¹ Sing ho nafwoniso niho ene ngati ho dial, nimaji ho hang ho Gerasene. ² Lofa nalotiniso Yesu to tigol, latwani ho mininga ho nalotiniso niho ngete telume. ³ Amany fa ele twani nihosiereji. Obe lobo otum iyalaya ngete hari, dobu tananyoro. ⁴ Otoritito fa ngete noholongi fad tonayoro na ora abiliata. Ngete hona futon ene nyororo many isaraya ho cebu ehue nyororoji hongete hona ngungute. Obe lobo fa obwon honahifirang nihitihitere ngete. ⁵ Niho naharie ho na farani fad nihotwa ho hosiereji ho nidengetio, ngete ho nayoo ho na nguton nakoni koni hongete to namori huja irami. ⁶ Lofa natel ngete Yesu to nololamaje, ngete ho nahinam niho ngete ho narugungoriso nihatemeni hongete. ⁷ Ngete ho nayoo to namurut na igwor, ''Nanyuo ne hatum ehon niho ji, Yesu, iha Najyok la ilany? Elelia ne nihoji to Najyok nakwan hongete, he behoyo ne.'' ⁸ Toho otenyittito fa ngete nihongete, ''Kwo niho latwani, iji nolohailong nebot.'' ⁹ Ngete honahifi lamonye, ''Ngai nafure hoji?'' Ngete ho na hitarang , ''Nafure ho ne Lejion, ohilwa ijie.'' ¹⁰ Ngete ho nahilelia niho ngete inyenyahat ojo ongida obu orohori sing tene hang. ¹¹ Tinya obwoni fa hinihe nalohoi hebworohi onyase nitodo ho denge lalokude, ¹² ho sing ho nahilelia niho ngete, jiman, ''Tosuleye ijie nihotwa hebworohi; ikie ijie ohiruhi niho sing.'' ¹³ Tiye ngete ho nalahiso sing; nolohailongi huja iboti ho nafwoniso niger ho nahiruhiso niho ehwe bworohi, sing ho na bunyohiso nafotiri hene denge la lokude nihotwa ho dial ho hari, cebu otum nalif harik nebworohi huja ipulere nihotwa ho hari. ¹⁴ Tiye ehule itanyase nebworohi ho nahinamita nihiramahinere nasinge lofa idwong nihotwa ho hang ho nihotwa ho hang na obwon niwaha, tiye lati fa ho nafwoten tiala nasinge lofa idwong. 5Tiye sing ho nafwoniso niho Yesu sing ho naheriniso latwani la obwon ho najohi, lofa obwonitere Lejion, itwongo da, ijefito cebu obwon na owat nohou, obayangi fa sing. ¹⁶ Ehule ateli nasinge na idwong niho latwani hojohi ho nahiramahiso sing nafotiri ho hiram, cebu iramahini sing nahiram hebworohi. ¹⁷ Tiye sing ho nachifon hilelia niho ngete ojo ongida idahi nahang ho sing. ¹⁸ Lofa neruhiso ngete nihotwa ho tigol, latwani hojohi ho nahilelia niho ngete ojo ongida otum ohibwon ho yesu. 9Nyuo hati obu fa Yesu iruk, nyuo hati ojo niho ngete, ''Ilo nihaji hoji ho niho lati hoji iramahi sing nanyuo Lohobu ehon niho ji, cebu tatali ngete itetelehi namehino niho ji.'' ²⁰ Ngete ho naloten tiye ho nachifon hiramahita nareji huja itabayange huja egem Yesu niho ngete niho Dekapolis, obayangahini fa lati fad. ²² Tiye lobo niho lolohitwaha ho Lomojere, la onya Jairus, ho nalotiniso, lofa natelu ngete Yesu, ngete ho nahuyari nihejiaha hongete. ²³ Ngete ho