¹ Tenehubanyi berien, nolohitwaha ho padiri ho nahifurohino harabito ho lohiteaha ho lahegierok hobuhi ho nalati nalohoi loho Yahud lahangotok hiramita. Tiye sing ho nakudan Yesu ho na hiyaru ngete tiye. Sing ho nahisiarahiso ngete niho Pilato. ² Pilato ho nahifi ngete, ''Iji ale Lohobu ho Yahud?'' Ngete ho nahitarang ngete, ''Toho ijo ji.'' ³ Ikianahite fa lahabolorok ho padiri nahiruhi hetenyita niho Yesu. ⁴ Pilato hari ho nahifi ngete, ''Obu iji itaranga? Totiale baya ba nahiramita huja iyeni sing niho ji!" ⁵ Nyuo hati obu fa Yesu owak itaranga Pilato, ho ene itabayangahi fa ngete. ⁶ Tahanya fa niholong heyiom, Owar mo Pilato isiarahita niho sing lahatwarani abito, lahatwarani la ifini sing. ⁷ Obwon da nilotwarari ho lolomiyanga, nihiji ho lahefadak hula otwarahini to nahifiri ho sing nitimere fa latwani la onyia Barabbas. ⁸ Nalohoi ho lati ho na fwoniso niho Pilato chifon hifiasu ngete ojo ongida igem nihosing toho lofa igem ngete berien. ⁹ Pilato ho na hitarang sing jiman, ''Iwahatate ne ojo ongida etalahahi nihote Lohobu ho Yahud?'' ¹⁰ Ojien fa ngete ojo nahiram ho hayini lisiarahi lolohitwa ho padiri lisiarahini Yesu niho ngete. ¹¹ Nyuo hati nolohitwaha ho padiri ho nahisusu nalohoi ho lati ojo ongida oye ojo ikie olahahini Barabbas nilahinere. ¹² Pilato ho na hitadangahiso sing hari jiman, ''Nanyuo hati bane ihon niho Lohobu ho Jews?'' ¹³ Sing ho nahigworita hari, "Togurohi ngete!'' ¹⁴ Pilato ho najiman niho sing, ''Nyuo singe ngete ipalaya?'' Nyuo hati sing ho na higworita bebe bebe, ''Togurohi ngete.'' ¹⁵ Owak fa Pilato itokwam nalohoi, tiye ngete ho nahitalahahiso Barabbas niho sing. Ngete ho na siton lumon Yesu ngete ho nahisiarahiso ngete ogurohini. ¹⁶ Lasegere hona hiyaru ngete nigul holokiho (namaji ho gala fad), cebu sing ho nangialan harabito ehule lamorit ho segere. Sing ho na hihwanahiso ngete tona bongo na opwara niho Yesu, ho cebu ¹⁷ sing hona hirii negita hekwa nihou hongete. ¹⁸ Sing ho nachifon iwata nehes niho ngete jiman, Hail,Hobu ho Yahud!'' ¹⁹ Sing ho naduhan nohou hongete tonachol cebu ho namita niho ngete. Sing ho narugungi nihatemeni hongete ifik nerati toholomo omoje sing. ²⁰ Lofa nabehiri sing ngete, sing hona hiduhariso nabongo na opuaraya nihongete hona hihwanahiso ene nabongo hongete, ho natingoro ngete nilogurohinere. ²¹ Sing ho narosohiso lobo latwani oringita tenehoi hongete la olotu to hang ho Sirene ojo ongida oting nahite na ikwala ho Yesu, ele twani onya fa Simone loho Sirene monye ho Alexandara ho Rufo. ²² Lasegere hona hiyeno Yesu niho namaji fa na ojimi Golgotha (ngete na ibieli ojo, ''namaji hohoyi''). ²³ Sing ho nahisiarahiso ngete nabalu na iharuto ho nelata ho kiani, nyuo hati obu fa ngete omat. ²⁴ Sing ho nagurohiso ngete