1 Lofa natuhohi Yesu natianya, ojo ngete niho lolohejehi hongete" 2 Ijiana tate ojo natuhine noholongi harik olotiniso nolohichungi ho anyasu hongirang, iha Najyok ofue isiarahiso ongida oguruhoni." 3 Lapadiriji ho lolohitwaha otube fa sing harabito nahang ho lohituahaji ho padiriji la onya Kaipas. 4 Omwange fa sing natwarahiso ho nahifadariso ho Yesu. Ojimi fa sing, " 5 Obu lara niholong nahitwahaji, ongida lati obe igogworite. 6 Tahanya lo fa Yesu ho bwon Beteniya nihaji ho Simone na onya nachalulu, 7 lo fa ngete onyasu, nangorite ho nalotiniso ho narany he lata na ogol nahinyanga hongete ho nahijuhohiso nihou ho Yesu. 8 Nyuo hati lo fa natelini lolohejehi hongete anya, sing ho nahilongojita bebe ho najiman, "Nanyuo nahiram na ipalajierete anya? 9 Hatum dwo itenyangari anya ilata to narobia huja olwaji isieri niho nahaparitak." 10 Yesu ho najianan nigigilita hosing ho najiman, "Nanyuo te itegiamati anya ngorite?Ihon ngete nasinge na ongida niho ne. 11 Ibwanatate ho lahaparitak tihitik,obu hadite ibwanata ho ne. 12 Nijuhohi ngete anya ilata niho nikwan, ihon ngete noho nuha ho ne. 13 Ajo ne niho te, namaji na itotoserete anya buk, nasinge na ihon anya ngorite niho ne ihuyaniterete hadi ngete." 14 Lobo tohiji ho lohejehi ho ngete, nafure Yuda Iskariot, ho naloten niho lahetomojoni 15 ho najiman,"Nanyuo ji hetum isiarahi ne ongida ne esiarahi ale twani niho te? Sing ho nahiduhuniso silfaji nihejek hutik. 16 Ngete ho natahito nehoi nihisiarahinere Yesu niho sing. 17 Tahanya nilochifot ho holong hehuhumari nabune, lolohejehi hongete ho nafuoniso niho ngete ho najiman, "Ajiji iwak ijie ohifwo ihuhumahis nalonyasere hoji nangirang nolohichungi?" 18 Ngete ho najiman, "Ifwasi nihotwa ho hang niho latwani lobo to jimata niho ngete,' Ojo lahetejianani, "Abwon noholong hone nihene ho ne. 19 Lolohejehi ho nahi hon to ho iramahinere Yesu sing, ho nahi huhumahiso nangirang no lohichungi. 20 Nofa nara atari, ngete ho nahitwongo nifok inyasu ho lolohejehi ho ngete tomon ho harik. 21 Lofa nanyase sing, Yesu ho najiman, "Tarihe ajo ne niho te lobo tohiji hote ohitenyangai hadi ne." 22 Imujute fa sing bebe, abito twani to hiji ho sing ho nahifwasu, "Tarihe obu ne, Lohobu?" 23 Yesu ho nahitarang, "Latwani la ohinyasu ho ne harabito ngete be lohitenyangai ne. 24 Olo ba iha Najyok, to ho igierehini to ngete. Ikie narohoji obwon niho latwani la itenyangariso iha Najyok! Angida fa tia di hara obu ohisini ilerok. " 25 Yuda la olo itenyangariso Yesu ho najiman niho ngete, "Ora ne,rabbi?" Yesu ho najiman niho ngete, "Etenyu ji to nakwan hoji." 26 Lofa nanyase sing, Yesu ho nahiduhuniso nebune, ho najohan,ho nabianyan. Ngete ho nahisiarahiso niho lolohejehi ho ngete ojo, "Iyarati, tonyata. Ngete anya nakwan ho ne." 27 Ngete ho nahiduhuniso nakubaya ho nahisiarahiso nawa, ho nahisiarahiso niho lolohejehi ho ngete ojo,"Tomatata, ite fad. 28 Ngete anya nohoto ho ne niho nayomo na ijuhunu to lati hula oluaji nehifusojiere nepalita ho lati. 29 Ahiramahine ite ojo abou ne amata anya toruharuhak hari,many nihene holong nalotu ne imata nangejuk hote nihang ho Monye ho ne. 30 Nofa neruhe sing nafure,sing ho nafoten nidenge ho Olife. 