na hilelia inyenyahat, jiman, ''Anyiha nekude ho ne nayeyi. Ehilelia ne iji, kwo totirehi nehes hoji nihongete ongida jaba isu.'' ²⁴ Tiye ngete ho nafwoten hongete, nalohoi ho lati na obolo bebe ho nahijifaru ngete suduhahino hilur ngete. ²⁵ Tinya ibwo nangorite na itihitita nohoto hongete nengaji tomon ho harik. ²⁶ Amehino fa ngete bebe nihes ho lahadwanyak cebu atuhoyo ngete nareji fad huja obwonitere ngete. Ohorihi obu fa olwahi ngete tebwo nasinge, nyuo hati atum ngete ongida ho nanorohojihiso bebe. ²⁷ Lofa netiyiru ngete nahiram ho Yesu, ngete ho nalotiniso tenehalu hongete nihiji ho lohoi ho natiron nolobutur hongete. ²⁸ Toho ojo ngete, "Hatir ne nabongoji hongete, hadwanyino ne.'' ²⁹ Lofa natir ngete Yesu, nawo hoto ho nabotia, ngete ho nahimang to nakwan hongete ho najianan ojo adwanyino ngete niho namehino. ³⁰ Yesu tiye ho nahobiniso nikwan hongete ojo alo nahifirang hongete. Ngete ho nahibielo niho ehule ati ho nahifiasu, ''Ngai lotir nabongoji ho ne?'' ³¹ Nolohejehi hongete ho najiman niho ngete, ''Etel ji anya ilulung ohitik iji, cebu iji ijio, ''Ngai lohitir ne?'' ³² Nyuo hati Yesu ho na hilur tialan ngai lihon ngete. ³³ Nangorite, najianan ojo nanyuo lidwong niho ngete, ho nabayangi cebu ihihira kwaskwas. Ngete ho na lotiniso huyari nifok nihatemeni hongete ho nahiramahiso ngete natarihe ho hiram fad. ³⁴ Ngete ho najiman niho ene twani, ''Ngara ne, nahiruk hoji lohitingidar iji. Ilo to na yomo cebu tongidara todiaha hoji.'' ³⁵ Ngete fa ho tianya , hilihe lati ho nafwoniso niho lolohitwahaji ho Lomojere, ojimi " Aye ngara iji. Nanyuo ha hetegiame lahetejianani hari?'' ³⁶ Nyuo hati lo fa natiyir Yesu nanyuo sing ojimi, ngete ho na jiman niho lolohitwahaji ho Lomojere, ''Hebayangi.Iruho." ³⁷ ''Obu ngete isiarahi lobo inyamaru ngete, mayak Petur, Yakobo, ho Yuwane, hilasi ho Yakobo. ³⁸ Sing ho na fwoniso nihaji ho lolohitwahaji ho lomojere ngete ho nateliniso lati igogworita bebe; oye fa sing ingunyute na obe nolohichungi. ³⁹ Lofa neruhi ngete nihaji, ngete ho najiman niho sing, ''Nanyuo te ilongojitati o nanyuote iyete? Obu nahito oye, nyuo hati ogeto,'' ⁴⁰ Sing ho nakenita nihongete. Nyuo hati ngete ho narohoriso sing fad niloke, ho nahiyaru monye ho hito ho hoto hito hehule obwoni hongete, ho naloten nimaji lo fa obwonitere nahito. ⁴¹ Ngete hona hiyaru nehene hohito ho na jiman nihongete, Talitha Koum, ''Na ongele ojo nahito na omuta, ajo ne niho ji, todete.'' ⁴² Tiye kerem nahito ho nadeto ho nadaha(obwonitere fa ngete ho nengaji tomon ho hatik). cebu tiye obwoni fa sing ho nabayangi na imwoch. ⁴³ Iririhahi fa ngete sing ojo ongida lo obu ojien anya hiram. Cebu ngete fa ho nahiramahiso sing ojo ongida isiarahini ngete ibwo nanyasu.