¹ Isiarahini fa ne nakediti ojo ongida ne egiamari toho etemit. Ohiramahini fa ne, ''Todete item natempolu ho Najyok cebu ho na Altari, cebu ehule omojite nihotwa hongete. ² Nyuo hati hetem nohorwong ho dafati ho tempulo, toho niho isiarahini fa ngete niho paganoji. Irerie hadi sing nahang na onyila nayafaji nehejek ongon-. ho harik. ³ Esiarahi ba ne lahatafak ho ne nagolon nehiramahinere natianya noho noholongi nalif abito ho namiya haril ho nehejek ile, ijiafahini nalubani.'' ⁴ Hule hatafak harik orahi sing akiani ho ngoros cebu nebwojita ho hima harik huja obotie nihatemeni ho Lohobu ho fok. ⁵ Lanyumu lobo nihiriafinere sing, olotu nahima tohutuhe hosing ho na himuchuohiso lamerok hosing. Lobo la owak hiriafiniso ongida ifadari niho anya hoi. ⁶ Obwoni hule hatafak ho nagolon nihikianahinere nahide ojo ongida nahuju hadi obu obeho niholong lomo neramahise sing nahiram noho Najyok nihonamoi. Obwoni sing ho nahifirang nihibielere nahari ora ahoto cebu iharuti namodie to nediahita diahi toho lomo nawahi sing. ⁷ Lomo natuhohini hadi sing nahiteteleso hosing, natiang na olotu nitodo tofotiri he ewure itangalasu ba sing. Ilanyini ba sing cebu inefu ba ngete sing cebu ifadaya sing. ⁸ Ibalangite ba nakwanite hosing nihoi ho nihang nahitwahaji (na ongele Sodoma ho Ejip)namaji lofa ogurohinerete Lohobu. ⁹ Niho noholongi hutik ho kai hilihe niho lati fad, nemanit, natenyita, ho nahang,oteli hadi nikwanite hosing cebu obu iruhi sing ihwanahini nilume. ¹⁰ Ehule omanye nifok hadi lokwame niho sing cebu okie, adobu nasululahiso nahiyalita niho sing abito abito tananyuo hule laheramahitak ho hiramita harik alumi sing ehule omanyie nifok. ¹¹ Nyuo hati nihalu ho holongi hutik ho nohou nawirita ho hisu hadi alotu niho Najyok ho na hiruhiso sing cebu sing hadi ho nabotie to nehejiaha hosing. Ohuyarahino hadi nabayangi niho ehule oteli sing. ¹² Itiyiri hadi sing nakwatan ho murut tohide na otianya niho sing ojo, ''Ifwosu inyi nitodo!'' Cebu sing hadi ho nafoten nihide to nohotwa hedis, lamerok ho sing iririe tohoda. ¹³ Toho niho ene holong obwon hadi nelihilik cebu namasik tomon noho hang nahitwahajik hadi obunyuoro. Lati nalif metaharik hadi oyeyi niho ene ilihilik cebu lahesujiok hadi ihihire ho nahisiarahiso nakwatan niho Najyok ho hide. ¹⁴ Alangaya fa narohoji noho harik. Iririeta! Narohoji noho hutik olotiniso kerem. ¹⁵ Tiye anjelo loho metaharik ho nahitan nangobwo hongete, cebu namuruto ho tianya tohide ojo, ''Nahang nifok alotu rahan ahang ho Lohobu hojie cebu Kristo hongete. Inef hadi ngete jik many jik.'' ¹⁶ Tiye nolohitwaha nehejek harik-ho ongon hulo fa itwonge niho ehwe segeri ho Lohobu nihatemeni ho Najyok ho na hitegetehiso nakwanite hosing nifok, nohomomite hosing fad nifok sing omoje Najyok. ¹⁷ Sing ho najiman, ''Ohijo ijie awaa niho ji, Lohobu Najyok, lahenefiteni fad, ngete ele tahanya cebu ngete lofa, tananyuo eyaru ji nahifirang hoji ho hohichakf inefito. ¹⁸ Abu fa nahangite itihine, nyuo hati alotu nahilongojita hoji. Alotiniso noholong hongoto ho hiramita ho lahayeyak cebu nihoji nihitokwamari lahegiamak hoji laheramahitak ho hiramita, laheruhok nifure hoji, cebu hula obayangi fa nafure hoji, fad hula obu ongidari cebu hula ogoli. Cebu alotu noholong nihoji nihitangariso ehule itapalari nafok.'' ¹⁹ Tiye ongasu fa natempolu ho Najyok nihide cebu natifina noho hiruk oleyo tetempulo hongete. Obwoni fa nahitworong, nahililiho, hongoro ho hila, nelihilik, ho na lonolofalange na imwoc.