labore toho namaji na olojiere ngete. Itiyitini fa hule tomaji na itenyiangajierete lati toho nolohichiahi hohanger niho Najyok cebu niho Labore. ⁵ Obe fa ibwo nagesemi ohorihino tohutuhe hosing; obengi sing fa hebwo nepal. ⁶ Ne ho nateliniso anjelo lobo la ifirita nihiji ho lobwangi, la obwoniterete nahiram na osio nihiramahinere niho ehule omanyie inyi nifok-nihangite, nimaniti, nitianya, ho niho lati. ⁷ Ngete ho nangialan to namurut na okwat, ''Tobayangata Najyok cebu isarahisi ngete nakwatan. Alotu noholong hongoto hongete nahiramita . Tomojete ngete, ngete la ihuhumu nahide, nafok, naharia, ho nadiali. ⁸ Anjilo lobo-anjelo loho harik-ho nahijif jiman, ''Ahuya, ahuya ngete Babilonia na itabayanga, ngete lofa ihuhumu nafohifohi fad omati nabalu noho somon hongete, nabalu ene fa iyieno nahilongojita bebe niho ngete.'' ⁹ Anjilo lobo-anjelo lohohutik-ho nahijifaru fa sing, totianya to namurut na okwat, ''Namojo lobo natiang ho niwaha ho nakialare hongete, cebu ifwotu nahikudo ho mom hongete kuya nito nehene hongete, ¹⁰ omataba cebu ngete nabalu na ilongojitari Najyok, nabalu na ihuhumi ce bu ijuhori ana obu iharuto nicholi hohilongojita hongete. Latwani la omat ngete oswaharu hadi to nahima ho nafuro na iharuto nihatemeni ho anjeloji cebu nihatemeni ho Labore. ¹¹ Nafuro to lolumere hosing olo nihide jik many jik, cebu obu sing obwoni ho nawiri to nafarani kuya cebu tanaharie-sing hule lahamojok ho tiangi ho nimiyang cebu nakialare hongete, cebu lati fad hula ifwotinite nahikudo ho fure hongete. ¹² Anya nangeleso ho riajian ho nadihan ho lati hula iruhi, sing hula obayangi nechihita ho Najyok ho nahiruk niho Yesu.'' ¹³ Etiyir ne namurut tohide otianya, ''Igierehisi anya: Ikie najsaha obwon niho lahayeyiak hula oyeyi niho Lohobu.'' ''Ee'e,'' ojo Nolohailong, ''ojo ongida sing owirari to higiama hosing, niho nahigemita hosing ba ijifare sing.'' ¹⁴ Atiala fa ne ho nateliniso nedis na opwor, cebu ele itwongo nidis fa okialare toho Lahito ho Najyok. Obwonitere fa ngete negita na omimil nihou hongete cebu ho ningerit ho miyang na iram nihene hongete. ¹⁵ Tiye anjelo lobo ho nalotiniso to lomojere ho nangialan to namurut na okwat niho ele itwongo nidis: ''Iyare nengerit ho miyang hoji ho nahichak idengo. Alotu noholong ho dengo, toho atumuhino nadeng ho fok huja.'' ¹⁶ Tiye ele fa itwongo nidis ho nahidarutohiso nengerit ho miyang hongete nifok, nafok ho nadenginiso. ¹⁷ Anjilo lobo ho nalotiniso to lomojere to hide; obwontere cebu ngete ho nengerit ho miyang na iram. ¹⁸ Hebuha fa lobo anjelo lotiniso to lomojere, anjelo la obwonitere fa ho nagolon nihima. Ngete ho nangialan to namurut na okwat niho anjelo la obwonitere fa nengerit ho miyang na iram, 'Iyare nengerit ho miyang hoji na iram ifurohe nitutuji ho hanger kiani ho nifok, atohore nahangar hosing tahanya.'' ¹⁹ Anjelo ho nahidarutohiso nengerit ho miyang hongete nifok ho nahifufurohiso nadengot ho hangar noho nifok ho na hipipirehiso sing nihotwa ho moti ho balu noho hilongojita ho Najyok na osio jik. ²⁰ Ochidehini fa nahiguri ho balu niger ho hang na obolo cebu nohoto na ijuhoro niger tiye hongete many nihadori ho hofito singira,na otum nalif abito ho namiya ile nalamaji.