1 Ora fa noholongi harik many hobe nahiyom hoholong lofa oluahari Najyok fafayirok ho Isarayil to niama honeyiom hebune. Lahabolorok ho padari hola hegierok hobuhi fa ho nahigigilo ojo tatali sing hahitum ohinef Yesu cebu ohibehoyo ngete. 2 Toho ojimiterete fa sing, ''Obu to noholong ho nyasu, ojo ongida nahigworita obe odeto niho lati.'' 3 Ohorihi fa Yesu obwon Beteni nihaji ho Simone latwani ho chalulu, ohorihi fa ngete ibata nitodo ho lonyesere ho ngirang, nangorite ho nalotiniso niho ngete obwonitere namorwo nabule olajaha ahari, na onyila tolohichiahi. Ngete ho nabunyuon ene morwo bule olajaha ahri hona hijuhohiso nihou hongete. 4 Nyuo hati obwon fa ho hilihe nihosing hula ilongojite. Sing ho natianya nikwanite hosing jiman, ''Nanyuo nahiram hebalajiere anya? 5 Hatum fa anya ilata ogurum itenyiangari ilany namiya hutik dennari, cebu isiarahini niho lahaparitak.'' Tiye sing ho na hingiarajahino ngete. 6 Nyuo hati Yesu ho najiman, ''Idahisi ngete hama. Nanyuo te itegiamati ngete? Ehon negete nasinge na ongida niho ne. 7 Ibwoniterete lahaparitak nihote, cebu lomo newahatate itumata te igiamata na ongida niho sing, nyuo hati obu be te ibwoniterete ne noholongi fad. 8 Egem ba ngete nasinge na otum ngete ihon: Ajok fa ngete nakwan ho ne niholong honuha. 9 Tarihe ajo ne niho ite, namaji na itotoserete nefanjelio na odwa niho nafok fad, nasinge negem anya ngorite many otianyariti, nihitokwatari ngete.'' 10 Tiye Yuda Iskariot, ngete loho tomon ho harik, ho naloten niho lolohitwaha ho padari ojo ongida isiarahi ngete niho sing. 11 Lofa netiyiri lolohitwaha ho padari, sing ho nakwama bebe cebu ho nangatan fa hisiarahiso ngete narobia. Ngete ho na chifon ihiara ibwo nawatan hehoi ojo ongida isiarahinerete ngete niho sing. 12 Nilohichiahi hoholong fa noho ebune, ohorihi sing fa iyalahise hobore heyiom, nolohejehi hongete hona jiman, ''Aji iji iwak ijie ohifwo ihuhumahino, otum ite inyiata nanyiasu noho neyiom?'' 13 Osulahiso fa ngete nolohejehi hongete harik jiman niho sing, "Ifwasi nisiti, ho latuani la otingito nakorokoro hohari hadi ohihorihi ite. 14 Ijifata ngete. Namaji na iruhinere ngete nihaji, ijifata ngete itianyati cebu niho monye hene haji, 'Otenyito fa lahetejianani ojo, ''Aji najwan ho ne na alo ne inyesere nanyasu ho lolohejehi hone?"' 15 Ohitelehi ba ngete iji nahaji todenge na onyila hitilasu. Obwana hona hihuhumahino hojie da.'' 16 Nolohejehi hona fwoten tiye toho nisiti. Sing ho nahorihiso fa nareji fad toho lofa ijimitere ngete niho sing, hosing hona hihuhumahiso fa nanyasu na ho hatomonok. 17 Lofa nara atari, ngete ho nalotiniso hehule tomon ho harik. 18 Toho lofa sing ibalangite nifok nilonyesere onyese, Yesu ho najiman, ''Tarihe ajo ne nihote, lobo nihote la ohinyasu ho ne ohitenyagai hadi ne.'' 19 Amehine fa sing fad, cebu sing abito abito ho natianya niho ngete, "Otirahi obu Ne?'' 20 Yesu ho na hitarang jiman niho sing, ''Obwon ngete niho tomon ho harik, ngete la ohipulohita ho ne nebuneji nirany. 21 Toho olojiere hadi lahito ho Jyok to ho nehoi na otianyari newaraga nahiram hongete. Nyuo hati ho nahilongojita niho ele twani niho ngete lofa itafadaya lahito ho Jyok! Asiriu fa ngete obu oyisini.'' 