1 Ngete ho najiman niho sing, ''Tarihe ajo ne nihote, obwoni hilihe nihote inyi hula obotie hula obu hadi imangi nayeyi many sing hobe oteli nahang ho Najyok na olotinere nahifirang. '' 2 Nihalu ho holongi ile, Yesu ho nahiyaru Petur ho Yakobo ojo Yuwane many nihide hodenge, sing ta nakwanite hosing hama. Tiye ngete ho na bwanan hama nihatemeni hosing. 3 Natolubongoji ho ngete ho nanyilaji bebe, apwori tonagolon, ilany napwaran hongete adobu nahatwani ibwo na otum itopwor sing. 4 Tiye Elijah ho Muse ho naleyeji niho sing, cebu sing otianya ho Yesu. 5 Petur ho na hitarang jiman niho Yesu, ''Rabbi, ongida niho jie nibwonitere inyi, ikie ijie ohihuhum nahayi hutik, abito noho ji, abito noho Muse, cebu abito noho Elijah. 6 ''(Obu fa ngete ojien nanyuo ngete ahatenyu, obayangahini fa sing bebe. ) 7 Nidis ho nalotiniso ho nahimuhoriso sing. Tiye namurut ho na lotiniso tohotwa hedis, ''Ngete ale Iha ne. Itiyirati niho ngete.'' 8 Tarafanak, lofa nateli sing hilur, obu sing otelini lobo latwani tiye ho sing, nyuo hati Yesu hama. 9 Lofa nangirinise sing toho nifok, ngete ho nahiramahiso sing ojo ongida obu iramahini lobo latwani niho nasinge na atelini sing, many hati nadetino lahito ho Leye niho lahayeyiak. 10 Tiye sing ho nahiningere ene hiram nikwanite ho sing, nyuo hati sing ho natianya nikwanite ho sing nanyuo ''nabuhuniso niho lahayeyiak'' itelehi. 11 Sing ho nahifi ngete, ''Nanyuo lahegierok hobuhi ojimi ojo ongida Elijah olotu soni?'' 12 Ngete ho najiman niho sing, ''Ongida Elijah olotu tur soni ojo ongida olotu inyiahahiso nareji. Nanyuo hati ngete igierehi ojo ongida Lahito ho Leye oniama niho nalohoi horeji cebu ongida otiale ngete toho latwani la oparita? 13 Nyuo hati ajo ne nihote ojo alotu Elijah, sing ho nahigem nasinge lofa owahi sing niho ngete, toho otianyari nabuk nahiram hongete.'' 14 Lofa nafwoni sing niho lolohejehi, sing ho nateliniso nalohoi ho lati iluri sing cebu lahegierok hobuhi orise ho sing. 15 Tiye natialan hosing Yesu, nalohoi ho lati fad ho nabayangi sing ho na hinamahiso niho ngete ho nahihat ngete. 16 Ngete ho nahifi lolohejehi hongete, ''Nanyuo te irisati ho sing?'' 17 Lobo fa tehiji ho lohoi ho lati ho na hitarang ngete, ''Lahetejianani, Eyieno ne iha ne niho ji. Obwonitere ho nolohailong na obu isiarahi ngete otianya. 18 Inefitito ngete cebu ibirehita ngete nifok cebu itufuruta nahutuk, onyahala nahala hongete, cebu osil bebe. Efi fa ne lolohejehi hoji ojo ongida ipwolori ene singe nihongete, nyuo hati obu fa sing otenini.'' 19 Ngete ho nahitarang sing, lahilahaji hula obu iruhi, many hanu ba ne alo itwongo hote? Many hanu ba ne alo dihan hote? Iyienete ngete niho ne.'' 20 Sing ho nahiyieno ele hito niho ngete. Lofa natel nolohailong Yesu, ngete tiye tiye ngete nahikokasa na imwoch. Ele hito fa ho nahuyari nifok nolohapoyok ho na hifuruta nihutuk hongete. 21 Yesu ho nahifi monye hongete, ''Many hanu mongete obwonitita tahanya?'' Monye ho najiman, ''Many hora edole. 22 Ibirehita fa ngete tihitik nihotwa ho hima kuya nihotwa ho hari cebu otem hipalariso ngete. Netum ji ihon ibwo nasinge, to mehino nihojie, to lwaha ijie.'' 23 Yesu ho najiman niho ngete, '''Netum ji'? Otenine nareji fad niho ngete la iruk.'' 24 Tiye tiye monye ho hito ho nayio jiman, ''Eruk ne! To lwaha nabiangan heruk ho ne!'' 25 Lofa natel Yesu nalohoi inaminise niho sing, ngete ho nahireng nolohailong na ibot ho najiman, ''Iji naheningeni ho na hatuhoni holohailong, Ahiramahi ne iji, kwo toda hongete, cebu heruhi niho ngete hari.'' 26 Ngete ho nayio niger ho napuha lahito bebe ho nalotiniso niger. Akialare fa lahito toho lomo lahayeyiani, nyuo hati ajimi fa nalohoi ho lati, "Ayeye ngete.'' 