¹ Ne ho nateliniso natiang ho niwaha olotiniso to hotwa ho hari nitodo. Obwonitere ngete namwaraha tomon cebu nohosi metaharik. Nimwaraha hongete obwoni fa negitaji tomon, cebu nihou hongete obwoni fa nafureto huja opachariti Najyok. ² Anya tiang ho niwaha atel ne fa okialare toho nohoboru. Okialare fa nehehejiaha hongete toho natiang na obengi nahamuk, cebu nahutuk hongete toho nahutuk ho loyime. Isiarahi fa noloworokoko nahifirang hongete niho ngete, ho naseger hongete, cebu nahinefito nemwoc ongida inef. ³ Nohou abito noho ene tiang ho niwaha oleyo toho obwon ho nangarangani na otum iyeno nayeyi niho ngete. Nyuo hati adwanyini fa ene ngarangani, cebu nafok fad ho nahipanya cebu ho nahijif natiang ho niwaha. ⁴ Sing cebu fa ho namojo niho noloworokoko, esieri fa ngete nahifirang niho natiang ho niwaha. Amojie sing natiang ho niwaha, tung, cebu ho na hiwasihiso tianya ojo, ''Ngai lobo toho natiang ho niwaha? cebu ''Ngai hatum itangalasu ngete?'' ⁵ Esiarahini fa nahutuk niho ene tiang ho niwaha na otum otianya to nahiram hetadara cebu ho noho pachita. Isiarahini fa ngete igiamari nahinefito hongete noho nayiafaji nehejek ongon-ho harik. ⁶ Nyuo hati ene tiang ho nangan nahutuk hongete nipachari Najyok, omoro nafure hongete, namaji na omanyari ngete, cebu ehule itwonge nihide. ⁷ Esieri fa ene tiang nehoi nihihwaniri narem ho lati hula iruhi niho Najyok cebu nihinifiniso sing. Cebu, esiarahini fa nahinefito niho ngete niho nemaniti abito abito, lati, netenyita, hona hang. ⁸ Sing fad hula omanyie nifok fa ojo ongida omojie ngete, latuani abito abito lafa obu nafure hongete igierehino, many tolobienere hofok, nibuk noho hisu, ene fa obwon to labore, lofa ale ongoti. ⁹ Nabwonitere lobo ho nahijiok, ikie ngete itiyira. ¹⁰ Nayare lobo ahatwarani, nilotwarari olo ba ngete. Nefadari lobo to nakalas, to nakalas efadari ngete. Nangeleso ho riajan ho nadihan cebu nahiruk noho ehule lahanyilajak. ¹¹ Tiye ne ho natialan ibwo natiang ho niwaha olotu to fok. Obwonitere ngete ho namwaraha harik toho labore cebu otianya toho noloworokoko. ¹² Igiamari ngete nahinefito ho lohijiahi hotiang nibwana hongete, ho nahihon nafok cebu ehule omanye da hongete omojie nolohichiahi hotiang-ngete lofa adwanyini nangangu hongete. ¹³ Ihuhum ngete nadwaran to nagolon, dobu nahihwana ho hima ongiru nifok tohide nihatemeni ho lati, ¹⁴ cebu to nahitelehita eruhi ngete ojo ongida ngete igiem, itonong ngete ehule fa omanye nifok, iramahine sing ojo ongida nakialari nohobayangi ho tiang ho niwaha ngete lo fa iriafini to nanakalas, nyuo hati otum ngete isu. ¹⁵ Iruhi fa ngete ojo ongida isiarahi nolofune niho nakialare hotiang ho niwaha ojo ongida ene kialare otianya c bu isarahi ehule fad idayari fa namojo natiang ho niwaha ongida ifadari. ¹⁶ Ngete cebu ituguliasu lati , hula owahi cebu hula ogoli, lahabarak ho lahaparitak, hule isabite ho hula otware, ongida ifwotini nahikudo niteten holohoyo hosing kuya cebu nihomomite hosing. ¹⁷ Obu fa onyiha niho lobo nihinyianginere kuya cebu nihitenyiangajiere mayak nabwon ngete, nengotit ho tiang, ene, nafure hongete kuya nahikianahino hongete. ¹⁸ Anya ngeleso ho lofero. Nabwon lobo ho najianan, ikie ngete iken natiangi ho niwaha. Nahikenino ho lati. Ora nahikeni hongete namiya ile ho nehejek ile ho ile (666)