¹ Paulo ho Timateo, lahegiamak ho Yesu Kristo, ho niho hula anyumuni niho Yesu Kristo hula obwoni Filipi, ho lahatialak ho kelesia cebu lahalwahak nekelesia. ² Ikie nangidari obwon nihote ho nayomo ho Najyok Lamonye hojie ho Lohobu hojie Yesu Kristo. ³ Ajo ne awa niho Najyok ho ne to nahigigilita hote fad. ⁴ Noholongi fad amojo ne to te noholongi fad,orahita ngete tihitik amojo ho kwama. ⁵ Ajo ne awa to nafwonita hote hatabito nihitiyirari nefanjelio many to lochifot hobia. ⁶ Abwon ne ho nahiruk nihanya singe, ojo ngete la ichak nahigiama na ongida nihote otuhohini ba many niholong ho Yesu Kristo. ⁷ Ongida niho ne nebwonitere tohoja to te fad tananyuo ibwanatate nitaji ho ne. Irahatate fad ahalwahak ho ne niho nangidari ho Najyok nitwara ho ne ho nihigiara ho ne ho nahiruk ho efanjelio. ⁸ Ora Najyok ahapiahani ho ne, nahigeria ho ne ite fad niho nabolori ho kwama ho Yesu Kristo. ⁹ Amojo ne ojo ongida nakwama hote otwarahino bebe nilofero cebu najianan na ifut. ¹⁰ Ehwana ne anya ojo ongida ite itiamata cebu inyumusu nareji huja ongidari ongida ba te itianyati natarihe nibe ibwo nepal niholong ho Kristo. ¹¹ Cebu, ojovongida ite ibwanata ho nahanger ho pitan na olotu hara niho Yesu Kristo, nabolori ho Nakwatan ho Najyok. ¹² Tahanya awak ne ite ijianata, hilasirak, ojo nareji huja idwongi niho ne isiarahini nefanjelio ogol. ¹³ Ora anya tanabwanan ho ne niho Kristo olotu isarahiso niho lahatialak ho hang ho hobu cebu niho lati fad. ¹⁴ Cebu ojo ongida lahilasirak niho Lohobu, ofwoni golon tanatwara ho ne, iramahisi natianya to nagolon nebe bayangi. ¹⁵ Obwoni cebu hilihe hula itokwate Kristo to nahayini ho nalongo, cebu hilihe tanarohoji ho tajio. ¹⁶ Hula itokwate Kristo tabiangan ikwama ojieni ojo ahisieri ne niho tihitere nefanjelio. ¹⁷ Nyuo hati hilihe itokwate Kristo tanariama ho newahita huja orohoji.Egigile sing ojo ohifunahiso sing niho namiajan na ipadata ne nilotwarari. ¹⁸ Nanyuo hati? Niho ibwo nihoi, kuya nihitunuhura kuya nitarihe, itwokate Kristo; cebu ne akwama niho inejie,ee tarihe, akwama hadi ne. ¹⁹ Ajien ne ojo iyaru ba anya nihitalahino ho ne, tananyuo, tenemojita hote cebu nahisiarahita ho Lohailong ho Yesu Kristo. ²⁰ Ora ahiruk ho wahan ho ne cebu nijiman ojo obu ba ne eloriri. Nyuo hati to nahitogolita fad,toho dihitik bebe to ho tahanya, eyeno ba ne nakwatan niho Kristo nikwan ho ne, tanahisu kuya tanayeyi. ²¹ Niho ne nihisujiere ngete Kristo, neyeyijiere ngete nahorihiso. ²² Nyuo hati neyeno nahisu nahanger ho higiama ho ne,abu ba ne ajien ani otum onyumuni. ²³ Ohipihite ne hunya inyumuta. Abwon ne ho nawahan nilojiere bwanare ho Kristo,na ongida bebe! ²⁴ Nyuo hati nehiwasihinere bwanan nikwan osiriwu to te. ²⁵ Toho abwonitere ne ho nahiruk niho anya, ajien ne ojo iwasihi ba ne, ee, cebu ojo itiringa ba ne bwanan hote fad, nihikiama hote cebu nikwama hote niho nahiruk. ²⁶ Tanya tianya,ongida te ipufati to ne niho Yesu Kristo nomo nabwon ne nihote hari. ²⁷ Ihwanahisi nahitwongo hote nemanyita huja ongidari niho nefanjelio ho Kristo ongida, kuya alotu ne itiala ite kuya abe ne, ongida ne itiyira nabotia hote na ogol niho nolohailong abito, nilohailong abito nihigiamari harabito niho nahiruk ho efanjelio. ²⁸ Hebayangati ibwo nasinge niho hula ohitirise ite, na ora nihosing ahipapala nyuo hati noho nahitalahino hote, nahitalahino na olotu niho Najyok. ²⁹ Tananyuo nihote esieri fa niho Yesu Kristo,obu ce nihiruhutere hama niho ngete, nyuo hati cebu nihipadatari nimaji hongete, ³⁰ toho otum ongida ite ipadatati niho nangalasu abito na itelusu te niho ne, cebu tahanya itiyirata ojo obwon niho ne.