¹ Tiye fa Yesu ho na chifon hitejiana sing tonohorwong ho tianya. Ngete ho najiman, ''Inujahi fa latwani namana ho kiani, ihwanahi itulurohi nekwa nihongete, cebu obok newure noho nemotit ho hanger. Ngete ho nahifak namaji nolohitiesere ho nahisiarahiso nakiana niho lahefok ho balu nihitobolorere nakiana. Tiye ngete ho naloten nimisok. ² Nitirahinere ho holong, ngete hona sulahiso fa lahegiamani nikiani na ongi nihifwotinere niho sing nahanger hokiani tochiel. ³ Nyuo hati sing ho nahiyaru fa ngete, olumi, ho na rohoriso ngete obe ibwo nasinge. ⁴ Hari ngete ho na sulahiso niho sing lobo lahegiamani, ho sing ho nahiriafiniso elerok nihou ho nadwanyan sing la isiria. ⁵ Ngete ho nasuluniso lobo, sing ho nabeheriso. Cebu itegemi fa sing hilihe na okialare tene hoi, lumon hilihe ho cebu ifadari hilihe. ⁶ Hobwonitere fa ngete latwani abito nisulajiere, lahito ho litaji. Ora fa ngete nolohichungi la osulaya ngete niho sing. Ngete ho najiman, ''Obayangi hadi sing iha ne.'' ⁷ Nyuo hati lahenujak ho kiana ho natianya nikwanite hosing abito abito, ''Ngete ale lolunyohileng. Ifwosu, efadasi ngete, ho hunya najungo horeji arahi anohojie.'' ⁸ Sing ho nagiataru ngete, ifadari, ho na hibireriso ngete tiye to mana. ⁹ Inaha, nanyuo ba lamonye ho mana ho kiana ihon? Olotu ba ngete ho na hitetetiangariso nakiana huja inujahini cebu isiarahi ngete namana niho hilihe. ¹⁰ Hobe te ikianata anya iwaraga? 'Namorwo lofa idayari lahabiak, ihuhumi fa ngete akodok ho morwo. ¹¹ Olotu fa anya niho Lohobu, cebu ongida ngete bebe niho nyiehite hojie."' ¹² Ateli fa sing nitwararari yesu, nyuo hati obayangi fa sing nalohoi ho lati, ajieni fa sing ojo ateny fa ngete anya horwong ho tianya noroho nihosing. Tiye sing hona chwarahiso ngete ho na fwoten tiye. ¹³ Tiye sing ho nasulahiso hilihe lati ho Farise ho lati ho Herode nitenefinere ngete to nahiramita. ¹⁴ Lofa nafwoni sing, ojimi fa sing niho ngete, "Lahetejianani, ohijien ijie ojo obu ji igigilo nihiramita ho lobo, obe cebu obwon ho nahisiso ho lati. Itejiana ji natarihe nehoi ho Najyok. Otirahi so ngete nidumari namochoro niho Saeser kuya obu? Ikie ohidum ijie kuya obu?'' ¹⁵ Nyuo hati ojien fa Yesu nagesemi ho jianan hosing jiman niho sing, ''Nanyuo te itiamati ne? Iyenete niho ne narobiati ojo ongida ne atiala niho ngete.'' ¹⁶ Sing ho nahiyeno abito niho Yesu. Ngete ho natianaya niho sing, ''Noho ngai anya kialare ho nafure?'' Sing ho na jiman, ''Noho Saeser.'' ¹⁷ Yesu ho najiman, ''Isiarahisi niho Saeser nasinge hongete, cebu niho Najyok nasinge huja orahi anoho ngete.'' Sing ho na hingurunya toho nihongete. ¹⁸ Tiye lati hula idayari Yesu, hula ojimi ojo obe nahibuhuniso, ho nafwoniso niho ngete. Sing ho na hifiasu ngete, jiman, ¹⁹ ''Lahetejianani, igierehi fa Muse niho jie ojo, 'naye hilasi holobo irwatahi ngurunangete nahalu, nyuo hati nahito obe, ongida latwani iyaru nguru hilasi, omanye hongete cebu ho lemusak ho hilasi hongete.' ²⁰ Orahi fa lahilasira metaharik; nolokang hona hiyaru nangorite cebu ngete honayeyi, obengi nemusak. Tiye ²¹ Noloboi honajungon ngete aye cebu, obengi musak, honolodai tehene. ²² Ehule metaharik iruatahini obengi musak. Nilohijungi hosing fad, ²³ Nangorite honayeyi. Nihibuhunere, lofa nebuhuni sing hari, nguru ngai