¹ Yesu ho nadwahiso natigol ho nalangan nahari ho loten nihang ho sing. ² Lati ho nahiyeno niho ngete lobo latwani la ongura ogeto nikieni. Nofa natel ngete nahiruk ho sing,Yesu ho najiman, "Iha ne,tobwana ho nakwama. Alahahine nepalita hoji." ³ Ilihe lahetomojok ho najiman ojo, "Ituhusa ale twani nakwan ho ngete. " ⁴ Yesu ho najienan nahigigilita hosing ho najiman, "Nanyuo te igigilete na orohojaya nitajo hote? ⁵ Ani lojiha to natianya, 'Nahibalahiso nepalita hote; kuya najiman,'Todete idaha'? ⁶ Ati ongida ite ijianata ojo obwon iha Najyok ho nagolon iji nifok nilahinere nepalita,--"ngete ho najiman niho lahangurani, "Todete,totingu nakieni hoji ilo nihaji hoji." ⁷ Ele twani ho nadeto ho naloten nihaji hote. ⁸ Nofa natelini lati lahangurani ladaha, okwama fa sing ho nahitokwata Najyok, la isiarahi lati nagolon toho ene. ⁹ Loholong nadahaYesu tiye ngete ho nateliniso lobo latwani onya Mateo laheduduhani homochoro nimiji holohiduduhari homochoro. Yesu ho najiman niho ngete,"Ijifine ne. "Ngete ho nadetino ho nahijifaru Yesu. ¹⁰ Nofa netwongo Yesu nifok ninyesere nangirang nihaji, laheduduhak ho ho mochoro ho lahepalak hula olwaji ho nafwoniso niho inyasu ho Yesu ho lolohejehi ho ngete. ¹¹ Nofa nateli lati ho Farise ngete, sing ho najiman niho lolohejehi ho Yesu, "Nanyuo lahetejianani hote onyasu ho laheduduhak ho mochoro cebu ho lahepalak?" ¹² Nofa nitiyir Yesu, ngete ho najiman, "Lati hula obe odiahe obu otum ofwe nitalie mayak lahadiahak. ¹³ Ifwosi ihuyasete nanyuo anya itelehi, 'Awak ne namehino obu neyalita.' Obu ne alotu ingeleso lahangidarak ongida iwahe nepalita hosing ati lahepalak." ¹⁴ Lolohejehi ho Yuwana ho nafwoniso niho ngete ho najiman, "Nanyuo ijie ho lati ho Farise ohinyumu nahitongo obe ohinyasu nyuo hati lolohejehi hoji obe itwenge nebe ngirang? ¹⁵ Yesu ho najiman nihosing ojo,"Hatum lati hula obwoni nimaji ho loyamari ilongojite lahayamani hobwon da? Obwoni hadi noholongi nomo nalo lahayamani sing hadi ho nahitwongo nebe ngirang. ¹⁷ Obe ce bu lati isasarete nabalu to nesase na ora alongore. Nesaserete sing to nesase nolongore kira nabalu ijuhoro nahisase epalaru. Ati ihwanahini nihisase na hora angejuk, ngete sing fad otunune. ¹⁸ Lofa hotianya Yesu niho sing, lobo lahaboloroni ho na lotiniso rugungi nifok nihote.Ho najiman," Ngara ne anya hoye tahanya, kwo to rwehi nehene hoji niho ngete ongida ngete isu." ¹⁹ Yesu ho nadeto ho nahijifaru ngete ho lolohehi ho ngete. ²⁰ Nangorite na itihitita nohoto niho ngete negasi tomon-ho harik ho nalotiniso nihatemeni ho Yesu ho natiron niger ho bongo ho ngete. ²¹ Ngete ho najiman taji ho ngete, "Natir ne nabongoji ho ngete ijia,ne angida." ²² Yesu ho nangolo ho nateliniso ngete, Yesu ho najiman, "Hito,itongolo nataji. Ahitingidar iji nahiruk hoji. "Ene ngorite ho nangidari ²³ Lofa nalotu Yesu nihaji hele haboloroni,ngete ho nateliniso lahahutak hekangaji ho lalohoi ho lati igogworite. ²⁴ Yesu ho najiman nihosing,"Ifwasi niger, obu anya hito oye, ogetoro. "Sing ho nakenita nikenit no miana. ²⁵ Nofa narohoyo ngete lati niger, ngete ho nahiruyoriso nihaji ho natinginiso ene hito,nahito ho nadetino. ²⁶ Nahitingidarinere ho Yesu anya hito ho na hisarahiso nihotwa ho hang fad. ²⁷ Nofa nadaha Yesu tiye, lahangodok harik ho nahijifaru ngete. Itiringe sing igworita ojo,"Tomehine niho jie,iha Davide." ²⁸ Nofa nalotu Yesu nihaji, ihule lahangodok ho nafuoniso niho ngete. Yesu ho najiman nihosing, "Iruhoto te ojo hatum ne egiem anya?" Ojimi sing niho ngete' "Ee,Hobu." ²⁹ Yesu ho natiron nohonyehite hosing ho najiman, "Ikie ihoni nihote to nahiruk hote." ³⁰ Nohonyehite hosing ho nangasu. Yesu ho nahiramahiso sing ojo, "Ikie lobo latwani obu ojien anya." ³¹ Ehule ati ho nafoten itasarahiso nahiram natingidarari Yesu sing nihotwa ho hang. ³² Ehule ati harik, eyeni niho Yesu lobo latuani la iningo odiaha ho namininga. ³³ Nofa narohori na mininga niger, ele twani ho natianya. Obayangi fa lati ho natianya ojo, "Hobe ibwo nasinge ora to ho anya iji Isarayile!" ³⁴ Laharisak ojimi, "Orohorita ngete mininga to nagolon ho mininga." ³⁵ Odak fa Yesu nahangite huja hitwaha ho huja omutari fad. Itiringa fa ngete itejiana lati nilobojereji,itotoso nabuk ho kwatan, nihitingidarari nediahita fad. ³⁶ Nofa natelu ngete na lohoi ho lati, ngete ho namehino nihosing nyuo obu fa sing okwame. Okialare fa sing ho nehoriangi huja obe lahejwahini. ³⁷ Yesu ho najiman nilohejehe ho ngete, "Obolo namana,nyohati lahegiama omutari. ³⁸ Inaha, tomojete kerem nih; Lohobu ho mana, ongida ngete osulu lahegiamak niha nya mana."