31 Yesu ho najiman niho sing, "Ihuyasi ba te fad nihanya harie to ne, to ho igierehini, 'Aduk hadi ne lahejwahani many isiarahine nehoriangi.' 32 Nyuo hati nomo nahitedetini ne, alo hadi ne to nahatemeni hote to ho Galileya." 33 Petur ho najiman niho ngete, "Dobu ho nami hule fad to ji,habu ne atum enam. " 34 Yesu ho najiman niho ngete, "Tarihe ahiramahine iji, anya harie ho be nohohoro ikuok,imon be ji ne nemonita hutik." 35 Petur ho najiman niho ngete, "Hatum ne ohiye hoji, obu ne otum ahimon ji." Lolohejehi fad ho nahiruk ene tianya ho ngete. 36 Yesu ho naloten hosing nihang na ongelese Jestimani ho najiman niho lolohejehe hongete, "Ituengete ijini halo ne mojo." 37 Iyaru ngete Peturu ho hang Sebedi harik ho nahichak bwanan ho namiajan ho naniama. 38 Ngete ho najiman niho sing, "Obe taji ho ne bebe, many niyeye. Itwenge te iji to kianyata ho ne." 39 Ngete ho nahihutohiso ngai, ho nahuyari to nohomom ho namojo. Ojo, Monye ho ne,natum ora to hoja, ikie anya kubaya olo tinyi ho ne. Obu lora to nawahan ho ne,ati no nawahan hoji. " 40 Ngete ho nalotiniso niho lolohejehi ho ngete ho na horihiso sing ogetere, ngeteb ho najiman niho Peturu, "Nanyuo, habeji itum ikeny ho ne ningolohita abito? 41 Tokianya imojo ojo ongida iji ibe ilo nisusuta. Owak nolohailong nyuo hati nakwan oniama." 42 Ngete ho naloten niger noho harik ho namojo,ojo, "Monye ho ne,obu anya otum otuhoro many amat ne ngete,ikie nawahan hoji ihoni. " 43 Yesu ho nayitiniso hari ho nahorihiso sing ogetere, irosiji fa najionihonyhete nohonyehite hosing. 44 Ngete ho nahidahiso sing hari ho naloten. Ngete ho namojo niho hutik otianya ngete nahiram abito abito. 45 Yesu ho nalotiniso nilohejehi ho najiman nihosing, "Hegetetete cebu iwirasi? Totialata, alotu nangolohita, itenyangahini iha Najyok nehes ho lahepalak. 46 Todetete, adahati. Totialata latwani la itenyangaris; ne eliaha." 47 Lofa ngete ho tianya, Yuda, olohejek ho ngete ho nalotiniso. Olwaji fa lati hula ofwoni ho ngete to hang ho lahetomojoni ho laragang ho lati. Ofwoni sing ho nanyaliruji ho neluhi. 48 Latwani lofa olo itenyangariso Yesu eramahi fa ngete nihosing natianya ojo, "Latwani la ajur ne, ngete ile, iniafata ngete." 49 Ngete ho nalotiniso niho Yesu ho najiman,"Ahihatu,Rabbai!"Ho najuran Yesu. 50 Yesu ho najiman niho ngete,"Morite,ihwana nasinge na ilotu ji ihwana, "Sing ho naruehiso nehes hosing niho Yesu ho nahinef ngete. 51 Abito twani niho hulofa obwoni ho Yesu ho nahipirehiso nehene ho ngete ho nasutiniso nanyaliru, ho nanguton nahi jiok ho lahigiamani ho lahetomojoni. 52 Yesu ho najiman niho ngete, Ijiahahi nanyaliru hoji nimaji ho ngete, lati hula iduhuni nanyaliruji oyeyi hadi sing to nanyaliruji. 