¹ Lati ho Farise cebu hilihe lahegierok hobuhi hula fa ofwoni to Yerusalem ho na hifurohino ilur ngete. ² Oteli fa sing ojo anye hilihe nolohejehi hongete nebune to nehes hosing huja iboti, nehes huja obu ilalaru. ³ (Obu lati ho Farise ho lati ho Yahud fad onye mayak nafinari, tananyuo inefite sing nahiramita ho lohitwaha. ⁴ Lofa nafwoni latiho Farise tomaji na etenyiangariti nareji, obu sing onyese mayak nahojori sing, cebu inefite sing nemanyita to nahilalasu hecholiha, namotiongo, nagilasiji, ho nangeto niho namaji fa na onyeserete sing.) ⁵ Lati ho Farise ho lahegierok hobuhi ho nahifiasu Yesu, ''Nanyuo nolohejehi hoji obe odahe to nemanyita ho lohitwaha, onyese nebune ho sing to nehes huja iboti?'' ⁶ Nyuo ngete ho najiman niho sing, ''Eramahi Isaya fa angida ite lahagesemok. Igierehi fa ngete, 'Ohibayangi ne hulati to nahutuhe ho sing, nyuo hati natajio ho sing olamaji niho ne. ⁷ Isiarahini niho ne namojo na obe na ngidari, itejiane nahiramita ho lati toho nechihita.' ⁸ Idahisite nechihita ho Najyok cebu totunutete soni nalohangite.'' ⁹ Ojo fa cebu ngete niho sing, ''Nanyuo longida nihote nehidayajire nechihita ho Najyok ongida otum ite itunata nolohangite hote! ¹⁰ Ojo fa Muse, 'Tobayanga monye hoji heyiang hoji,' cebu, 'Ngete la otianyitito norohojiaya tomonye kuya to iyang hongete otirahi yeyi hadi.' ¹¹ Nyuo hati tojimata, 'Najo latwani niho monyie hongete kuya iyiang hongete, ''Niho nalwaha na otum iji ihorihi niho ne ngete neyalita,''' (ngete na lojimi, 'Esiarahino niho Najyok')_ ¹² nyuo hati abu te isiarahisi ngete ongida igem ibwo nasinge noho mongie kuya noho eyiang hongete. ¹³ Etihotote nechihita ho Najyok to nemanyita hote huja ihwanahisite nifok. Cebu ihwanahitete nareji huja okialare.'' ¹⁴ Ngete ho nangialan lati hari ho najiman niho sing, ''Itiyirati niho ne, ite fad, cebu iruhoto. ¹⁵ Obe ibwo nasinge teger otwani nahatum itapalaya ngete lomo neruyo niho ngete. Ngete nasinge na olotinita totuani ngete litorohoj ¹⁶ ngete.'' ¹⁷ Tanya lofa nedahi Yesu nalohoi ho lati ho nahiruhiso nihaji, lolohejehi hongete ho nahifiasu ngete nahiram hohorwong hotianya. ¹⁸ Yesu hona jiman, ''Herahata cebu ite alati hula hobe itire? Obu ite ihiarata ojo nasinge na iruta lituani teger habu otum itorohoj ngete, ¹⁹ nyuo obu otum olo nitaji hongete, nyuo hati olo nihotwa hongete ho naringariso niger tiho nihotwa hohineter?'' Niho anya itenyit Ihuhum fa Yesu angirasi fad huja onyilaji. ²⁰ Ngete ho najiman, ''Ngete nasinge na olotu to twani ngete litorohoj ngete. ²¹ To twani, totaji, ofwoni higigilita huja iboti, nohoho, nasomon, nahoho, nahifadayarita, ²² nahijiasu nangorwo lati, nawahan nareji ho lati, narohoji ho manya, nagesemi, nawahan hosomon tohoda, nahilingojita nireji ho lati, natianyari nafureto ho latj, nahitadara, nadataru. ²³ Hunya rohojita fad ofwoni to hotwa, sing huja nareji huja itapalri latwani. ²⁴ Ngete ho nadeto toda ho na loten tiye toho nihang ho Tire ho Sidonia. Ngete ho na lotiniso nihaji obu owak lobo latwani ojien ojo abwon ngete da, nyuo hati ngete habu ngete otum idimaru. ²⁵ Nyuo hati tiye kerem nangorite, na obwon fa ngarini ho nolohailong nebot, ho nahitiyir nahiram hongete, ho na lotiniso, huyari nihejiaha hongete. ²⁶ Tahanya ora fa ene ngorite anoho Grik, natwani ho Sirafoenia to nangadari ho manya. Ilelia fa ngete niho ele twani ojo ongida ituduhaya naminingati totaji hongete. ²⁷ Ngete ho najiman niho ene ngorite, ''Ikie so itanyie lemusak. Obu opit nihiyajiere nebune limusak ho na hibirehiso ningohe.'' ²⁸ Nyuo hati ngete ho nahitarang ho na jiman niho ngete, ''Eee, Hobu, adobu nangohe huja obwoni nifotiri ho lonyesere obe ikukure naruturutu hongirang hemusak.'' ²⁹ Ngete ho najiman niho ene ngorite, ''Tanahitiyir hoji anya, ibwon ji ho nahisabita nilojiere. Alo naminga na orohojaya tiye hongara ji.'' ³⁰ Ngete ho nayiteriso toho nihaji hongete ho na horihiso ngaranangete ogeto nikieni, ohorihi fa ngete naminingati nalo. ³² Sing ho nahiyieno lobo lahatuhoni niho ngete cebu obu otum otianya, sing ho na hilelia niho ngete ojo ongida otirehi nehes hongete niho ele twani. ³³ Ngete ho nahiduhariso elerok to hiji ho lati niger, ngete ho nahihwanihiso nahafiala hongete nihotwa hojohe hongete, nituhohiso ho mita ho hamilak, ngete ho natiron nangadief hongete. ³⁴ Ngete ho natiala toho nihide, ngete ho nadwala ho najiman niho elerok, "Ephphatha,'' najiman ojo, ''Tonga!'' ³⁵ Tiye tiye najohe hongete ho nangasu, cebu nasinge lofa itihito nahutuk hongete ho na tiangaru ngete ho na tianya angida. ³⁶ Yesu ho na hiramahiso sing ojo ongida obu iramahini lobo latwani. Nyuo hati lofa neramahi ngete sing bebe, sing ho natianyari ngete bebe. ³⁷ Obayangi fa sing bebe, jiman, ''Egem ngete nareji fad angida. Ihuhum cebu ngete lahatuhok itiyira cebu laheningok otianya.''