¹ Nabwon ibwo nahisinge niho Kristo, nabwon ibwo nahitotoso nikwama hongete, nabwon ibwo nabwanan harabito noho nolohailong,nabwon ibwo nawahan ho mehino, ² ihwanata nakwama ho ne obolo ongida ite ibwanata harabito nihigigilita, tobwanata ho nakwama harabito, itilahinete nilohailong, cebu ibwanata ho nahigiama abito. ³ Hehwana ibwo nasinge to nariama kuya to napufa, nyuo hati, to nahikwama na ongida, tokwame lati ilany nakwan hoji. ⁴ Hetahito nareji huja iwak ji nyuo hati cebu to tahite newahiti ho hilihe. ⁵ Ihwana anya nihou hoji, lo fa cebu obwon niho Yesu Kristo, ⁶ lo fa obwon Ajyok. Obu ngete ihwanahi nakialare hongete ho Najyok to ho ibwo nasinge nigolihinere. ⁷ Nyuo hati inyak ngete nakwan hongete. Ho nahitarak ngete ahegiamani. Oleyo to ho lati.Ohorini fa ngete atwani. ⁸ Inyak fa ngete nakwan hongete cebu obayang many niyeyi, dobu niyeyi ho hite na ikwala. ⁹ Inaha cebu Najyok itokwata ngete bebe, ho nahisiarahiso ngete nafure na ilany nafureto. ¹⁰ Niho nafure ho Yesu nahunguta fad ongida orugungi, niho hula obwoni nihide ho hula obwoni nifok, cebu hula obwoni nifotir ho fok. ¹¹ Nangadiefo fad ongida iwahe ojo Yesu Kristo ngete Lohobu, niho nakwatan ho Najyok Lamonye. ¹² Tinya, hilasirak, dobu ibayangatate, obu nibwanan ho ne hama nyuo hati cebu tahanya bebe nibiangan ho ne, igiamati niho nahitalahino hote to nabayangi ho nahihirahino. ¹³ Najyok ngete ligiama nihote niho nawahan cebu niho nahigiama ho ngidari ho kwama hongete. ¹⁴ Igiamati nareji fad ahula obu ingungwati cebu nibe risa, ¹⁵ ongida te ibe ibwanata ahula inyilajata cebu irahati emusak hula itianyati natarihe, hula ibwanata nebe pal, iwuloroto afangan nifok nihiji ho laharohojak, lahilahaji hula orohoji bebe. ¹⁶ Iniafata angida nahiram ho hisu ongida ba ne abwonitere natianya nihi tokwatari niholong ho Kristo, tananyuo ajien hadi ne ojo abu fa tiadi ne enamita naharus kuya egiama naharus. ¹⁷ Nyuo hati dobu ijuhohini nahisu ho ne niger aheyalita niho nahihuhumi cebu niho nahigiama ho nahiruk, akwama ne to nakwama na obolo bebe hote fad. ¹⁸ Ongida cebu te ikwamati bebe ho ne. ¹⁹ Nyuo hati awak dwo ne niho Lohobu Yesu ongida osulu Timateo nihote kerem, ongida natianya hongete olotu itogol ne nomo najien ne tatalite ibwanata. ²⁰ Abu ne abwonitere lobo latwani to ho Timateo la ba ohitiala ite angida. ²¹ Otahite sing fad newahita hosing, obu nareji ho Yesu Kristo. ²² Nyuo hati Timoteo etogol nakwan hongete, tananyuo, toho lahito la igiama niho monye hongete, egiama ngete ho ne nihitasarahinere nefanjelio. ²³ Inaha awak ne isulariso ngete kerem nomo natel ne tatali nareji odahi tiji ho ne. ²⁴ Nyuo hati eruk ne niho Lohobu ojo ne to nakwan ho ne hadi kerem, cebu. ²⁵ Egigilo ne osiriu nisulajiere nihote, Epafrodita,hilasi ho ne cebu haleteni ho ne lahegiamani, cebu haleteni ho ne lasegere, cebu lolohejek hote, lahegiamani ho ne. ²⁶ To ho fa etiyiratate ojo odiaha ngete, igigilo fa ngete bebe cebu owak bwanan hote fad. ²⁷ Tarihe odiaha fa ngete bebe many onyiha nayeyi, nyuo hati amehino Najyok niho ngete. Obu nihongete hama, nyuo hati cebu niho ne ojo ongida ne abu abwon ho nahimujuta nitodo ho himujuta. ²⁸ Inaha egeria ne nasulariso ngete ongida nomo netialatate ngete hari otum ite ikwamati cebu abu ba ne egigilo bebe. ²⁹ Ifwotusu Epafrodita niho Lohobu to nakwama ho nabayangi ngete to owahi lati ngete otirahi, to ho fa anyiha ngete nayeyi nihigiamari nahigiama ho Kristo, ³⁰ to ho ebalaya fa ngete nahisu hongete nihigiamari niho ne, isiarahita nareji huja awak ne, nemaji hote hula hatum igiame ngete.