¹ Obwon fa lobo latwani la onya nafure ho ngete Nikodemo, la ora fa alohitwahaji ho lati ho Yahud. ² Olotu fa ngete niho Yesu to naharie ho najiman niho ngete, "Rabbi,(Lohobu) ohijien ijie ojo ira ji ahetejianani la ilotu niho Najyok obe lobo otum igem hunya reji olweji igem mayak nabwon Najyok niho hongete." ³ Yesu ho nahitarangahiso niho ngete, "Tarihe, tarihe, mayak nayisini lobo hari, obu babu ngete otel nahang ho Najyok." ⁴ Nikodemo ho najiman niho ngete, "Tatali latwani hatum oyisini hari ngete hati le eragang? Habu ngete iruyo noho harik nihotwa ho hotenge ojo ongida oyisini ngete, hatum ngete?" ⁵ Yesu ho nahigaminiso ojo, "Tarihe, tarihe, mayak nayisini lobo to nahari ho to Nolohailong, obu ngete otum iruyo nihang ho Najyok. ⁶ Tatwani la oyisini atiang ngete natiang, ngete la oyisini to Nolohailong ngete nolohailong. ⁷ Hebiangata ibayangahiso ojo ateny ne nihote, 'Ongida ohiyisini ite hari.' ⁸ Ohuta nolobwangi toho namaji na owahitere ngete. Itiyiratete nakwatan hongete, nyuo hati ibe ijianata tayidwo ngete olotu kuya tahaji ngete olo. Ngete na litwani la oyisini to Nolohailong." ⁹ Nikodemo ho nahigaminiso ho najiman, "Tatali hunya reji hatum obwoni?" ¹⁰ Yesu ho nahitarangahiso ngete, "Ireji ahetejianani ho Isarayil, nyuo hati obe ijien hunya reji? ¹¹ Tarihe, tarihe, ohitianya jie nasinge na ohi jien ijie, cebu ohituju nasinge na ahitelu ijie. Nyuo hati ite lati obu iwahata iruhohiso natianya hojie. ¹² Niramahi ne nihote lati nareji ho nifok nyuo hati te ibe iruhoto, tatali hati ba te iruhoto nahiramahi ne ite nahiramita ho nihide? ¹³ Hobe lobo fa odok nihide mayak ngete lo fa ongiru to hide,Iha Najyok. ¹⁴ Toho itinginere fa Muse nahiriahu nitimere, cebu ongida otingi Iha Najyok nitodo ¹⁵ ojo ongida lati fad hula iruhi niho ngete otum obwoniterete ho nahisu na osio jik. ¹⁶ Okwama Najyok nafok, ojo esiarahi ngete Iha langete la obwon hama, ojo latwani la iruk niho ngete obu ba oyee nyuo hati obwon ba ho nahisu na osio jik. ¹⁷ Obu Najyok fa osulu Lonyi inyi nifok ojo ongida itorohoj nafok, nyuo hati ojo ongida nafok italahino to ngete. ¹⁸ Ngete la iruk niho ngete obu ba itorohoji. Ngete la obu iruk etorohoji fa many berien tananyuo obu ngete iruk nifure ho Iha Najyok la obwon hama. ¹⁹ Ngete anya nahiram hongoto, ojo alotu nafangan nifok, cebu okwama laliawa nedimele ilany nafangan tanahimot ho higiamita hosing huja. ²⁰ Latwani la ihwana nareji huja iboti idaya nafangan obu olotu nifangan ojo ongida nahigemita hongete obe iteleni. ²¹ Nyuo hati, ngete la igiamari natarihe olotu nifangan ojo ongida nahigemita hongete oleyeji angida cebu ojo iyiene fa sing nabayangi niho Najyok. ²³ Nihalu hanya, Yesu ho lolohejehi hongete ho nafwoten fa nifok ho Yudeya. Ofaran fa ngete hosing nihibatisere. ²² Ibatiso fa cebu Yuwana niho Aenon na onyiha Salim tanabwanan ho hari na obolo da. Ofwonite fa lati niho ngete ho nihijuhere, ²⁴ hobu fa ibirehini Yuwana nilotwarari. ²⁵ Tiye abwon fa narisahino niho hilihe lohejehi ho Yuwana ho latwani ho Yahud to nahiram ho hilalasu. ²⁶ Sing ho nafwoten niho Yuwana ho najiman niho ngete, "Rabbi, lofa ibwanata hoji tongati hohari ho Jordano, lofa itenyitito ji, totiala, ejuho ngete,lati fad ofwojiereti nihongete ." ²⁷ Yuwane ho nahigaminiso, "Habu latwani otum ifwotu ibwo nasinge mayak nesiarahini niho ngete tohide. ²⁸ Ite ta nakwanite hote hatum ite iramahisi ojo ajo fa ne, 'Abu ne ara a Kristo' nyuo hati ajo ne , 'Osuluni fa ne many ho be ngete.' ²⁹ Ngete la obwon ho nahurie ngete lahudangani la owak yiama.Tahanya lamorite ho la owak iyiama, la obotia cebu itiyira, okwama tonagolon bebe tananyuo tonamurut ho lahayiama. Anya, ngete, nakwama ho ne na ihuhumahino fad. ³⁰ Ongida ngete ofunahino, nyuo hati ne owak ne enyak. ³¹ Ngete la olotu tohide ora ngete aloho lihide. Ngete loho nifok ora ngete loho nifok cebu otianya nareji ho nifok. Ngete la olotu tohide ngete ilany fad. ³² Ngete la iramahi niho nasinge na atelu ngete cebu itiyiru, nyuo hati obe lobo latwani iruk nihiramita hongete. ³³ Ngete la ifwotu nahiramita hongete ajien ngete ojo ora Najyok tarihe. ³⁴ Ngete la fa osulu Najyok otianya natenyita ho Najyok. Oobu ngete isiarahi Nolo hailong to natiama. ³⁵ Okwama Lamonye Lonyi ho nahisiarahiso nareji fad nihene hongete. ³⁶ Ngete la iruk niho Lonyi obwon ho nahisu na osio jik, nyuo hati la itahajasu Iha Lamonye obu otel nahisu, nyuo hati nahilongojita ho Najyok epungohine niho ngete."