¹ Tahanya lofa najien Yesu ojo itiyiri lati ho Farise ojo ihwana fa ngete cebu ijuho bebe ilany Yuwana ² (adobu obu fa Yesu ijuho to nakwan hongete, nyuo hati lolohejehi hongete), ³ idahi ngete ho nahidahiso Yudeya ho naloten toho Galileya. ⁴ Tahanya osiriu fa niho ngete nilojiere hara Samariya. ⁵ Ngete ho nalotiniso nihang nahitwahajik ho Samariya, na ongele Sichar(Saika), na onyiha nihang nofa isiarahi Yakobo niho iha langete Yosefo. ⁶ Obwon fa nabwal ho Yakobo da. Iniama fa Yesu to nadaha hongete ho nahitwongo nibwal. Ora fa akil ofarani. ⁷ Olo fa ibwo nangorite ho Samariya nahari, Yesu ho na jiman niho ngete, "Isiarahi niho ne hinihe nahari homata." ⁸ Lolohejehi hongete naringari tiye nihang na obolo ofwe hinyanga nangirang. ⁹ Ene ngorite ho Samariya ho najiman niho ngete, Tatali hati ite, loho Yahud,ifiasete ne , nangorite ho Samariya, to nasinge na omata?" Obe lati ho Yahud itile ho lati ho Samariya. ¹⁰ Yesu ho nahitarangahiso ngete, "Nejien iji neyalita ho Najyok, cebu ngai ngete la otianya niho iji, 'Isiarahi ne nematita,' hatum dwo iji ifi ngete, ongida ngete siarahi iji nahari ho hisu." ¹¹ Ene ngorite ho nahigaminiso, Lolohitwahaji, obu ji ibwon ho neyohit ho hari, cebu owudo nadial. Aji be ji ihori nahari na isu? ¹² Obu ji ibolo, ibolo ji, ilany Monye hojie Yakobo, lo fa ohisiarahi ijie nadial omati cebu ngete to nakwan ho ngete, toho ihwanariti lemusak ho nahusuk hongete?" ¹³ Yesu ho nahigaminiso, ''Latwani la omatito hunya hari onya ba nahifiriyong hari, ¹⁴ nyuo hati latwani la omatito nahari hinihe huja esiarahi ne obu ba nahi firiyong onya ngete hari. nyuo hati, nahari huja esiarahi ba ne niho ngete ofwoni ba niho ngete to fotiri ho hari huja ifuruni niho nahisu na osio jik." ¹⁵ Nangorite ho najiman niho ngete, "Lolohitwahaji, isiarahi ne hunya hari ongida ne abe abwon ho nahifiriyong cebu abe alotinita inyi iyohitito nahari." ¹⁶ Yesu ho najiman niho ngete, "Ilo, tongeleni habila iji, iyitu hari inyi." ¹⁷ Ene ngorite ho nahitarangahiso, ho najiman niho ngete, "Abu ne abwon ho laleye, "Yesu ho nahigaminiso, " Eteny ji angida, 'Obe habila ne,' ¹⁸ ebwonitere ji ho laliawa miyiet, laja ibwonataho ji tahanya obu habila iji. Tanya teny ji angida." ¹⁹ Nangorite ho najiman niho ngete, "Lolohitwaji, ateli ne ojo ireji aheramahitani ho hiramita (Lapodofeta). ²⁰ Monyie hojie fa omojitite niho anya denge, nyuo hati ite hule ijimata ojo ora Yerusalem amaJi na owak lati omojiterete." ²¹ Yesu ho nahigamahiso niho ngete, "Ngorite,iruho niho ne, alotiniso noholong naba imojore ji Lamonye kuya niho anya denge kuya Yerusaleme. ²² Ite hule imojete nasinge na obu te ijianata. Ohimojo jie nasinge na ohijien ijie,olotu nahitalahino niho lati ho Yahud. ²³ Nyuo hati alotiniso noholong, tahanya anya inyini, lomo ba lamoje lahamojok Lamonye niho lohailong ho nitarihe, otahitito Najyok kudit ho hula ti ongida orahi ahamojok hongete. ²⁴ Ora Najyok Alohailong, cebu lati hula omoje ngete ongida omoje to nohailong ho natarihe." ²⁵ Ene ngorite ho najiman niho ngete, "Ajien ne ojo olotiniso Lohobu(Messeya)(Lofa ongele ojo Kristo). Lomo ba nalotu ngete, iramahi ba nareji fad nihojie." ²⁶ Yesu ho najiman niho ngete, " Ne, ale atinya niho ji, ne ngete." ²⁷ Tiye nihene holong lolohejehi hongete ho nayitiniso. Tinya ongangalate fa sing ojo nanyuo ngete otianya ho nangorite, nyuo hati lobo obe ojo, "Nanyuo ji iwak?" kuya cebu jiman "Nanyuo ji itianyati hongete?" ³⁰ Ene ngorite ho nahidahiso namoti ho hari hongete, ho nayiteriso nihang, ho najiman niho lati, ²⁹ "Ifwosu, totialata latwani la ohiramahi ne nareji fad huja ehon ne.Obu Kristo ale, ngete ale?" ²⁸ Sing ho nahidahiso nahang ho nafwoniso niho ngete. ³¹ Ifiase fa lolohejehi ngete, jiman, "Lahetejianani hojie,(Rabbi),to nya ibwo na singe. ³² Nyuo hati ngete ho najiman niho sing, "Abwonitere ne ho nangirang ninyesere na obu te ijianata. ³³ Lolohejehi to da ho najiman nikwanite hosing, " Obe lo iyeno ibwo nasinge niho ngete ongida onya, eyene fa sing?" ³⁴ Yesu ho najiman niho sing, " Nangirang ho ne ora nohohigiamari nahiramita hongete lo fa ohisulu ne ongida atuhohi nahigiama hongete. ³⁵ Ibe te ijimata ojo, 'Orahi nayiafaji ongon noho nalotiniso hodengo'? Ajo ne nihote, totialati nihide ce itel namana, adori sing noho denginiso! ³⁶ Ngete la odenginita ifwotinita nedumuta cebu ifurohita nahanger ho kiani noho nahisu na osio jik, ongida ngete la oremo ho ngete la odenginita otum okwame harabito. ³⁷ Toho niho anya tianya otir, 'Lobo oyia, cebu lobo odenginita.' ³⁸ Ahisuluya fa ne ite nidengo ho singe na ho obu te igemusu. Hilihe ligemi, ite to nakwanite hote iruhisi nihigiama ho sing.'' ³⁹ Iruhi nalohoi ho lati ho Samaritan nihene hang niho ngete tananyuo to nahiram ho nangorite nofa iramahi ngete ojo, "Iramahi ngete ne nareji fad huja ehonitito ne.'' ⁴⁰ Lofa nafwoni lati ho Samaria niho ngete, sing ho nahitik ngete ongida itwonge hosing, ngete ho nahitwongo da noholongi harik. ⁴¹ Olwaji ba hula iruhi tananyuo to nahiram hongete. ⁴² Otianyie fa sing niho nangorite, ''Ohiruk ijie, obu to natianya hojie hama, to ho ahitiyiru jie to nakwanite hojie, cebu ohijien ojo ngete ha ale tur lahetalahani hofok.'' ⁴³ Nihalu ho ehwe holongi harik, ngete ho nadeto toda toho Galileya. ⁴⁴ Yesu to nakwan hongete ho nahiramahiso ojo laheramahitani ho hiramita ho Najyok obe ho nahang hongete. ⁴⁵ Lo fa nalotu ngete nihotwa ho Galileya, lati ho Galileya hona hifwotiniso ngete. Atelini fa sing nareji fad huja ehon ngete nihotwa ho Yerusalem niholong ho nyasu, cebu sing ho nafwoten niho ene nyasu. ⁴⁶ Tinya ngete ho nalotiniso hari kana na obwon Galileya, niho lofa namaji ihuhumari ngete nahari abalu. Obwon fa lobo lahaboloroni ho hang la odiaha lonyi da Kapanaume(Capernaum) . ⁴⁷ Lo fa netiyir ngete ojo edahi Yesu Yudeya ho nayiteriso toho Galileya, ngete ho naloten niho Yesu ho nataniniso ngete ongida ongiru nifok odwany iha langete, lofa anyiha nabiangarahiso. ⁴⁸ Yesu tiye ho najiman niho ngete, ''Mayak netialatate ite lati hunya hitelehita cebu nahigemita huja ogoli, obu ba te iruhoto.'' ⁴⁹ Lahegiamak ho najiman nihongete, ''Lolohitwahaji, kwo nifok many hobe lahito ho ne oye.'' ⁵⁰ Yesu ho najiman niho ngete, ''Ilo; isu iha ji.'' Ele twani ho nahiruk natianya na oteny Yesu niho ngete, ho na loten nehoi hongete. ⁵¹ Lo fa ngete ijuru ejuru, lahegiamak hongete ho nahiriamahino ho ngete,ho na jiman ojo esu iha langete. ⁵² Ngete ho na hifi sing noholong lo fa isiahari ngete yiahahinere. Sing ho nahigaminiso ngete, ''Ngole to narif-rif nahatere ho nabiangan niho ngete.'' ⁵³ Tinya monye ho nahiruhohiso ojo ora fa niho anya holong ho tari ojimitere Yesu niho ngete, ''Esu ihe ji.'' Ngete to nakwan hongete ho lati ho nihaji ho ngete fad eruhi. ⁵⁴ Ara anya fa noho harik na iteleyehi Yesu ngete olotu to Yudeya toho Galileya