1 Nihalu ho holongi ile Yesu ho nahiyaru Petur, Juma ojo Yuwana hilasi ngete, ho nadwahajiere sing nihide ho denge. 2 Nakwan ho ngete ho nahibielo nihatemeni ho sing. Inwohito no homom ho ngete to ho no holong cebu nabongo ho ngete ofarang to ho na nahima. 3 Muse ho Elija ho naleyeji nihosing otianye ho ngete. 4 Petur ho najiman niho Yesu,"Hobu, ongida nihojie nibwonitere iji. Kuya newak iji,otum ne ihuhumahi natitio hutik-abito no hoji, abito no Muse abito no ho Elija." 5 Lofa ho tianya ngete, nedis na opwor ho nahitik sing, namurut ho natianya to hotwa hedis, ojo, "Ngete ale iha ne, niho ngete obolo nakwama ho ne. Itiyirati niho ngete. " 6 Laholong nitiyiri lolohejehi, sing ho na huyari to no homomite ahula obayangi bebe. 7 Yesu ho na lotiniso ho natiron sing ojo, "To detete hebayangata." 8 Sing ho natingon nohosing nihide obu oteli lobo latwani mayak Yesu hama. 9 Nofa nangirinise sing to denge nifok, Yesu ho nahiramahiso sing ojo, "Heramahiso anya leyeji niho lobo latwani many nebuhu iha Najyok to yeyi." 10 Lolohejehi ho nahifiasu ngete ojo, "Nanyuo hati lahegierok ojimi ikieso Elija olotu berien? 11 Yesu ho na hitarang ojo, "Olotu hadi Elija tarihe he tedetiniso hunya reji. 12 Ati, ahiramahi ne ite ojo,olotu Elija, nyuo hati obu sing oteli ngete. Ihuni sing nasinge na owahi sing. Odihu hadi cebu iha Najyok nahitegiama tehes hosing." 13 Lolohejehi ho najianan ojo otianya kira ngete to Yuwana Batista. 14 Nofa nafwoni sing nihiji ho lati,lobo latwani ho nalotiniso niho ngete 15 ojo, "Hobu, tomehine niho iha ne, odiaha ho nolokolkol. Ohuyarita tihitik nahima ho nihari. 16 Eyieno fa ne nilohejehe hoji obu sing otenini." 17 Yesu ho nahitarang ojo, "Lati hula obu irhi ho lahahohwalak, many anu hadi ne ohitwongo hote? Many hanu hadi ne adik ite? Iyienete ngete idia niho ne. " 18 Yesu ho na hireng ngete,namininga ho nadahiso ngete. Ilehito ho nangidari. 19 Lolohejehi ho nafwoniso niho ngete ojo, "Nanyuo hati fejie obe ohirohoyo namininga niger?" 20 Yesu ho najiman nihosing, "Tonamutari ho hiruk hote. Ajo ne nihote, nebuanitate ho nahiruk na omuta toho nahinyemoti la omuta,otum ite ijimata niho anya denge, Ilo tinyi to ho di; ngete ho naloten obe ibwo nasinge itik ite. 21 Obu anya miningati otum olo niger mayak to namojo ho nahitwongo nebe ngirang." 22 Laholong netwenge sing Galileya,Yesu ho najiman niho lolohejehi ho ngete, "Isieri hadi iha Najyok nehes ho lati. 23 Ifadari hadi ngete, niholongi hutik, ibuhu hadi to yeyi. "Lolehejehi ho ngete ho nahilongojita bebe. 24 Lofa nafwoni sing Kapernume,lati hulo fa iduduhuni namochoro ho nafuonisi niho Petur ho najiman,"Obe lahetejianani oduma namochoro? 25 Ngete ho najiman,"Ee."Nyuo hati laholong nalo Petur nihaji,Yesu ho nahichak itianya niho ngete ojo,"Nanyuo iji igigilo,Simone?Lohobuk ho fok,niho ngai sing ohorihite namochoro?Niho lati hosing ole niho lahatomonok?" 26 Lofa najo Petur niho lahatomonok,"Yesu ho najiman niho ngete, "Lati hosing isieri obu odume namochoro. 27 Isiarahi naja loheduduhak ho mochoro nepalita,ifwe nihari,ipirehine nahitolohe ho haiyem ho nahisiarahiso nihaiyem.Nomo nenga iji nahutuk ho ngete,ihorihi ji narobiati.Iyare isiara niho laheduduhak ho robia to ne hoji."