¹ Niho ehwe ho longi , obwon fa hari ibwo nalohoi na imwoch, obu fa sing obwoniterete ibwo nasinge nohonyasu. Yesu ho nangialan lolohejehi hongete ho najiman niho sing, ² ''Abwon ne ho namehino niho lati, nyuo iwasihini sing bwanan inyi ho ne many noholongi hutuk nebe ibwo singe na onyasie sing. ³ Narok ne sing tinyi ojo ongida sing ofwe nihangite ho sing ahula obu onyie, ohuyarite ba nihoi. Ofwoni hilihe niho sing to hangite huja olama.'' ⁴ Lolohejehi hongete ho nahitarang ngete, ''Aji jie hahitum ohihori nebuneji huja otumohine tanya maji loyohojoyo nihitofwangari hule ti?'' ⁵ Ngete ho nahifi sing, ''Baya te ibwoniterete nebuneji?'' Sing ho na jiman, ''Metaharik.'' ⁶ Ngete ho nahiramahiso nolohoi ho lati itwonge nifok. Ngete ho nahiyaru nebuneji metaharik, ho najiman awa, ho nahibebeny sing. Ngete ho na hisiarahiso niho lolohejehi hongete ihuhumahini nihatemeni hosing, sing ho nahihuhumahiso nihatemeni ho lati. ⁷ Obwoniterete fa cebu sing ho hilihe lahayem kai, lofa najo ngete awa niho sing, ngete ho nahiramahiso lolohejehi ongida ohori hunya angida. ⁸ Onyie fa sing many iyadange, ho sing ho nahikukuruniso ehwe natonge ho lorurwot, nangerieji metaharik huja otade. ⁹ Otumi fa lati nalif ongon. Tiye ngete ho nasulariso sing tiye. ¹⁰ Tiye tiye ngete ho nadeto hiruhiso nihotwa ho hitigol ho loloheji hongete, sing ho na fwoten many nihotwa ho hang ho Dalmanuta. ¹¹ Tiye lati hoFarise ho nafwoniso niloke ho nachifon itirisa ngete. Owahi fa sing niho ngete naleyeji to hide, nitiamari ngete. ¹² Owirita fa ngete bebe nihotwa holohailong hongete ho najiman, ''Nanyuo anya hilumusak otahite naleyeji? Tarihe ajo ne nihote, obe hadi ibwo naleyeji isieri niho anya hilumusak .'' ¹³ Tiye ngete ho nachwarahiso sing, ho nahiruhiso nitigol hari, ho naloten tiye toho niho ibwo nangati. ¹⁴ Tahanya alulere lolohejehi nahiyaru ho nebune. Obu fa sing obwoniterete ho nebuneji ilanyi abito nihotwa ho tigol. ¹⁵ Ireng fa ngete sing jiman, ''iwasihisi kianyan cebu itiesete angida to nabula ho lati Farise cebu nabula ho Herod.'' ¹⁶ Lolohejehi ho na higigilo nikwanite ho sing, ''Ora tona bengitere hojie nebune.'' ¹⁷ Ajien fa Yesu anya hiram, ngete ho najiman niho sing, ''Nanyuo te igigilete nahiram hobiangan hebuneji? Hobe ite ihorihisi? Hobe te ijianata? Agetere natajio hote? ¹⁸ Ibwanatate ho no honyiehite, ibe te itialati? Ibwanatate ho najohe, ibe te itiyirati? Ibe te ihuyasu? ¹⁹ Lofa nabunya ne nebuneji miyet niho lati nalif miyet, baya fa nangerieji huja ifuti ho nolorurwot hebuneji huja itingeretete?'' Sing ho najiman niho ngete, Tomon ho harik.'' ²⁰ Lofa nebubuny ne nebuneji metaharik niho lat nalif ongon, baya fa nangerieji huja ifuti iyaritite?'' Sing ho najiman niho ngete, "Metaharik.'' ²¹ Ngete hna jiman, ''Hobe te ijianata?'' ²² Sing ho nafwoniso toho Betsaida. Lati toda ho nahiyieno niho ngete latwani la ongodo ho nahilelia Yesu ojo ongida otir ngete. ²³ Yesu ho na hinef ele lahangodoni tenehene, ho nahiyaru ngete niger to hotwa ho hang. Lofa nemimitahi ngete nahamilak ho natirehiso nehes nihonyiehite hongete, ngete ho na hifi elerok, "Etel ji ibwo nasinge?'' ²⁴ Ngete ho natiala nihide, ''Atel ne lati hula okialare toho nakiana huja odahe.'' ²⁵ Tiye ngete hari ho natirehiso nehes hongete nihonyiehite hongete, elerok ho nangan nohonyiehite, ngete ho natiala nareji ahuja onyilaji. ²⁶ Yesu ho nahinyiahariso ngete toho nihang hongete cebu iramahi ngete, ''Heruhi nihang hogala.'' ²⁷ Yesu ho naloten ho lolohejehi hongete nihangite ho Caesarea Filippi. Nihoi ngete ho nahifi lolohejehi hongete, ''Ojimi lati ne ngai?'' ²⁸ Sing ho na hitarang ngete jiman, ''Yuwane lahejuhoni. Hilihe ojimi, Elija,' cebu hilihe, 'Laheramahitani ho hiramita ho Jyok.''' ²⁹ Ngete ho nahifi sing, ''Nyuo hati ijimatate ngai ne?'' Petur ho najiman niho ngete, Iji Kristo.'' ³⁰ Yesu ho nahiririha niho sing ojo ongida obu iramahini niho lobo latwani. ³¹ Ngete ho nahichak hitejiana sing ojo ongida Lahito ho Jyok ipadata niho nalohoi ho reji, cebu idayari hadi lolohitwaha ho Lapadari hula ilanyi ho lati hula igieri nabuhi, obeheri hadi, cebu nahalu hoholongi hutik ibuhu hadi toyeyi. ³² Oteny fa ngete anya ana onyila. Tiye Petur ho nahiyaru ngete angati ho nahirianga ngete. ³³ Nyuo hati Yesu ho nangolo nilohejehi ho ngete ho nahireng Petur jiman, ''Ilo nihalu ho ne, Lahesuswani! obu ji ihwanahi nohou hoji nireji ho Jyok, nyuo hati nareji ho lati.'' ³⁴ Tiye ngete ho na ngeleniso lati ho lolohejehi ngete harabito, jiman niho sing, ''Lawak lobo ijifito ne, ikie ngete ibalahi nakwan hongete, iyaru nahite hongete na ikwala, ho nahijif ne. ³⁵ Latwani la owak tunan nahisu hongete ongotihi hadi, latwani la ibalaya nahisu to nahiram ho ne ho to nefanjelio na odwa, otunu hadi . ³⁶ Nanyuo longida latwani, niho nihinefitere nafok fad, nyuo hati olulworo nahisu ho ngete? ³⁷ Nanyuo hatum latwani siarahi nitomere nahisu hongete? ³⁸ Ngete la onyahini nariri to ne ho na hiramita ho ne niho anya hilahaji ijiejiasu na hongorwo ho lati ho nepalak, onyahini hadi nariri Iha Latwani to ngete lomo nalotu to nakwatan ho Monye hongete ho anjeloji hula onyilaji.''