ba anya ngorite? Noho ehule fad hilasira metaharik fa lobwoniterete ngete angorite.'' ²⁴ Yesu ho najiman, "Obe ngete anya nahiram na ipalajieretete, tananyuo obu te ijianata nahiram hewaraga kuya nahifirang ho Najyok? ²⁵ Lomo nebuhuni sing to lahayeyi, obu sing ofwoni iyama kuya iteyiama, nyuo hati arahi sing to ho anjeloji ho nihide. ²⁶ Nyuo hati nihigigilere to lahayeyak hula ebuhuni, obu te ikenusu Tobuk ho Muse, nimaji ohikiana nahiram ho timere, tatali fa Najyok otianya nihongete cebu ojo, ²⁷ 'Obu ngete ora ajyok ho Abramo ho noho Isako ho noho Yakobo? Obu ngete ora Najyok hayeyak, nyuo hati noho lahesujok. Opalayeji kai.'' ²⁸ Lahegiereni lobo fa ho nalotiniso itiyira neforita hosing; ngete ho natialan ojo etarang fa Yesu sing angida. Ngete hona hifi Yesu, ''Nechihit ani na longida fad bebe?" ²⁹ Yesu hona hitarang, ''Na ongida bebe ngete, nahitiyira, Israel, Hobu hojie Najyok, Hobu ngete abito. ³⁰ Ongida iji ikwama Hobu Najyok hoji tona taji hoji fad, honolohailong hoji fad, hone gigil hoji, hona hifirang hoji.' ³¹ Nechihit nohoharik ngete anya ojo, 'Ongida iji ikwama nati huja iliahaji hoji toho nakwan hoji.' Obe ibwo nechihit na olangaya ilany hunya.'' ³² Lahegiereni ho na jiman, ''Ongida, Lahetejianani! Eteny ji ojo ora Najyok abito, ijo cebu ojo obe lobo ngete ce ijia. ³³ Nikwamari ngete to nataji fad ho nahitiyira fad cebu ho nahifirang fad, cebu nikwamari lobo latwani la omanya niger hoji toho nakwan hoji, adobu ngete ilany fad naswaha heyalita ho nanareji huja ilahini.'' ³⁴ Lofa najien Yesu ojo etarang ngete agianyan, ngete ho na jiman niho ngete, ''Obu iji ilama tohang ho Najyok.'' Nihalu hongete, abu fa lobo otir hifi Yesu ibwo nahifiasu hari. ³⁵ Yesu ho na higaminiso, ohorihi fa ngete itejiana nihotwa ho tempulu; ngete ho najiman, ''Tatali ngete ojo lahegierok hobuhi lotianye ojo Kristo ngete lahito ho Davide? ³⁶ Davide to nakwan hongete, nilohailong na onyila, jiman, 'Hobu lojo niho hobu ho ne, itwonge niteten hehene ho ne, many hati elanyu ne lamerok hoji.' ³⁷ Davide tonakwan hongete longele ngete, Hobu,' hati tatali hatum Kristo ora ahito ho Davide?'' Itiyire fa nalohoi niho ngete to nakwama. ³⁸ Niho anya hitejiana ojo Yesu, ''Tojianaha nahiram ho lahegierok hobuhi, sing hula okwame dahari nohofi huja isagak ³⁹ cebu owahi nahihata na ifwotini sing to masik ho lohitenyangari cebu owari sing nabwonitere nahitwongita ho hobu di Nilomojere ho na namasik ho hobwok na onyeserete. ⁴⁰ Sing cebu ohoholise nahayi hongorwo haferok, omoje cebu namojio na ohadoroyo ongida lati oheri. Omojini hadi hule ati nahitegiama.'' ⁴¹ Tiye Yesu ho na hitwongo nifok hilawo nikorton heyalita nihotwa ho tempulu; otiala fa ngete lati ohorihi sing ipirehite narobia hosing nihotwa hokorton. Nalohoi h abarak fa ibirehini narobia bebe. ⁴² Tiye nguru hafereni na oparita ho nalotiniso hipirehiso narobia harik huja orahi abiliata, hula omutari dei. ⁴³ Ngete ho na ngeleniso nolohejehi hongete jiman nihosing, ''Tarihe ajone nihote, anya nguruhafereni oparita bebe ipirehi noho ilany fad ehue hosing huja isesiahalahini sing nikorton heyalita. ⁴⁴ Sing fad isiarahini nareji huja achwarahini sing. Hati anya nguru hafereni, tomaji hoparita hongete, ihuanahi narobia fad huja odahari ngete.''