1 Nihalu lofa nateny Yesu hunya hiramita, ngete ho naloten niger ho lohejehi hongete to ho nipwang ho Kidron, namaji lo fa obwonitere namana na iruhinere ngete, ngete ho lohejehi hongete. 2 Tahanya Yuda, lofa olo hitafadariso ngete, ojien cebu namaji, odahitito fa Yesu da noholongi fad ho lohejehi hongete. 3 Tiye Yuda, nihifwotiniso ehule lasegere ho lolohitwaha ho segere cebu ho padiri cebu habolorok ho Isarayil, afwoni fa ida ho na biliata huja itihiterete nangadief ho hima, hona toci,ho nahicholi. 4 Tiye Yesu, lofa ojien nareji fad huja ihoni nihatemeni hongete, ho naloten nihatemeni cebu ho nahifi sing, ''Ngai te itahitete?'' 5 Sing ho nahitarangahiso ngete, ''Yesu ho Nazaret.'' Yesu ho najiman niho sing, ''Ne alee. ''Yuda, lofa itenyiangaya ngete, obotia fa cebu niger ho segere. 6 Lo fa najo ngete nihosing, ''Ne alee, ''sing ho nayiteriso toho nihalu ho nahuyari nifok. 7 Tiye ngete ho nahifi fa sing, ''Ngai hati te itahitete?'' Hari sing ho najiman, ''Yesu ho Nazaret.'' 8 Yesu ho nahitarangahiso, ''Ahiramahi ne ite ojo ne ale; netahitete ne, ikie hule hilihe ofwe.'' 9 Ojo fa anya ojo ongida natianya otumohino naja ojo ngete: ''Tehule fa isiarahi ji ne, abu ne itilitaya kilang abito.'' 10 Tiye Simone Petur, lofa obwon ho na nademi(nasinge nofifi), igier ngete hona behon ele lahegiamani hopadiri cebu ho na nguton neteten hohijiok hele twani. Tahanaya onya fa nafure hele lahegiamani Malchu. 11 Yesu ho najiman niho Petur, ''Inyiahahi nademi hari nilokobol hongete. Toho nakoch na ohisiarahi ne Lamonye, habu ne atum amat ngete?'' 12 Tiye lasegere ho lolohitwaha hosing, ho lahegiamak ho Yahud, ho nahinefiniso Yesu to nagol ho natwaran ngete. 13 Sing ho nahinyiamaru ngete niho Anna, ngete la ora fa ahomoni ho Kaipa, lafa ora ahouti hopadari ene nga. 14 Tinyia fa ngete Kaipa lofa isiarahi nahitotoso niho lati ho Yahud ojo osiriu latwani abito ongida oyee to lati. 15 Simone Petur ho nahijifaru Yesu, ojo lobo lolohejek.Ojien fa lolohitwahaji ho padari ele lohejek cebu ngete ho nahiruyoriso ho Yesu nilo Kiho ho padiri la ilany fad; 16 nyuo hati Simone Petur obotia fa niger hekat.Lobo lolohejek, lofa ojien lolohitwaha ho padari, ho naloten niger ho natianya niho nangorite lofa itieso nikat ho na hiyieno Petur. 17 Tiye ene hongorite na itieso nikat ho na jiman niho Petur, ''Obu ce bu ji ira alohejek hale twani?'' Ngete ho najiman, ''Obu ne ara.'' 18 Tahanya obotie fa lahegiamak ho lolohitwaha da; osuje fa sing nahima, irebi fa bebe. Obwon fa cebu fa Petur hosing, osuja nahima nolobotie. 19 Lolohitwahaji ho padari ho nahifi Yesu to nahiram ho lohejehi hongete cebu to nahitejiana hongete. 20 Yesu ho nahitarang ngete, ''Ateny ne atulang niho nafok; etejianatito fa ne di Nilomojere cebu Nitempolu nimaji na ofwonitariti lati ho Yahud fad harabito. Obu fa ne amwanga ibwo nahiram. 