¹ Yesu ho nahidahiso ene maji ho naloten nihang ho Yudeya cebu many olang nimaji ho Hari ho Jordan, nalohoi ho lati ho nafwoniso niho ngete hari. Ngete ho nahitejiana sing hari, toho amohohino fa ngete nihitejianari. ² Tiye lati ho Farise ho nafwoniso niho ngete nitiamari hifi ngete, ''Osiriu soni niho habila ngorite nijahari nguru nangete?'' ³ Ngete ho nahitaranginiso, ''Nanyuo fa Muse ohiramahi ite?'' ⁴ Sing ho najiman, ''Isiarahi fa Muse laleye ojo ongida igier newaraga nihitelehinere najaha ho narohoriso ngete tiye.'' ⁵ ''Tananyuo ora fa to nagolon hotajio hote igierere ngete anya chihit," Yesu lojo fa nihosing. ''Nyuo hati many tolochifot hobia h, ⁶ 'Ihuhumu fa Najyok sing aleye ho na ngorite.' ⁷ 'Niho anya igigil idahi hadi naleye monye hongete heyiang hongete ho na hitilahino niho ngore, ⁸ cebu sing harik ho na fwoniso rahan nakwan abito.' Abu sing orahi harik, nyuo hati nakwan abito. ⁹ Inaha, nasinge na itilahi Najyok harabito, ikie lobo twani obe opek ngete.'' ¹⁰ Lofa nabwoni sing nihaji, lolohejehi ho na fiasu ngete hari anya hiram. ¹¹ Ngete ho na tianya niho sing, ''Ngete la ojiak ngore cebu oyiama ibwo nangorite ituruhi nepalita nihene ngorite. ¹² Nara ngete lojiak habila nangete oyem lobo latwani, ahorihi ngete nepalita ho habila twani.'' ¹³ Tiye sing hona hiyieno lemusak hosing niho ngete ojo ongida kuya ngete otir sing, nyuo hati iringi fa lolohejehi sing. ¹⁴ Nyuoati lofa najien Yesu ene hiram, ilongojita fa ngete ho najiman niho sing, ''Isiarahisi hula musak lokudarak ofwoni niho ne, hetihoto sing, ora nahang ho Jyok anoho ehule okialare toho sing. ¹⁵ Tarihe ajo ne niho te, ngete la obu ifwotu nahang ho Jyok toho lahito nolokude obu hadi ngete iruhi tarihe.'' ¹⁶ Tiye ngete ho na hiyaru lemusak nikudiha hongete ho najwahan sing ohorihi ngete otafahi nehes hongete nihosing. ¹⁷ Lofa nachif ngete namisok hongete, latwani ho nahinam many niho ngete ho na rugungi nihatemeni hongete, ho nahifi, Lahatejianani la ongida, nanyuo ne hehon nilunyohinere ho manya na osio jik?'' ¹⁸ Yesu ho najiman, ''Nanyuo iji ingele ne ojo angidarani? Obe lobo twani ongida, mayak Najyok hama. ¹⁹ Ijien ji nechihita: 'Ojo banga hefadaya, hejiau nguru twani ho habila twani, hehoholiso, hehwana nahiramita hogesemi, hemwanari, tobayanga monye hoji ho iyiang hoji'.'' ²⁰ Ele twani ho na jiman, ''Lahetejianani, eruk ne hunya reji fad niholong arahitere ne ahilahaji.'' ²¹ Yesu ho natiala toho nihongete ho nakenitere ngete. Ngete ho najiman niho ngete, ''Obwon nasinge abito na obe niho iji. Ongida iji itenyiangaya huja reji fad ibwonitere iji isiarahi sing niho lahaparitak, ibwon hadi ji ho nareji nihide. Nyuo hati kwo, ijifine ne.'' ²² Nyuo hati to anya hiram ngete ho na hilongojita bebe ho na loten tiye ala oswaharu, tananyuo obwonitere fa ngete ho nalohoi horeji. ²³ Yesu ho natiala hilur ho najiman niho lolohejehi hongete, ''Totialata tatali nagolon hongete niho ehule lahabarak nihirutari nihang ho Najyok!'' ²⁴ Obayangahini fa lolohejehi netenyita hongete. Nyuo hati Yesu ho najiman niho sing hari, "Lemusak, totialati tatali nagolon hongete nihirutari nihang hojyok! ²⁵ Onyiha niho Nakoni koni nilojiere hara nihonyiek ho libira, ilany niho lahabarani nihiruyojiere nihang ho Jyok.'' ²⁶ Obwoni fa sing ho nabayangi to nagolon ho najiman nikwanite hosing,''Ngai hati ba litalahino?'' ²⁷ Yesu ho natiala niho sing ho najiman, ''Niho lati ogol, nyuo hati obu niho Najyok. Onyali nareji fad niho Najyok.'' ²⁸ Petur ho nachifon tianya nihongete, ''Totiale, ahirwatahi