Nengat 16

1 Lofa natuhihino noholong howiri, Maria Madalina ho Maria hoto Yakobo, ho Salome honahinyianginiso fa neheruji huja otum fa sing ofoninere ilodohiso nikwan ho Yesu. 2 Many berien bebe nilochifot hoholong himetaharik, sing hona fwoten toho nilume lofa noholong nesorou. 3 Ojimi fa sing nikwanite hosing abito abito, ''Ngai ba lolo itobobororo namorwo nihojie tinyi tekat many nilume?" 4 Lofa neririe sing toho nihide, sing ho natialan ojo abobororo namorwo tiye, ohorihi obolo fa ngete bebe. 5 Sing ho nahiruhiso nihotwa helume ho nateliniso lobo latwani lokude ijefito nabongo na opwor, itwongo lotetiani, sing ho na bayangahiso. 6 Ngete ho najiman niho sing, ''Hebayangata. Itahitetete Yesu, Nazarene, ngege lofa ovurohini. Ebuhu! Obe ngete tinyi. Tohiarata nihonamaji lofa onuhahinerete ngete. 7 Nyuohati ifwa, iramahisi nolohejehi hongete ho Petur ojo alo ngete to nahatemeni hote toho Galileya. Toda te itialata ba te ngete, toho ohiramahinere fa ngete ite.'' 8 Sing ho nafwoten niger ho narianya tiye telume; ahula ihihire ceu ihiahe. Obu fa sing otianye ibwo nasinge niho lobo latwani tananyuo obayangi fa sing bebe. 9 Berien nilochifot ho holong ho metaharik, nahalu ho hibuhuniso hongete, ngete ho nahichak leyeji niho Maria Madalina, ngete lofa oroho Yesu namininga metaharik. 10 Ngete ho naloten hiramahiso ehule fa obwoni hongete, ohorihi fa sing ifure nitwari iyo. 11 Sing ho nahitiyir ojo isu ngete cebu ateli fa ngete, nyuo hati obu fa sing iruhi. 12 Nihalu ho hunya leyejita ngete ho na leyeji hama niho sing harik, ohorihi fa sing odahe toho nihotwa hohang. 13 Sing ho nafwoten hiramahiso latonge ho lohejehi, nyuo hati obu fa sing iruhohoni niho sing. 14 Yesu ho naleyeji niho ehule tomon habito ohorihi fa sing ibabalangite niteremeja, ngete hona himumura sing noho ngadari nihobiangan hohiruk hosing hona golon ho tajio hosing, nyuo obu fa sing iruhi niho ehule oteli ngete nihalu holofa ibuhunere ngete niho lahayeyiak. 15 Ngete hona jiman niho sing, ''Ifwasi nifohifohi fad, itotosere nahutuk na odaw niho huja hobienise. 16 Ngete la iruk cebu ifwotu nabatisimo italahino hadi, cebu ngete la obu owak hiruk ohorihi hadi narohoji. 17 Ofwe hadi hunya heteleyehita hehule iruhi: Nifure ho ne orohori hadi sing naharohojiak. Otianye hadi cebu sing tonetenyita nangejuho. 18 Inenefini hadi cebu nariahu tonehes ho sing, ho cebu namati hadi sing ibwo na sing na obeherita, obu hadi itorohoj sing. Otirehini hadi sing nehes ho sing nimorok, cebu obwoni angida.'' 19 Lofa natuhohu Lohobu natianya niho sing, iyare fa ngete nihide ho netwongo nifok niho neten hehene ho Najyok. 20 Lolohijehi ho nafwoten hitotoso nimasik fad, Lohobu igiama nihosing cebu.