1 Hari ngete hona chifon hitejiana niger hohari, ho nelulung nobolo hona hifurohino niger hongete, Ngete hona ngirehiso nihotua hotigol lofa obwon nihari, ho ngete nahituongo nihongete. Ene nati hotuaniti obwon teger nitodo holotifor. 2 Ngete hona hitejien sing nalohoi horeji tonohoruongite hetenyita, hona nihitejiana hongete, ngete anya nasinge na ojo ngete niho sing, 3 ''Itiyirati, alo laharemeni niwaha yihiso nahinyiemo hongete. 4 Lofa nayihi ngete, nahinyiemo hinihe hona ruruhiso nihoi, nakeny hona foniso tuhon sing. 5 Hinihe hona ruruhiso nimaji na ora amori, na obe nasingati obolo bebe. Tiye tiye sing hona chifon bujan, nyuo obwoni fasing nimaji na otanga. 6 Hati lofa natulu noholong, sing hona suaharu, nyuo tonabiangan fa homori hosing, sing fa hoyohojoriso. 7 Nahinyiemo hinihe hona dohiso nikwa. Ehue kwa hona bolori chuho sing, ho cebu abufa sing obuji hari. 8 Nahinyiemo hinihe ohuyari nihotua homodie na ongida ongi cebu ohorhi ngete oboboloro funahita, ho cebu hinihe iyiene nenyiahita nejiek hutik toho obwoniterete, hinihe cebu nejiek ile, ho hinihe nejiek tom.'' 9 Tiye ngete hona tianya, ''Ngete la obwonitere najohe noho itiyira, ikie ngete itiyira! 10 Lofa nabwon yesu hama, ehule onyihaji niho ngete ho ehule tomon hoharik hona hifi ngete nohorwongite hetenyita. 11 Ngete hona jiman niho sing, '' Esiarahini niho iji nahiram na ogol tanajianan noho hang hojyok. Niho ehule teger nareji fad tonohorwongite hohiramita, 12 ojo ongida lomo nariri sing, ee iriri sing, nyuo hati obu oteli, ojo lomo netiyiri sing, ee itiyiri sing, hati obu ojieni, kuya otum sing ibieli otum Najyok ibalahi sing.'' 13 Tiye ngete hona jiman niho sing, ''Obe ite ijianata anya horwong hotianya? Tatali hadi ite ijianata ehue nohorwongite hetenyita fad? 14 Laharemeni la oyia nahinyiemo ngete lahayiani hotianya. 15 Sing huja ohuyarite ningati hehoi, niho namaji lofa oyihinerete natianya, hati lomo netiyiri sing ngete, Sitan tiye tiye alotu hiyaru nahiram lofa ayihino niho sing. 16 Sing huja oyihini nimaji na ora amori, ngai, lomo netiyiri sing nahiram, tiye tiye ifwotusu ngete tonakwama. 17 Obengiterete sing namori nikwanite ho sing, hati todiha noho holong kai. Tiye olotinita naniama kuya nahitegiama olotu tanya hiram, ho tiye tiye sing atatarangite. 18 Ehwe hinihe orahi ahuja oyihine nihiji hekwa. Itiyiri sing nahiram, 19 nyuo hati lahenefitok hotodo, sing lahagesemok habarak, cebu nahimana ho reji hinihe to iruhi nihotua ongut nahiram, obe cebu obuji nangamari. 20 Tiye ehwe ayihini fa nimodie na ongida sing ehue huja itiyire nahiram ifwotini cebu, ongiji , nehejek hutuk, nehejek ile, kuya nahinyahita namiya abito niho hulo fa inujahini.'' 21 Yesu hona tianya niho sing, ''Eyienetete nalomo nihotua hohaji ongida ihwanahisi ngete nifotir hogufa, kuya nifotir hegegetit? Iyienete ngete inyi hotua ho cebu ihuanahisi ngete nilobotiari holomo. 22 Toho obe ibwo na singe idimaru na obu otum ojieni, ho cebu obe ibwon na singe omonino ojo obu olotu leyeji. 23 Nara lobo lobwonitere hetiyira, ikie ngete itiyir!'' 24 Ngete hona jiman niho sing, Ihuanahisi natajio niho nasing na itiyiratete, toho natiama na itiamaritite, ohitemi mohite ite, ho cebu ofunahini hadi niho ite. 25 Nyuo la obwonitere, toho niho ngete isiarahini hadi huja olue, la obengitere, iyare hadi tiye hongete adobu nasinge na obwonitere ngete.'' 26 Ojo cebu fa ngete ojo, ''Nahang hojyok okialare toho latuani la oyia nahinyiemo hongete nifok. 27 Ogetito ngete tonaharie okenyinita tona fangan, obuji nahinyiemo obolori, adobu obu ngete ojien tatali. 28 Nafok itingija nangamang: soni naturuhak, tiye hati nahijiok, nahabito nakanati,tiye nahijiok, tiye nangijati nikanati. 29 Lomo nado ene nangamari tiye tiye ngete eyaru namejeles, nyuo ojo alotu noholong hodengo.'' 30 Hari ngete hona jiman, ''Toho tatali ijie ahitekialarahi nahang hojyok, kuya ani horwong hotianya ijie hahitum ohigiamari nihititimari ngete? 31 Okialare toho nahinyiemoti obu kerem kerem, lomo nayihino, ora ahamutarani hohinyiemoti nihehue fad, 32 Hati, lomo nahino, obolo olotu ilany ihue namanata fad, ho cebu osad bebe, ojo ongida nakeny ho nihide ifahe nahayi ho sing nirifi hongete.'' 33 Hono horwongite hetenyita toho anya otiany fa nahiram niho sing, toho bebe ajieni fa sing angida, 34 ho cebu obu fangete otianya niho sing obe nohorwong hohiram. Hati lofa nabwon ngete hama, ngete hona hititimahiso nareji fad niho nolohejehi hongete. 35 Nihene holong , lofa nalotu natari, ngete hona jiman niho sing, ''Ahifwo todi tangati. '' 36 Sing tiye hona hirwatahiso ene nelulung, hiyatuo Yesu ho sing, ohirihi ngete fa naterehino nitigol. Obwoni fa cebu hinihe natigoloi hongete. 37 Ho cebu nolobwangi na igworita tutu hona deto cebu ene nahuta neburahino nihotua hotigol ojo ahorihi nefut. 38 Hati Yesu tonakwan hongete obwon nihiram na ogol, hona geto nitodo hobongo. Sing hona hitedet ngete , jiman, ''Hatejianani, obu iji igigilo ojo ahiwak ijie yeyi?'' 39 Ngete honadeto, hibiel nolobwangi jiman niho nahari, ''Ikie nayomo! Iwasihi.'' Tiye nolobwangi hona jiman riif, cebu abwon fa nariajan nemwoch. 40 Tiye ngete honatianya niho sing, Nanyuo ite ibayangata? Hobe cie ite ibwanata honahiruk? 41 Ofut fa nabayangi niho sing honatianya abito abito, ''Ngai hati ale, nyuo adobu nolobwangi hona hohari orie niho ngete?''