22 Lo fa sing onyese, Yesu ho nahiduhuniso nebune, ho najwahan ngete, ho nabunyuon. Ngete ho nahisiarahiso ngete niho sing jiman, ''Iyariti anya. Ngete anya nakwan hone. 23 ''Ngete fa ho na hiyaru nacholi, ho na jiman awaa, ho na hisiarahiso ngete niho sing, cebu sing ho na matan ngete. 24 Ngete hona jiman niho sing, ''Ngete anya nihoto hone noho na iteriamahi lati honajyok, nohoto na ijuhohini niho nalohoi. 25 Tarihe ajone niho iji, abu hadi ne amat hari anya ho hanger ho kiani many ene holong lomo namat ne nangejuk tohang ho Jyok.'' 26 Lofa neruhe sing nafure, sing hona fwoten tiye toho nidenge ho Olife. 27 Yesu ho najiman niho sing, ''Many ihuyasi ite fad, toho igierehinerete ngete, 'Aduk hadi lahejwahani cebu nehoriangi hadi isarahini.' 28 Nyuo hati nihalu nahitubuhuni ne, alo hadi ne nihatemeni hote toho Galileya.'' 29 Petur ho najiman niho ngete, ''Adobu nara sing fad lohuyari, ne obu ahuya.'' 30 Yesu ho najiman niho ngete, ''Tarihe ajone niho iji, anya harie, many hobe nohohorie ikwohite nohoharik, imon hadi iji ne many nenyiahita hutik.'' 31 Nyuo hati Petur ho najiman, Nara ne lohiye hoji, abu hadi ne amon iji.'' Otenyi fa sing fad nangatan na okialare. 32 Sing hona foniso niho namaji na ongele Jetsemani, cebu Yesu ho natianya niholohejiehi hongete, ''Itwongete inyi ohorihi ne amojo.'' 33 Ngete hona hiyaru fa Petur, Yakobo, ho Yuwane hongete ho nachifon swaharu ho taji ho na niama na oroho bebe. 34 Ngete hona jiman niho sing, ''Orohojiaya nolohailong ho ne, adobu many niloyeyejiere. Totongohisi inyi irira.'' 35 Yesu ho na hingadahiso kai, huyari nifok, ho nanamojo ojo hara dwo otenino, hatum duo ngete aringaya niho anya holong. 36 Ngete hona jiman, ''Abba, Monye, otenine nareji fad nihoji. Iduhe anya koch niho ne. Nyuo hati obu nawahan ho ne, nyuo hati noho iji.'' 37 Ngete ho nayitiniso horihiso sing nagete, ngete ho na jiman niho Petur, Simone, egetoro ji? Hebe ji ikeny nasa abito? 38 Totiale cebu imojo ojo obu iji iruhi nitiama hepalita. Ho Nolohailong tarihe owak, nyuo hati ichuya naburuti.'' 39 Hari ngete hona loten tiye mojo, cebu ngete ho nahigiamari ehwe tenyita okialare. 40 Hari ngete ho na lotiniso horihiso sing ogete, toho nihonyehite hosing fa horahi ajio cebu obu sing ojieni nanyuo sing otianya niho ngete. 41 Ngete ho nalotiniso noho hutik jiman niho sing, ''Hebuhajatate geto cebu iwirasi? Otumohino! Alotu noholong. Iririati! Etenyiangari fatia Lahito hojyok nihes ho lahepalak. 42 Todetete; ahifwo. Iririati, ngete la ohitebeheriso ne anyiha.'' 43 Ohorihi fa ngete ho tianya, Yuda, toho tomon ho harik, ho ho nahisiak, cebu nalohoi ho lati obwoni hongete ho nademio cebu ho neluhi, niho lapadiri la ilany, lahegierok hobuhi, lonolohitwaha. 44 Tahanya eramahi lahebeheni hongete nahiteleyehita, jiman, ''Ngete la ajur ne nahutuk, ngete ele. Ipihusu ngete hona hisiarahiso ngete niho lahara hone. '' 45 Lofa nesiak Judas, tiye tiye ngete ho nalotiniso many niho Yesu jiman, ''Rabbi, ho najuran nahutuk hongete. 6 Tiye sing ho na himorihahiso nehes hosing niho ngete ho nahiafaru ngete. 47 Nyuo hati lobo hosing la obotia tang ho nademi hongete ho nabehon lahegiamani ho lohouti ho padari ho nangutoriso nahijiok hongete niger. 