21 Nanyuo ji ifiasu ne? Ifia hula etiyiri fa ne nahiram naja fa ajo ne. Ojieni hula ti nareji hulo fa ateny ne.'' 22 Nofa nateny Yesu anya, lobo niholohitwaha la obotia fa angati ho na hipihiniso Yesu tenehene hongete ho na jiman, ''Ngete na nehoi nahatum iji itarangari nolohitwahaji hopadari?'' 23 Yesu ho nahitarang ngete, ''Nateny ne ibwo nasinge na oroho, torahata ahatafak ho rohoji.Nyuo hati , netarang ne angida, nanyuo ji ibek ne?'' 24 Anna tiye ho na sulahiso Yesu ala otwara niho Kaipa lolohitwahi ho padari. 25 Obotia fa Simone Petur osuja cebu nahima. Lati tiye ho najiman niho ngete, ''Ibe cebu ji ira alohejek hongete?'' Ngete ho namwanan ho najiman, ''Obu ne ara.'' 26 Lobo lahegiamani ho lohitwahaji ho padari, lofa ora atwani hele twani ongut Petur nahijok ho najiman, ''Abe fa ne ahitialahi iji hongete nihotwa ho mana?'' 27 Tiye Petur ho namwanan hari, tiye nolohohoro nahikwohita. 28 Sing ho nahinyaru Yesu tiye ho Kaipa toho nihaji. Hora fa ahubanyi, sing to na kwanite hosing obu iruhini nihaji ojo ongida obu itoboti sing cebu ojo ongida sing onye nebune na obu iharutohini ho nabula. 29 Tiye Pilato ho naloten nihosing ho na jiman, ''Ani hitwobo anya iyeneretete ale twani?'' 30 Sing ho nahitarang ho najiman nihongete, ''Hara obu ale twani ora ahegiamani la oroho, habu dwo jie ohisiarahi ngete many inyi hoji.'' 31 Pilato ho najiman niho sing, ''Iyariti ngete tonakwanite hote, ifwasi to ingototo nahiram hongete to nechihita hote.'' 32 Lati ho Yahud ho najiman niho ngete, ''Obu ongida nihojie nihihwanahinere lobo latwani niyeyi.'' Ojimi fa sing anya ojo ongida natianya ho Yesu imumudahino,natianya lo fa otenyuo ngete na itelehi ojo ano yeyi hadi ngete alotu yeyi. 33 Tiye Pilato ho nahiruhiso nihaji hari ho na ngeleniso Yesu; ngete ho najiman niho ngete, ''Ira ji ahobu ho Yahud?'' 34 Yesu ho nahitarangahiso, ''Ifiasu ji anya tonohou hoji, kuya ahiramahini iji hilihe lati ojo ongida ji ifi ngete niho ne?'' 35 Pilato ho na hitarang, ''Abu ne ara aloho Yahud, ara ne? Nahang hoji ho lolohitwaha ho padiri lohiyiene iji niho ne; nanyuo ji ipalaya?'' 36 Yesu ho nahitarangahiso, ''Nahang ho ne obu ora noho anya fok. Hara ohorihi nahang hone fa ora angati tinyi ho fok, hangalase dwo lahegiamak ho ne ojo ongida obu ohisieri ne niho Yahud. Tarihe obu nahang ho ne olotu tinyi.'' 37 Pilato tiye ho najiman niho ngete, ''Ira ji ahobu?'' Yesu ho nahitarangahiso, ''Ijo ji ojo ara ne ahobu. Tanya hiram ahiyisini fa ne, cebu tanya hiram alotu ne inyi nifok ojo ongida ne ara ahiririani latarihe. Toho itiyirariti lati hula orahi loho natarihe namurut ho ne.'' 38 Pilato ho najiman niho ngete, ''Nanyuo ngete natarihe?'' Nofa nateny ngete anya, ngete ho naloten niho lati ho Yahud ho na jiman niho sing, ''Abu ne ahorihi ibwo nepal niho ale twani. 39 Ibwanatate ho nemanyit na ojo ongida ne alahahi latwani abito nihote niholong honyasu nebune na obengi nabula.Iwahatate ne alahahi lohobu ho Yahud?'' 40 Tiye sing ho nayio hari ho najiman , ''Obu ale twani, nyuo hati Barabba.'' Ora fa Barabba ahahohwalani.