¹ Abwon fa laholong natuhohi Yesu iramahiso lolohejehi ho ngete, ngete ho naloten tiye nihi tejianari ho nihitotosere nihangete. ² Nofa nitiyir Yuwana to ho twa ho lotwarari nagiemita huja ihon Yesu, ngete ho nasuluniso lolohehehi ho ngete iyeni natianya niho Yesu na ojo, ³ "Iji ale la ilotiniso, kuya habwon haba lobo latwani la ohitahito ijie?" ⁴ Yesu ho nahitarang sing ojo, "Ifwasi iramahisi Yuwana nareji huja itelusu te itiyirusu cebu. ⁵ Atiale lahangodok, lahangurak odahe, anyilaji lati ho chaluluji, lahatuhok itiyire, itubuhuni lahayeyak, cebu lati hula oparita iramahini nihosing natianya na ongida. ⁶ Ikie najoha obwon niho latwani la obe ohorihi nihititihito niho ne ⁷ Nofa nafwe ehule ati, Yesu ho najiman niho na lohoi ho natianya niho lati to Yuwana ojo, "Nanyuo te ifwasi itiala niloleng-namujung huja ohuta no lobwangi? ⁸ Nyuo hati nanyuo te ifwasi itiala latwani la ijiefito nabongiji huja irebiji? Tarihe lati hula ijiefite nabongoji huja irebiji omanye sing nihai ho hobuk. ⁹ Nyuo hati nanyuo te ifwasi itiala-laheramahitani ho hiramita? Ee, eramahi ne nihote, obolo ilany laheramahitani ho hiramita. ¹⁰ Ngete ale lofa igierehini ojo, 'Totialati, asuluniso ne lolohejek ho ne nihote, la olo iterehiso nahoi.' ¹¹ Ahiramahi ne ite natarihe, niho hula oyisini nangorwo, obe lobo obolo ilany Yuwana Batista. Nyuo hati latwani lolohichungi la ongida nihide obolo ilany Yuwana. ¹² Niho noholongi ho Yuwana Batista ho tahanya obolo na higogworita nihang na obwon nihide, lati hula okwame nangalasu owahi iyaru ngete to nagolon. ¹³ Laheramahitak ho hiramita fad ho nechita, iramahite fa many olotinere Yuwana. ¹⁴ Nehuhumahinetete niho taraniso ngete, ngete Elija, lofa olotiniso. ¹⁵ Latwani la obwon ho najohe nihitiyirari ikie ngete itiyir. ¹⁶ To ho nanyuo ne hetekialarahi hula ati?Okialare ho lemusak hula ilime nimaji ho lohitenyiangari horeji, hula itwenge ogelese nakwanite ho sing ojo, ¹⁷ 'Ohihuta ijie nilwere nihoji iji ibe ikia. Ohibwon ijie nitiari,iji ibe iyo.' ¹⁸ Olotu fa Yuwana itwongo la obu onyasu nangirang cebu obe omata nabalu sing ajimi,' Obwon ho namininga. ' ¹⁹ Ojo iha Najyok alotu onyasu cebu omata sing ajimi, 'Totialati, lahehawurani cebu ora aharu mani, lamorite ho laheduduhak ho mochoro ho lahepalak!' Nyuo hati ojieni nolofero to nahigiama ho ngete. ²⁰ Yesu ho nahichak irianga nahingite huja fa igiem ngete nidwarita da to nabiangan hosing iwahariso nepalita hosing. ²¹ "Ikie narohoji obwon nihote, Korasini! Ikie narohoji obwon nihote Betsaida!Nehoni nedwarita niho Tire ho Sidonia huja igiemi nihote, ata sing ewahari nepalita hosing many fa na nabongoji huja orahi akireji ho nahunara. ²² Ati obolo hadi nahitegiama niho Tire ho Sidonia niholong na ongoterete nahiramita ilany no hote. ²³ Ite, Kapernome, igigiletete ojo ohitingi hadi ite nihide? Obe, ohitingirini hadi ite nifok. Nehoni fa nedwarita Sodoma huja fa ihoni nihote, hatum dwo obwon hotahanya. ²⁴ Ahiramahi ne ite ojo onyiha hadi noho nafok ho Sodoma niholong ho ngoto ho hiramita ilany no hote." ²⁵ Nihene holong ojo Yesu, "Ahehitokwata ne iji Lamonye, Lohobu ho nihide ho nafok to nanyuo idimahi ji huja reji niho laheleferejok ho lahetiyirak, iramahi sing niho lati hula obe ikeni, to lemusak. ²⁶ Ee, baba, ongida bebe nihatemeni hoji. ²⁷ Hunya reji fad esierihi monye hone niho ne. Obe lobo latuani ojien lahito mayak monye obe lobo ojien monye mayak lonyi, ho latwani la owak lonyi hiramahiso ngete. ²⁸ Ifwosu niho ne ite hula irosijoto, ahisiarahi ba ne ite nawiri. ²⁹ Iyariti nolohodo ho ne itejienisu niho ne, etwongo ne ahariajani ce bu irebi nataji, ihorihisi bete nawiri ho lohailongi hote. ³⁰ Otawak no lohodo ho niama ho ne."