¹ Hilihe laharisak ce bu lahegierok ho fwoniso niho Yesu to Yerusalem. Sing ho najiman, ² "Nanyuo lolohejehi hoji obalari namanyita holohitwaha? Obu sing ofinarite nehes hosing nomo nanyese." ³ Yesu ho nahitarang sing ojo, "Ete-nanyuo te igilati nichihita ho Najyok to nahiram he manyita hote? ⁴ Ojo Najyok, 'Tobayanga iyang hoji; 'Ngete la otianya na orohojaya niho monye kuya hotenge oye hadi. ' ⁵ Nyuo hati, 'Latwani la ojo niho monye kuya niho hotenge, "Nalwaha na ihorihi ji niho ne ora eyalita niho Najyok,'" ⁶ ile twani obu owak bayangi monye.Tana ihoi etik ji natianya ho Najyok to nemanyita hote. ⁷ Ite hula lahapufak, iramahi fa Isaya natianya to te laholong ojimitere,' ⁸ Ohitokwate ne hule ati to nahutuhe hosing,nyo hati natajio hosing olamaji nihone. ⁹ Omoje sing ne kwiyik, to nahitejiana hosing nahitejiana to hosing." ¹⁰ Ngete ho nangeleniso niho ngete ho najiman, "Itiyirata ihwanihisi nijohe- ¹¹ Obe ibwo nasinge na iruhi nihutuk ho twani ipalaya latwani. Nyuo hati, nasinge na olotu tohutuk niger ngete ipalaya latwani." ¹² Lolohejehi ho nafwoniso niho Yesu ho najiman, "Ijien ji ojo ilongojite Farise nihitiyirari hosing anya tianya?" ¹³ Yesu ho nahitarang ojo, "Nakiani huja obu monye ho ne la obuon nihide inujahi orutori hadi niger. ¹⁴ Idahisi sing hama, itwenge sing ahenyamitok hangodok. Nenyamito lahangodoni latwani la ongodo ohuyari sing fad ni wure. ¹⁵ Petur ho nahitarang Yesu ojo,"Iramahi nafotiri hanya tianya niho jie. " ¹⁶ Yesu ho najiman," Hebwanatate na obe ijianata?" ¹⁷ Ibete ijianata ojo nasinge na olo nihutuk oringaya nihotua olotu niger ahino? ¹⁸ Nasinge na olotu hara nihutuk ho twani olotu to taji. Sing huja nareji huja ipalari latuani. ¹⁹ Totaji olotu negihilita na oroho, nahifadariso, nangetere nguru twani, nasomon, nahoho, narahan negesemi, ho namoro. ²⁰ Sing hunya nareji huja ipalari latwani. Nyuo hati, nanyasu ibe ifinaya obu ipalaya latwani." ²¹ Yesu ho na loten tiye ho naloten to ho nihangite ho Tire ojo Sidonia. ²² Ibwo nangorite ho Kanania ho nalotiniso. Igworita ngete ojo, "Tomehine niho ne, Hobu, iha Davide; odiaha ngarane ho namininga." ²³ Itarang Yesu ngete ojo obu lora natianya. Lolohejehi ho ngete ho nahilelia ojo, "Torohoye ngete niger, igogworite to nehalu hojie." ²⁴ Yesu ho najiman, "Obu fa ohisuluni ne niho lobo latwani mayak niho nehoriangi ho Isarayile. " ²⁵ Ngete ho na lotiniso ho narugungi nihatemeni ho Yesu, ojo, "Lohobu, tolwaha ne. " ²⁶ Yesu ho nahitarang ojo, "Obu ongida nihiyajiere nangirang hemusak ipirehini ningohe." ²⁷ Ene ngorite ho najiman, "Ee, Hobu, onyese bu namusak ho ngohe noloruro honye ofonite to hutuk ho monye hosing. ²⁸ Yesu ho najiman niho ngete,Ngorite, obolo nahiruk hoji. Ikie ihoni to ho iwak ji." Ngara nangete ho nangidari nihene holong. ²⁹ Yesu ho nahidahiso ene maji ho naloten niger ho hari ho Galileya. Ngete ho nadwahan nihide ho denge la lokude ho nahituango da. ³⁰ Nalohoi ho lati ho nafwoniso niho ngete. Iyeni ho lahangurak, lahangodok, laheningok, ho lahariatak ho lati hilihe hula obwoni nediahediahi hamahama. Isieri sing nihejiahe ho Yesu, ngete ho nahitengidar lahadiahak . 1Lati ho nangungunuta nofa lateli sing laheningok otianye, lahariatak ongidari, lahangurak odahe, olaha ngodok otiale. Sing ho nahitokwata Najyok ho Isarayile. ³² Yesu ho nangeleniso lolohejehi ho ngete ho najiman, "Abwon ne ho namehino niho lati to nahitwongo hosing ho ne noholongi hutik na obe onye nangirang. Obu ne awak itasarahiso sing obe onye nangirang kira ohuyarite nihoi." ³³ Lolohejehi ho najiman niho ngete, "Aji bejie ohiduha nangirang nihanya maji ora ololeng na otum nalohoi ho lati? Yesu ho najiman nihosing, " ³⁴ Baya te ibwanata ho nebune? "Sing ho najiman, "Metaharik, ho lahaiyem hula omutari dei." ³⁵ Yesu ho nahiramahiso lati itwenge nifok. ³⁶ Iduhu ngete nebuneji metaharik ho nahaiyem ho nahisiarahiso na awa, ngete ho nabunyon nebune ho nahisiarahiso niho lolohejehi. Lolohejehi ho nahisiarahiso niho nalohoi ho lati. ³⁷ Onye fa lati fad many ifongi. Sing ho nahitutufahiso natonge huja obubunyohine, ifuti niburusoji metaharik. ³⁸ Orahi fa lati hula onye nalif ongon laliawa, nangorwo hama ho lemusak. ³⁹ Yesu ho nahitasarahiso sing ngete ho nadwahahiso nitigol ho naloten to ho nihang ho Magadan.