cebu ho nahihohor nabongo hongete nihibibirehiso nechirita ho bongo hongete nijianare baya lasegere otum iyaru. ²⁵ Ora nisa hohutik lofa ogurohinerete sing ngete. ²⁶ Nihitelejere sing hona higierehiso nahiruhita hepalita ohidayajiere ngete, ''Lohobu ho Yahud.'' ²⁷ Ogurohini fa sing ngete holaharujutok harik, abito obwon niteten hongete abito cebu obwon nihajiong ²⁸ hongete. ²⁹ Ehule fa oringari hereye ho napacha ngete, inininge nohosi hosing jiman, ''Aha! Iji la fa itasaraya natempulu cebu ibiehi hari niho noholongi hutik, ³⁰ italahu nakwan hoji cebu ingiru nahite na ikwala!'' ³² Ikie Kristo, lohobu ho Isarayil, ongiru tahanya to nahite na ikwala, ojo ongida otum ijie ohitel cebu ohiruk,'' cebu hulofa ogurohini hongete ho nakenitere ngete. ³³ Niho nasaji ile, nedimele hona lotiniso nafok fad many nasaji metongon. ³⁴ Niho nasaji metongon Yesu ho nahigworita to na murut na okwat, ''Eloi, Eloi, lama sabachthani?'' ngete na ibieli ojo, Najyok ho ne, Najyok ho ne, nanyuo ji ichwarahi ne?'' ³⁵ Ehule hilihe obotie fa tiye hona hitiyir nahiramita hongete jiman, Iririati, ongeleso ngete Elijah.'' ³⁶ Lobo honarianya fa, ihuanahi nabalu nijiak, nikolobit, hona hisiarahiso ngete omat. Ele tuani hona jiman, ''Ahiarata ngete nara Elijah lolotu hitingiriniso ngete nifok.'' ³⁷ Tiye Yesu hona yio tona murut na okwat hona yeyi. ³⁸ Achira fa nahimuhi honihaji many tohou many nihfotiri. ³⁹ Lofa natel lolohitwahiji ho segere ho Roma ngete la obotia tanyan to honiho Yesu ojo oye ngete niho anya ihoi, ngete ho najiman, ''Tarihe ora fatia lamonye ale ahito Hojyok.'' ⁴⁰ Obwoni fa cebu hinihe nangorwo huja iririe lolamaje. Nihiji hosing orahi fa bo, Maria Madalina, Maria (hoto Yakobo nolokude ho Joses), ho Salome. ⁴¹ Lofa hobwon ngete Galileya sing hona hijif ngete hiluahari cebu ngete. Nalohoi hongorwo hinihe cebu fa hona finiso hongete many Yerusalem. ⁴² Lofa nalotu natari, tananyuo ora fa aholong ohihuhumahino, ngete, noholong hobe nawiyiri, ⁴³ Yosefo noho Arimatea ho na lotiniso da. Ora fa ngete alomema la obayangi nimaji ho lokiho, ngete lofa itilasu nihang ho Najyok. Ngete ho naloten tonakwan hongete niho Pilato hifi nihiram ho kwan ho Yesu. ⁴⁴ Pilato hona bayangahiso fa ojo aye Yesu; ngete ho na ngeleniso nolohitwahiji ho Roma ho nahifi ngete nara fa Yesu loye. ⁴⁵ Lofa najien Pilato niho nolohitwahiji ho Romano ojo aye Yesu, ngete hona hisiarahiso nakwan hongete hiho Yosefo. ⁴⁶ Enyangu fa Yosefo nabongo noho nenuhit. Ngete ho na hitingiriniso Yesu to hite na ikwala, ho nabuburahiso ngete ninuhit hobongo, ho na nuhahiso ngete nilume lofa obohini tomorwo. Tiye ngete hona hitobobororiso namorwo fohutuk helume. ⁴⁷ Maria Madalina ho Maria hoto Yoses ho naheriniso fa namaji na onuhahinerete Yesu.