jie nareji fad hona hijifito iji.'' ²⁹ Yesu ho natianya, ''Tarihe ajo ne nihote, obe lobo la irwatahi nahaji, kuya hilasira, kuya hinasira, kuya hotenge, kuya monye, kuya nafok, to ne, cebu to nefanjelio na odwa, ³⁰ ngai ba lobe ifwotu nenyiahita nehejiek nemiya abito tahanya niho anya fok: nahayi, ho hilasira, hinasira, ho tinge, ho lemusak, ho nafok, ho netegemita, ho nifok na olotiniso, nahisu na osio jik. ³¹ Nyuo hati nalohoi hula ibwoni berien ofwoni ba rahan alohichungi, cebu lolohichungi orahi alochifot.'' ³² Obwoni fa sing nihoi, idaha toho Yerusalem, cebu odaha fa Yesu nihatemeni ho sing. Obayangahini fa lolohejehi, cebu ehule ijifite nihalu hongete honabayangi. Yesu ho nahiyaru ehule tomon ho harik angati ho na chifon iramahiso sing nanyuo ba lolotu kerem idwong nihongete. ³³ ''Tohiarati, ohidahejie many Yerusalem, ho Lahito ho Leye isiarahini hadi niho Lapadiri hula obolori ho lahegierok hobuhi. Itorohoji hadi sing ngete niyeyi cebu isiarahini ngete niho ehule obu orahi alati ho Jyok. ³⁴ Okeniterete hadi sing ngete, omite ngete, osule ngete, cebu ifadari ngete. Nyuo hati nihalu ho holongi hutik ebuhu hadi ngete.'' ³⁵ Yakobo ho Yuwane, lemusak ho Sebedi, ho nafwoniso many nihongete jiman, ''Lahetejianani, ohiwak ijie iji ihon nasinge na ohifiasu jie iji.'' ³⁶ Ngete ho najiman niho sing, ''Nanyuo te iwahata ne ihon nihote?'' ³⁷ Sing ho najiman, "Isiarahi ijie ohitwongo hoji nimaji ho kwatan hoji, abito niteten hehene hoji cebu abito nihajiong hoji.'' ³⁸ Nyuo hati Yesu ho nahonyiahahiso niho sing, ''Ibe te ijianata nareji na ifiasetete. Hetumatate imatati nicholi na hadi amatari ne kuya idihusu nabatisimo na hadi ohijuherete ne?'' ³⁹ Sing ho najiman niho ngete, ''Ohitum jie.'' Yesu ho najiman niho sing, ''Necholi na hadi amatari ne amatari, imatariti hadi te, cebu nabatisimo na ahijuherete ne, ohijuhi cebu hadi ite. ⁴⁰ Nyuo ati ngai lotum itwongo niteten hehene ho ne kuya nihajiong hehene ho ne obu ne lesiarahi, nyuo hati ora fa ngete nehehule ehuhumahine.'' ⁴² Yesu ho nangeleniso sing nikwan hongete jiman, "Ijianatate ehule itarahi ahenefitok ho lati ho paganoji imohori sing, cebu nolohitwaha ho sing iramahini nahiram na olang sing. ⁴³ Nyuo hati obu hadi ora niho anya ihoi hote. Ngete la owak lotiniso bolori tohiji hote ongida ora ahegiamani, ⁴⁴ cebu ngete la wak bwanan nihatemeni tohiji hote hadi ongida soni ora ahegiamani ho lati fad. ⁴⁵ Obu Iha latwani olotu ojo ongida olwahe ngete, nyuo hati ngete ongida olwak, cebu ongida isiarahi namanya hongete toho naduma ho hitalahinere nalohoi totwara. ⁴⁶ Sing ho nafwoniso toho Jericho. Lofa ngete nedahi Jericho lolohejehi hongete ho nalohoi ho lati na imwoch, iha Timaeus, Bartimaeus, lahamomojiteni la ongodo, itwongo nihoi. ⁴⁷ Lofa nitiyir ngete ojo Yesu ho Nazarene, ngete ho nachifon higworita jiman, "Yesu, Iha Davide, to mehine to ne!'' ⁴⁸ Nalohoi ho nahimumura lahangodoni, jiman ongida ngete iningo. Nyuo hati ngete ho na hirianya yio to hoda, ''Iha Davide, to mehine to ne!'' ⁴⁹ Yesu ho nabotia hiramahiso ngete ojo ongida ongeleni. Sing ho nangialan ele ngodoni, jiman, ''Togolo! Todete! Ongeleso ngete iji.'' ⁵⁰ Ngete ho na hibireriso nabongo hongete angati, hifirita, ho nalotiniso niho Yesu. ⁵¹ Yesu ho na hitarang ngete jiman, ''Nanyuo ji iwak ne ihon niho ji?'' Lahangodoni ho najiman, ''Rabbi, awak ne ifwotiniso nafangan ho ne.'' ⁵² Tiye Yesu ho najiman niho ngete, Ilo. Etingidar nahiruk hoji iji.'' Tiye tiye ngete ho natiala hari, ngete ho nahijifaru Yesu nihoi.