¹ Yesu ho nangeleniso lolohejehi hongete tomon-hoharik harabito ho nahisiarahiso sing nagolon niho nolohailongi huja iboti, nirohojiere sing niber, ho nihitingidarari nediahita fad. ² Nafureto ho lahitejianak tomon-hoharik sing hula. Loho abito,Simone(la ongelese Petur), ho hilasi hongete Andrea; Yakobo iha Sebedee, Yuwana hilasi ho ngete; ³ Filipo, Bartulomeyo, Tomas, ho Mateyo laheduduhani ho mochoro; Yakobo iha Alpaya, ho Taddaeu; ⁴ Simone ojo Yuda Iskariot la itenyangaya Yesu ⁵ Ngete ho nasulariso hula ati tomon-hoharik. Iramahi ngete sing ojo, "Hefwasi niho nihang na omanyariti paganoji, heruhisi ibwo nahang ho Samariya. ⁶ Ifwasi niho nehoriangi huja olitari no ho Isarayile. ⁷ Nomo nefwasi te itotosete ojo, "Anyiha nalotiniso ho hide.' ⁸ Itingidarata lahadiahak, itubuhusu lahayeyak, itinyilajata lati ho chalulu cebu irohosi niger namininga. Ihorihisi te naharus, ongida cebu ongida ite isiarahi naharus. ⁹ Heyariti ibuo namorwo na omimil kuya ibwo nasinge. ¹⁰ Heyariti ho nolokoboli hote, kuya ibwo nabongo, dobu na hamuk, obwon lahegiamani ho natarihe niho rihinere nangirang ho ngete. ¹¹ Niho nahang neruhisi te, to horihisi ngai longida itwengete da many nedahatite. ¹² Neruhisite nihotwa ho haji,ihatata ngete. ¹³ Na nyila nahaji, ikie nayomo hote obwon nihene haji. Ati nabu onyila, ikie nayomo hote oyitu nihote. ¹⁴ Niho ehule hula obe omojini kuya obe itiyire natianya hote, nomo nedahatite nihene hang,itururuhisi nafok hehejiahe hote. ¹⁵ Ahiramahi ne ite, orohojaya hadi nifok ho Sodoma ce bu Gomorra niholong ho ngoto ho hiramita ilany nehene hang. ¹⁶ Totialati, ahisulahiso ite to ho nehoriangi huja obwoni nihiji ho lowohoji, to gianyata to ho nahiriahu, to riajata to ho nawoloji. ¹⁷ Notialati lati angida! Ohisieri ba ite niho lolohitwaha hula ba ohibehe itenilomojereji. ¹⁸ Ohiyare ba ite nihatemeni ho lohitwaha ho kuma cebu niho lohobuk to ne, ahitetelehiso nihosing ce bu niho paganoji. ¹⁹ Nomo nahisieri sing ite, hegigilete natianya na ifwasite itianya, natianya na ifwasite itianya isieri hadi nihote nihene holong. ²⁰ Obu lora ite ba litianyati nyohati Nolohailong ho monye hote ba lotianya nihote. ²¹ Isiarahi hadi lahilasi hilasi niyeyi, monye isiarahi lonyi. Odetihine hadi lemusak monye ho hotiange ibany isieri ifadari. ²² Oswe hadi lati nihote to nafure hone. Ati latwani la odihu many nilohichungi, italahino hadi. ²³ Nomo nahitengiame ite niho anya hang, inamata niho nahang na ojiha, ahiramahi ne ite natarihe, habu dwote ifwosi hara Isarayile habedwo ne alotu. ²⁴ Obu lolohejek obolo ilany lahetejianani hongete,kuya lahegiamani lobolo ilany monye ho hang. ²⁵ Otum niho lolohejek okialare ho lahetejianani hongete, olehegiamani okialare ho monye ho hang. Nangele sing monye ho hang ojo Beelsebul,baya ba sing ipalari nahaji hongete! ²⁶ Inaha hebayangata sing, obe ba ibwo nasinge na otunahini na obe hadi otujuni, cebu obe hadi ibwo nasinge na idimahini na obe ojieni. ²⁷ Natianya na ehiramahi ne iji nidimele, to tianyari nifangan, nasinge na itiyiru ji kai nihijok hoji, itokwata nimaji ho hima ²⁸ Hebayangata lati hula ifadari nakwanite hote ati to bayangata lati hula ifadari nakwanite hote ho nolohailongi nihima. ²⁹ Habe nakeny harik otum itenyangari to na robiati? Nyuo hati bu lobo abito otum odoyo nifok obe monye hoji ojien. ³⁰ Ati dobu nafofi to hou hoji ikenine sing fad. ³¹ Hebayangata. Ingidaratate ilanyata nakeny. ³² Inaha, latwani la iwaha nepalita ho ngete nihatemeni ho lati, ewaha hadi cebu ne nihatemeni ho monye ho ne la obuon nihide. ³³ Ati latwani la ohimon ne nihatemeni ho lati, amon hadi ce bu ne ngete nihatemeni ho monye la obwon nihide. ³⁴ Hegigilete ojo eyieno ne nayomo nifok. Abu ne eyieno nayomo, ati nanyaliru. ³⁵ Alotu ne isiarahiso lahito oswa niho monye, nahito oswa niho hotenge,nangorite ho hito ho leye oswa niho homoni hongete. ³⁶ Lamerok ho twani orahi hadi lati hula omanye hongete nahaji abito. ³⁷ Ngete la okwama monye kuya hotenge ilany ne obu otum niho ne. Latwani la okwama lonyi kuya ngarini ilany ne obu otum to ne. ³⁸ Latwani la obu oting nahite hongete na ikwala ohijifito ne obu otum to ne. ³⁹ Latwani la ohorihi nahisu hongete ongotihi hadi. Latwani la ibalaya nahisu ho ngete to ne, ohorohi hadi. ⁴⁰ Ngete la ohifwotu ite ahifwoti ne,ngete la ohifwotu ne ehifwotu ngete latwani la ohisulu ne. ⁴¹ Ngete la ifwotu laheramahitani ho hiramita to narahan ho ngete aheramahitani ho hiramita, ohorihi ngete neyalita ho laheramahitani ho hiramita. Ngete la ifwotu la hangidarani ohorihi hadi ngete neyalita ho la ha ngidarani. ⁴² Latwani la isiarahi niho hule lemusak homutari, kileng nahari ho mata, to narahan hongete alohejek, ahiramahi ne ite natarihe obe ngete otum ongotihi neyalita hongete.