¹ Yesu ho naloten fa nidenge ho Olifa. ² Tona hubanyi berien ngete hona yitiniso Nitempulo, ce bu lati fad hona fonoiso niho ngete; ngete hona hitwongo nifok hona hitejiana sing. ³ Lahegierok ho lati ho laharisak hona hi yieno na ngorite na inefini tonepal ho ijianiso. Sing hona hijiahiso ngete nihiji. ⁴ Tiye scing ho najima n noho Yesu, ''Lahetejianani, inefini fa anya ngorite tona hiram ho eja, na obwin nicihit. ⁵ Tahanya niho necihita, ho Muse ohisiarahi ijie ojo ongida ohifada hulati; tatali iji hejo nahiram hongete?'' ⁶ Ojimi fa sing anya ojo ongida ohitenefu ngete ojo ongida ohibwon hebwo nasinge nihitwobere nahiram hongete, hatii Yesu hona hiradariso nifok hona higierehiso nimodie tonahafiala hongete. ⁷ Nofa netiringe sing hifiasu ngete, ngete hona botia nihide hona jiman nihosing, ''Ngete la obe honepalita tehiji hote, ikie ngete soni berien ifadahi namorwo nihongete.''(Nangorite) ⁸ Harii ngete hona hiradariso nifok, hona higiero fa nitodo homodie tonhafiala hongete. ⁹ Nofa netiyiri sing ngete, sing honadaha niger abito abito, ocifi tolaragang. Nilohichungi Yesu honatongon fa hama, hona ngorite nofa obwon nihiji hosing. ¹⁰ Yesu hona deto nihide hona jiman nihongete, ''Ngorite, ajiha lahetwobok hoji? Obe fa olo ohitorohoj iji?'' ¹¹ Ngete ho na jiman, Obe lobo, Hobu.'' Yesu hona jiman, Obehafa ne itorohoj ite. Ifwasi tenehoi hote; nohotahanya honepalita huja abengi.'' ¹² Harii Yesu hona tianya niho lati jiman, ''Ne alee nafangan hofok; ngete la ohijfito ne obu babu odaha nidimele hati obwon ba hona fangan hohisu.'' ¹³ Laharisak hona jiman nihongete, ''Ireji atwani la ijien nakwan hoji, obu najianan ho kwan hoji hama otirahi.'' ¹⁴ Yesu ho nahitarangahiso ho najiman niho sing, ''Dobu arane ahajianani hokwan hone tone, otirahi najianan hone. Ajien ne namaji na alotinere fane hona maji cebu na adaharine, hatii obu ite ijianata niho namaji na alotinere ne hona maji na alojiere ne. ¹⁵ Ingotetete nikwan;abu ne angot nahiram ho lobo. ¹⁶ Nomo nangotohi ne, otirahi nangoto hone nyuo obu ne hama, hatii ne ho Lamonye ngete lofa ohibatu ne. ¹⁷ Ee bo, niho nechihita hoji igierihini ojo netenyita ho ehule liawa harik otirahini. ¹⁸ Ne ale la ajien nahiramita tonakwan hone, ce bu ngete Monye hone lofa ohibatu ne lojien nahiramita ho ne.'' ¹⁹ sing hona jiman niho ngete, ''Aji Monye hoji?'' Yesu ho nahitarangahiso , ''obu ite ijanata ne kuya Monye hone; harado ijianatate ne, hejianatate do Monye cebu.'' ²⁰ Otianya fa ngete hunya hiramita niger honatunani toho ce itejianari ngete Nitempol, ce bu obe lobo fa otor ngete nyuo hobe noholongi hongete ofwoni. ²¹ Ngete hari ho najiman niho sing, '' Adaha ne niger; itahata hadite ne ce bu iyeyiata nihipalita hote. Namaji na alojiere ne, ahabu ite ifosu.'' ²² Lati ho Yahud ho na jiman, ''Hatum ngete ifadaya nakwan hongete, ngete la ojo, 'adaha ne, habu ite ifwosu'?'' ²³ Yesu ho najiman nihosing, ''Irahatate niho nifok; abwon ne nihide. Ite noho anya todo; obu ne noho anya todo. ²⁴ Inaha, ajo fane niho ite ojo iyeyiata nihipalita hote. Tohona nabu ite iruhoto toho anya hone, iyeyiata bete nihipalita hote.'' ²⁵ Sing hona jiman toda niho ngete, ''Ngai iji? Yesu ho najiman niho sing, ''Nasinge lofa ojo ne nihote tolocifot. ²⁶ Abwonitere ne nareji nalohoi ongida ateny ce bu ongida ajien (angot) nahiramita hote. Hatii ce bu, otirahi ngete lofa ohisulu ne; hoce bu nareji huja fa etiyiru ne niho ngete, hunya reji fa atianya ne nifok.'' ²⁷ Obu fa bu sing ojieni ojo atianya ngete noho sing nahiam hola Monye. ²⁸ Yesu hona jiman, netingusu ite nitodo lahito holeye, ngete na ijianata bete ojo ne ale, hoce bu ojo obune ehon ibwo nasing tonakwan hone. Toho itejianari fa Monye hone ne, Atianya ne hunya reji. ²⁹ Ngete lo fa osulu ne ohibwon ho ne, ce bu obu ohidahi ne