27 Nuo hati Yesu ho natinginiso ngete nihide to nehene hongete, ele hito ho na botia. 28 Lofa nalotu Yesu nihotwa ho haji, lolohejehi hongete ho nahifi ngete hama, ''Nanyuo jie obe ohirok ngete niger?'' 29 Ngete ho najiman niho sing, ''Habu anya otum orohino tinyi mayak to namojio.'' 30 Sing ho nafwoten toda ho natuloriso hara Galileya. Obu fa ngete owak lobo ojien aji fa sing, 31 itejianari fa ngete lolohejehi ho ngete. Ngete ho na jiman niho sing, ''Isiarahini hadi lahito ho Leye nihes ho lati, cebu itafadari hadi sing ngete. Lomo hadi netafadari sing ngete, nihalu ho holongi hutik ngete hadi ebuhu hari.'' 32 Nyuo hati obu fa sing ojieni anya tianya, cebu obayangi fa sing nahifiasu ngete. 33 Tiye sing ho na fowniso toho Kapernaum. Lofa neruhi nihaji ngete ho nahifiasu sing, ''Nanyuo te itianyati nihoi?'' 34 Nyuo hati sing ho nahiningo. niho sing orisariti fa nikwanite hosing abito abito nihoi ojo ngai ngete fa lelany. 35 Itwongo nifok, ngete hona ngeleniso ehule tomon ho harik harabito ho najiman niho sing, ''Nara lobo lowak bwanan berien, ongida ngete obwon nihalu ho lati fad ho lahegiamani ho lati fad.'' 36 Ngete ho natinginiso lobo lahito lokude ho nakochohiso ngete nihiji ho sing. Ngete ho nahiyaru fa ele hito to nekudihi hongete ho najiman niho sing, 37 ''Ngete la ifwotu ale hito tanafure ho ne, cebu ohifwotu ne, cebu nara lobo lifwotu ne, obu ngete ohifwotu ne hama, nyuo hati ngete ele ohisulu ne.'' 38 Yuwane ho na tianya niho ngete, ''Lahetejianani, ohitel fejie lobo latwani odahari nahiramita huja orohoji to nafure hoji ijie ho nahitobwoch ngete, tananyuo obu ngete ohijifito ijie.'' 39 Nyuo hati Yesu ho na jiman, ''Hetihoto ngete, obe lobo la hatum ihwana nahigiama na ogolon nifure ho ne cebu nihalu kai ngete atianya nasinge ibwo na oroho nihone. 40 Ngete la obu ohidaya ijie ngete lohojie. 41 Ngete la ohisiarahi iji nahari to necholi ongida imat tananyuo ojo ira ji aloho Kristo, tarihe ajo ne niho ji, obu hadi ngete ongotihi nalwaha hongete. 42 Ngete la isusuda lobolahito lokude tinyi ngete la iruk niho ne ojo ongida ohuya, ongida ngete obwonitere honolobunge nahituahaji otorahino nimurut hongete ho cebu ongida ibirehini nihotua hohari. 43 Nara nehene hoji lohisiarahita iji nahuyari, tonguteye ngete. Ongida ngete niho iji nihiruhinere nimanya na ongor angati ilany nabwonitere nehes harik ho cebu naloten iferno, nihotua hohima na obu 44 onunyaya. 45 Nara neheju hoji lohituhuyarita iji, tonguteye ngete niger. Ongida niho ji nihiruhinere nimanya a hangurani ilany nabwanan henehejiaha harik ho nahipulohino iferno. 46 . 47 Nara nohonyiek hoji lohisiarahita iji nahuyari, iwuloye ngete niger. Ongida niho ji nihiruhinere nihang ho Jyok tonohonyiek abito ilany nohonyiehite harik ho nipulohinere niho iferno, 48 namaji na obu narude hosing oyeyi, ho nihima newasihi. 49 Hejobu orahi hadi lati abito abito amile nihima. 50 Ongida namile, nyuo hati nabe namile ho naliaman, tatali hatum iji itelem ngete hari? To bwanata ho namile nikwanite hote, cebu tobwonata ho nayomo nihote abito abito.''