Nengat 14

1 Herode lahifadani netiyir nahiram to nabwanan ho Yesu. 2 Ojo ngete niho lolohejehi ho ngete, "Ngete laja Yuwana Batista ebuhu to yeyi. Inaha, hunya golon igiame niho ngete." 3 Achihahi fa Herode ojo ongida inefini Yuwana otwarahini to nahiram Herodia, ngurtu Filipo hilasi ho ngete. 4 Ojo fa Yuwana niho ngete, "Obu osiru iji itwengete ho nguru hilasi ho ji. " 5 Hatum fa Herode otwarahi ngete nyuo hati obayang fa lati to nanya otarahi fa ngete aheramahitani ho hiramita. 6 Lofa nesiahita niholong na oyiserete Yuwana, ngara Herodia ho nakia nihiji ho par ho nahitokwama Herode. 7 Herode ho na hitin nahisiarahiso nasinge na owak ngara Herodia. 8 Nofa neramahi iyang ho ngete, ngete ho najiman, "Iyene niho ne iji to narany, nohou ho Yuwana Batista." 9 Ilongojita fa lohobu bebe to nahifiasu hongete, nyuo hati tanangatan hongete cebu to lati fad hulo fa obwoni nilonyesere hongete, ngete ho nahiramahiso ojo ongida igemi. 10 Osulahi ngete lati ongida ongutuni nohou ho Yuwana to lo tuarari. 11 Iyene fa nohou ho Yuwana to narany ho nahisiarahiso noho ine hito ngete ho nahiyaru niho hotenge. 12 Lolohejehi ho Yuwana ho nafwoniso itingoro nakwan hongete ho nafoten inuhahiso.Sing ho nafoten iramahiso niho Yesu. 13 Lofa nitiyir Yesu, ngete ho naloten tiye to natigol ho naloten nimaji na obengi lati to da. Lofa nitiyiri lati, sing ho nahijifaru Yesu te nehejiaha to hotua ho hangite. 14 Yesu ho nalotiniso nihatemeni hosing ho nateliniso nalohoi ho lati. Ngete ho namehino nihosing ho nahitingidar lahadiahak. 15 Nofa nara atari, lolohejehi ho nafwoniso jiman niho Yesu, "Ora anya maji aloleng, adoyoriso noholong. Torohoye lati, ongida sing ofwe nihotwa ho hang inyanga nenyata ho sing." 16 Yesu h najiman niho sing, "Ikie obu ofwe. Isiarahisi sing ibuo nangirang onye. " 17 Sing ho najiman niho Yesu, "Ohibwon ijie ho nebuneji miyet ho nahaiyem harik. " 18 Yesu ho najiman, "Iyenete sing niho ne." 19 Yesu ho nahiramahiso lati itwenge to namiyang nifok. Ngete ho nahi duhuniso ehule buneji miyet ho nahaiyem harik. Ho natiala nihide, ngete ho najohan ho nabianyan nabuneji ho nahisiarahiso niho lolohejehi. Lolohejehi honahihohwarahiso niho lati. 20 Onye fa sing many ifongi. Sing ho nahikukuruniso natonge ho nahitufutahiso ningerieji tomon-ho harik. 21 Lalwawa hula onya orahi fa nalif ongon nangorwo ho nemusak hama. 22 Ngete ho nahiramahiso lolohejehi odwahahini nitigol ongida itiemi to nahatemeni ho ngete no angati to do,ngete hetasarariso lati. 23 Lofa natuhohi ngete nahitasarariso lati, ngete ho naloten nidenge imojo. Lofa nara atari, abwon fa ngete hama. 24 Ati esiahita fa natigol nihiji ho hari na owak ilwaharu to nahuta ho lobwangi, ilolorita fa no lobwangi. 25 Nihisiahita hitel ongon no ho naharie Yesu ho nadahahino nihosing. 26 Lo fa nateli lolohojehi ngete odaha nito ho hari, obayangi fa sing ho najiman,"Otohari soni," sing ho nayo tanabayangi. 27 Nyuo hati Yesu ho natianya nihosing tiye ho najiman, "Ingiarajats! Ne ale! Hebayangata." 28 Petur ho nahi tarang ngete ojo, "Lohobu, nara iji laja, isiarahi ne alotu nahoji to nahari. " 29 Yesu ho najiman, "Kwo" Petur ho nadetino to tigol ho nadaharu to nahari nihisiahitere niho Yesu. 30 Lofa natelu Petur nolobwangi, ngete ho nabayangi. Nofa nawak ngete ingireriso, ngete ho nayo ojo, "Lohobu, italahu ne!" 31 Yesu ho nahifwotohiso nehene ngete niho Petur ho nahinef ngete ho najiman, "Iji ale omuta nahiruk, nanyuo iji irisa?" 32 Nofa nabwoni Yesu ho Petur nitogol, nolobwangi ho nabotia nahuta. 33 Lolohejehi to tigol ho nahitokwata Yesu ojo, "Tarihe ireji eha Najyok." 34 Nofa nalangi sing nahari, sing ho nafwoniso nifok ho Gennesaret. 35 Lofa natelini lati hene maji Yesu, sing ho nasulariso natianya nimasik fad ho nahiyeno noho Yesu lahadiahak. 36 Sing ho nahilelia niho Yesu ojo ongida sing otiri niger ho bongo ho ngete, lati hulo fa otiri nabongo ho Yesu ahorihini nangidari.