53 Igigilo letete ojo habe otum ne angeleu Monye ho ne, ngete ho nasuluniso anjeloji hula olwaji? 54 Nyuo hati tatali hadi nahiram lofa igierehini nibuk olotu rahan tarihe, ongida lora tohoja?' 55 Yesu ho najiman niho lati, "Ifwosute to nanyaliruji ho naluhi nihenefitere ne to ho lahohwalani? Itwongito ne tihitik ni temepulo nehitotosere ite ibe iniafata ne. 56 Idwongi hunya fad ojo ongida nahiram lofa igierehi laheramahitani ho hiramita olotu rahan tarehe. "Lolohejehi ho ngete ho nahidahiso ngete ho nahinam. 57 Laheniafak ho Yesu ho nahiyaru ngete niho Kaipas lolohitwahaji ho lahetomojok,namaji na otubariti lahegierok ho larangang. 58 Petur ho nahijito ngete nololamaje namaji na itungetere lahetomojini la obolo. Iruyo ngete nihotwa ho haji ho nahitwongo ho lahenyamitok nitialari antianya hosing. 59 Lahetomok hula lohitwaha ho larangang otahite fa sing natianya noho inefinere Yesu, ongida sing ifadari ngete. 60 obu sing ohorihini ibuo nepal niho Yesu dwobu eramahini lagesemok nahiramita huja olwaji. Harik ho nafuoniso 61 ho najiman, "Ojo ale twani, 'Atum ne agilaya netempulo ho Najyok cebu efak to no holongi hutik." 62 Lolohitwahaji ho lahetomojok ho nadeto ojo niho Yesu, "Ibe ji ibuon ho nahitarangi?Nanyuo naja lotianye sing toji? 63 He ningo fa Yesu. Lolohitwahaji ho lahetomojok ho najiman, "Ahiramahi ne iji to nafure ho Najyok, iramahi nihojie kuya iji Kristo iha Najyok. " 64 Yesu ho nahitarang ngete ojo, "Etenyu ji to nakwan hoji. Ati, ahiramahi ne ite, tobaya to ho nahatemeni itialata ba te iha Najyok itwongo niteten hehene ho golon, ho nalotiniso to nedis ho hide." 65 Lolohitwahaji hosing ho nachiran nabongoji ho ngete ho najiman, "Atenyu ngete na orohojaya! Nanyuo jie ho hiwak lati hilihe ofuoni hiramihiso?Totialati itiyirusute natianya na orohojaya. 66 Nanyuo te igigilete?" Sing ho nahitarang ngete ojo, "Otum ifadari ngete" 67 Sing ho namita nihomom ho Yesu ho nabeho ngete,nanga Yesu to nehes hosing 68 ho najiman,"Iramahi ne hojie, iji Kristo. Ngai lohebek iji?" 69 Itwongo fa Peter niger ho longotere, ibwo nahito hongorite ho nalotiniso niho ngete ho najiman, "Ibwon fa ji ho Yesu ho Galileya." 70 Omon fa ngete nihatemeni hosing fad, ojo, "Abu ne ajien nanyuo ji itianya." 71 Lofa nalo Petur nikat ho bwata, ibwo nahito nahegiamani ho nalotiniso ho nateliniso ngete ho najiman niho lati hula obwoni da ojo," Ale twani, obwon nfa ho Yesu ho Nasarit." 72 Ngete ho namwanan hari many itin, "Abu ne ajien la twani." 73 Lati hulofa obotie ho nafwoniso ho najiman niho Petur, "Tariho, ireji ale ehule ati, natianya hoji lohisiarahi iji niger." 74 Ngete ho nahichak nahipita ho nahi tina, "Abu ne ajien latwani," no hohoro ho nahikwohita. 75 Petur ho nahihuyaniso netenyita ho nofa iramahi Yesu ojo, "Hobe nohohoro ikwok, imon hadi ji ne nimonota hutik." Ngete ho naloten nigre ho nayo na orohoja.