¹ Tahanya lofa nafwoni sing toho Yerusalem, anyihe fa sing niho Betpaji cebu to ho Beteni, nidenge ho Olife, Yesu ho na rohoriso nolohejehi hongete harik ² ho najiman niho sing, ''Ifwasi nihang na obwon hama niho jie. Many heruhisete ngete, ihorihisi bate nahito ho logumar o motia na hobe oyiri. Tolahusu ngete iyienete ngete niho ne. Najo lobo nihote , ''Nanyuo te igiamati anya?' To jimata ojo, 'Hobu lobwon ho nawahan ngete ba tiye edahi ite iyienete ngete inyi.''' ⁴ Sing ho nafwoten tiye ho nahorihiso nahito hologumar otwara niger hekat nimaji na olwa, sing ho nalahiniso ngete. ⁵ Obotie fa hilihe lati da sing ho natianya niho sing, ''Nanyuo te ihwanati, ilahati te nahito ho logumar?'' ⁶ Otianye fa sing niho ehule ati toho iramahi Yesu sing, lati ho na hisiarahiso sing ofwe nehoi hosing. ⁷ Iyene fa ehule lohejehi harik nahito hologumar ho na hibireriso nab8ngoji ho sing nihongete ojo ongida Yesu oyir. ⁸ Nalohoi ho lati ho na hitasarahiso natol bongoji ho sing nihoi, cebu hilihe itasarahini nabene huja fa ingungutuni sing to maji ohigiama ho sing. ⁹ Ehule fa ofwe nihatemeni hongete cebu ehule ijifi ho na higworita, ''Hossana! Tojwaha ngete la olotu to na fure ho Lohobu. ¹⁰ Tojwaha nalotiniso hongete nahang ho Monye hojie Davide! Hossana na obwon nihide!'' ¹¹ Tiye Yesu ho na hiruhiso nihotwa ho Yerusalem ho naloten nihotwa ho tepulu ho natialan hilur niho nareji fad. Tahanya, epalaru noholong, ngete ho naloten toho Beteni hehule tomon ho harik. ¹² Ene holong ho hubany, lofa nayitini sing to Beteni, anya fa nahure ngete. ¹³ Nitialari nololamaje nangaboli lofa obwonitere ho na bene, ngete ho naloten tialan kuya hatum ngete ihorihisk ibwo nahangeri da, lofa nalotu ngete da, abu ngete ohorihi ibwo nasinge nyuo hati nabene, ohirihi obu fa ora aholong hongijian ho kiana. ¹⁴ Ngete ho natianya nihite, ''Obu lobo onyia nahangeri hoji hari.'' Etiyiri fa nolohejehi hongete. ¹⁵ Sing ho nafwoniso toho Yerusalem, ho na hiruhiso nitempulu ho nachifon rohito niger lahitenyiangak ho na hinyiangak to hotea ho tempulu. Ngete ho na hibiel namaji ho lati hula iduduhe narobia ho nahitwongita he hule itenyiange newoloji. ¹⁶ Obu fa ngete ohwarahi lobo oting ibwo nasinge to nohotwa ho tempulu ojo ongida itenyiangi. ¹⁷ Itejien fa ngete sing jiman, ''Obu ngete igierehino, 'Ongele hadi nahaji ho ne ahaji holomojere noho nahangite fad'? Nyuo hati ihwanatate ngete ahunom harujutok.'' ¹⁸ Nolohitwahaji ho padari ho lahegierok hobuhi ho na hitiyiriniso nasinge lofa ojo ngete, sing ho na tahito nehoi ho hifadajiere ngete. Obayangi fa sing ngete tananyuo ipanyie fa ene nalohoi niho nasinge na itejiana ngete. ¹⁹ Lofa nalotu natari, sing ho nahidahiso nahang. ²⁰ Lo fa sing odahe tonehubanyi, sing ho naheriniso nangaboli na ongi na oyohojoriso tomori hongete. ²¹ Petur ho na hihuyaniso jiman, ''Rabbi, totiala! Nangaboli lofa ongi ifichioyo ji ayohojoyo.'' ²² Yesu ho na hitarangahiso sing, ''Tobwanata ho nahiruk niho Najyok. ²³ Tarihe ajo ne niho te ojo ngete la otenyito niho anya denge, 'Todete iyare nakwan hoji toho nihari,' nara ngete ogogio nitaji hongete nyuo hati iruk ojo nasinge na ajo ngete many idwong hadi, ngete nasinge na otum hadi Najyok igem. ²⁴ Inaha ajo ne niho te: Nareji fad huja imojetete cebu ifiasete, iruhoto ojo ifwotusu te ngete, cebu ora ano hote. ²⁵ Lomo nebotia iji imojo cebu, ongida iji ibalahi nasinge noroho na ihon iji niho lobo, ojo ongida Monye hoji la obwon nihide cebu ohibalahi iji niho nepalita hoji." ²⁶ . ²⁷ Sing fa ho na fwoniso toho Yerusalem hari. Ohorihi fa Yesu odaha nihotwa he tempulu, Lapadiri hula ilanyi, lahegierok hobuhi, ho lolohitaha ho nafwoniso niho ngete. ²⁸ Sing ho na jiman niho ngete, ''Tani hiram iji igiamari hunya reji, cebu ngai lohisarahi iji nahiram nihigiamari sing?'' ²⁹ Yesu ho najiman niho sing, ''Ahifi bane ite nahifiasu abito. Iramahisi ne cebu ahiramahi ba ne ite ni hiram ne egiamari hunya reji. ³⁰ Nabatisimo ho Yuwane, ora fa ngete tohide kuya niho lati? Itarangata ne.'' ³¹ Sing ho natianya nikwanite ho sing risa ojimi, "Nahi ojo, 'Tohide,' ngete ba ajo, 'nanyuo hati fete ibe iruhoto ngete?' ³² Nyuo hati nahijo jie, 'Totwani,'... .''Obayangi fa sing lati, eruhi fa lati ojo ora fa Yuwane aheramahitani ho hiramita ho Najyok. ³³ Tiye sing ho na hitarang Yesu jiman, ''obu jie ohijien.'' Tiye Yesu ho najiman niho sing, "Habu otum ne ahiramahi ite ojo tani hiram anya ligiamari ne hunya reji.''