hama,tiho egemitere mone noholngi fad nareji huja itokwame ngete.'' ³⁰ Ohori fa Yesu otianya hunya hiramita, nalohoi hona hiruk niho ngete. ³¹ Ojo Yesu niho ehule lati ho Yahud hula eruhi niho ngete, ''Newasihisite niho anya hutuk ho ne, hati ite irahatate alohejehi tarihe; ³² cebu ijianata natarihe, honatarihe ce bu ohilahu ite tohiramita.'' ³³ Sing hona hitarang fa ngete, ''Ohirejie ahejifitok ho Abramo hatii hobe mo ijie nitwara holobo latwani; tatali iji ijo jiman, ilahinete bete'?'' ³⁶ Yesu ho nahitarangahiso sing, ''Tarihe, tarihe, ajo ne nihote, latuani la ohorihi nepalita ngete latwarani. ³⁵ Obu lahatuarani osio nihaji jik; lahito ho Najjyok losio. ³⁴ Inaha, nahidahi ba ite lahito isabitati, isabitati ja be ite. ³⁷ Ajie ne ojo irahatate ahejifitok ho Abramo; etahatate ne nohohifadariso tona nyuo obe namiji hotianya hone nihote. ³⁸ Ajo ne ojo nareji huja atelu ne niho Monye hone, hoce bu igiamaritite nareji huja itiyirusu ite nihomonye hote.'' ³⁹ Sing hona hitaranahiso hona jiman niho ngete, ''Monye hojie Abramo.'' Yesu hona jiman niho sing, ''Haraduo irahatate emusak ho Abramo, hegiamata dwo te nahigiama ho Abramo. ⁴⁰ Nyuo hati, itahitete nohifadaraso ne, latua la ohiramahi ite natarihe naja etiri ne fa niho Najyok. ⁴¹ Obu fabu Abramo igem anya. Obu ite igiamariti noho Monye hote.'' Sing hona jiman niho ngete, ''Obu fa bu ohiyisini ijie tona somon; ohibwonitere ijie Monye abito, Najyok.'' ⁴² Yesu hona jiman niho sing, ''Haraduo Najyok amonye hote, hekwamati dote ne, aringu ne lotiniso many niho Najyok, obu ne alotu to nakwan hone, hatii ngete lohisulu ne. ⁴³ Nanyuo hati ite obu itiyirati nahutuk hone? Ngete na ce habu ite idihata hitiyira nahiramita hone. ⁴⁴ Irahatate loho Monye hote, larohojani, ikwamatite nahigiamari nesomita homonye hote. Ora fa ahefadani tolocifot hoce bu obu obotia nitarihe nyuo obe natarihe niho ngete. Natianya ngete nagesemi, otianya toho obwonitere ngete nyuo ora ngete ahagesemeni hoce bu lamonye hogesemi. ⁴⁵ Nyuo hatii ne atianya natarihe, ite obu iruhoto ne. ⁴⁶ Ngai lobo nihote la ohorihi nihone nepalita? Natianya ne natarihe, nanyu ite obe iruhoto ne? ⁴⁷ Ngete la ora noho Najyok itiyira netenyita hojyok; obu ite ityira sing nyuo obu ite irahata loho Najyok. ⁴⁸ Lati ho Yahud hona hitarangahiso hona jiman niho ngete, ''Tarihe obu ijie ohitianya ojo ira iji Samaria ce bu ibwonitere namininga." ⁴⁹ Yesu ho nahitarang sing ojo,"Abu ne abwon ho namininga;ati abayang ne Monye hone,cebu ite obu ibayangata ne. ⁵⁰ Obu ne atahito nakwatan ho ne; obwon lobo lotahito hoce bu longoto nahiramita. ⁵¹ Tarihe, tarihe, ajone niho iji, latum lobo otun natianya hone, obu babu ngete otele nayeyi.'' ⁵² Lati ho Yahud ho najiman niho ngete, ''Tahanya ohijien ijie ojo ibwon iji honolohailong nebot. Abramo hola Profetaji ayeyi; iji hatii ijo, 'Natunuto lobo nahiram hongete, obu babu ngete imang nayeyi.' ⁵³ Obu iji ilany Monye hojie Abram lofa ayee, hetum iji? Laheramahitani la ayee. Ngai iji ihon to nakwan hoji olo niger?'' ⁵⁴ Yesu ho nahitaranginiso, Netokwata ne nakwan ho ne, obe nakwatan ho ne; ngete Monye ho ne lohitokwata ne-ngete la itenyitete ojo ngete Monye hoji. ⁵⁵ Hobu te ijianata ngete, nyuo hatii ijien ne ngete. Hara ajone, 'abune jien ngete, 'haradone toho te, ahagesemini.Hatii ce bu, ajien ne ngete hoce bu agolitere nahiramita hongete. ⁵⁶ Monye hote Abramo akwama nitialari hoholong hone; otel ngete ojo ongida fa bebe.'' ⁵⁷ Lati ho Yahud hona jiman nihongete, ''Hobu iji isiahita niho nengaji nehejek miyet, hoce bu iher iji Abramo?'' ⁵⁸ Yesu hona jiman niho sing, ''Tarihe, tarihe, ateny ne nihote, many hobe oyisini Abramo, NE LABWON.'' ⁵⁹ Tiye sing hona hikukuro namori hona hifada toho nihongete, hatii Yesu ho nahidimahiso nakwan hongete ho naloten niger to Tempulo.