48 Yesu hona jiman nihosing, ''Ifwosu ite teger, ahula irohojiata toho laharujutok, honademio cebu honeluhi ho enefito ne? 49 Lofa habwonita ne tihitik hote cebu ne hetejianata nitempulu, obu fete iniata ne. Nuo hati ihoni fa anaya ojo ongida newaragi imunutahino.'' 50 Ehule fa fad obwoni ho Yesu ho na hirwatahiso ngete ho nahinam tiye. 51 Lobo lahudangani, la ijefito nakire ijia nofa imuhohini niho ngete, ijifito Yesu. Lofa narihite lati ngete 52 ngete hona hiruatahiso nabongo ho kire hon a hinam tiye longature. 53 Sing hona hiyaru Yesu niho lapadari lobolo. Ifure fasing hongete fad da holapadiri hula obolori, lolohitwaha, ho lahegierok hobuhi. 54 Tahanya Petur ho na hijifaru ngete tomaji na oloma kai, olama tomoji ho lapadiri la ilany. Ngete ho nahitwong nihiji ho lahetiak, sing hula osuja nahima. 55 Tinyia fa lahabolorok hopadiri honelulung ho Yahud hula angotok hohiramita fa hona tifitere ho hitelehinere narohoji niho Yesu ojo ongida sing ohibehoyo. Hati obu fasing ohorihini ibwo nehoi. 56 Toho nalohoi fa iyene negesemita hetelehiso horohoji niho ngete, hati ibu fa ene hitelehiso hosing nahiruk. 57 Hilihe obotie ho na hiyeno nagesemi ho hiram nihitorohojari ngete; sing hona jiman, 58 ''Ohitiyir fa ijie ngete ojo, 'Etetengaya hadi ne anya tempulu fa ihuhumi tonehes, cebu niholongi hutik ne hadi efak ibwo na obe ihuhumi tonehes.''' 59 Ohori fa nahitelehiso ho sing obu iruk. 60 Lohouti ho padir ho nabotia nihiji hosing hifiasu Yesu, 'Hobe iji itarang? Nyuo singe fa hu lati ohitetelehini iji?'' 61 Nyuo hati ngete iningo obu itarangu ibwo nasinge. Hari lapadir la ilany ho na hifi fa ngete jiman, "Ira iji Akristo, Lahito la ojohi?'' 62 Yesu hona jiman, Ne ale; cebu itel beji lahito ho Jyok lomo ba netwongo ngete niteten hehene nafirang cebu olotu ho nolopu ho nihide.'' 63 Lapadiri ho na chiran nabongo hongete jiman, "Hohiwak ijie lati hula otiale? 64 Etiyiratite napacha hongete. Nanyuo nahigigilo hote?'' Sing fad fa ho na hitorohoj ngete ojo ongida ngete oye. 65 Hilihe hona chifon mita ngete hona himuk cebu nohomom hongete hona lumo jiman niho ngete, ''Totianye !'' Lahegiamak ho na hiyaru ngete ho na lumo. 66 Ohorihi fa Petur obwon nifotir hodafati holokiho, ibwon nahito hongorite na igiama niho lapadiri hona lotiniso fa niho ngete. 67 Ngete hona hereniso Petur obotia niger hohima suja, ho ngete hona hiriria nyihajahiso niho ngete. Tiye ngete hona jiman, ''Ibwanata 8 fete ho Nazarene, Yesu.'' Nyuo Petur hona mwanan, jiman, "Abu ne ijien kuya jianan nasinge na itianya iji.'' Tiye ngete hona loten niger holofunge holokiho. 69 Nyuo hati enegiamani hopadir toda hona teliniso ngete jiman hari niho ehule obotie fa da, 70 ''Lobo ho sing ale!'' Nyuo hati ngete hona mwanan hari. Nihalu kai ehule obotie da fa hona jiman niho Petur, ''Tur iji ale lobo loho sing, toho iji cebu loho Galileya.'' 71 Hati ngete hona hihuanahiso nakwan hongete hitifichio hono ho itina, ''Abune ijien ale latuani itianyati ite.'' 72 Tiye tiye nohohoro hona hikwohita nohoharik. Petur hona hihuyaniso nahiramita hulo fa iramahi Yesu niho ngete: Many hobe nohohoro ikwok nenyiahita harik, imon hdai iji ne many nenyiahita hutik,'' hongete honahuyari nifok yio.