¹ ''Ateny ne hunya hiramita niho te ojo ongida obu ototwabahite ite. ² Ohiduhari ba sing ite to tomaji ho lomojere; tarihe, alotiniso noholong, ngete la ohifadaya ite ojo ba egiama ngete nahigiama na ongida niho Najyok. ³ Igemi ba sing hunya reji tananyuo obu sing ojieni Lamonye kuya ne. ⁴ Ateny ne hunya hiramita nihote ojo ongida lomo nalotu noholong niho sing, ongida ite ihuyasu sing cebu tatali ahiramahi ite to sing. Obu fa ne ahiramahi ite hunya reji tolochifot tananyuo abwon fa ne hote. ⁵ Nyuo hati, tahanya alone nihongete lofa ohisulu ne; nyuo hatii obe lobo ohifi ne, 'Aji iji ilo?' ⁶ Tananyuo ateny ne hunya reji nihote, efut nahilongojita natajio hote. ⁷ Ahiramahi ne ite natarihe: ongida nihote ojo ikie ne alo niger; nabu ne alo niger,obu ba Lahatanani olotu nihote;nyuo hati nalo ne, asulu ba ne ngete nihote. ⁸ Lomo nalotu ngete, otor hadi Lahetatangani nafok to nepali, cebu niho nangidari cebu nangoto-- ⁹ nihiram hepalita, tananyuo obu sing iruhi niho ne; ¹⁰ ta natarihe, tadaha ho ne niho Lamonye; ce bu obu ba te itialata ne hari; ¹¹ cebu tona hiram hongoto hohiramita,tananyuo angoti fa lohobu hanya fok. ¹² Olwaji nareji huja awak ne itianya nihote, nyuo hati obu ba te ijianata sing tahanya. ¹³ Nyuo hati, lomo nalotu ngete, Nolohailong ho Tarihe, ohinyamaru ba ngete ite nitarihe fad; obu ba ngete otianya to nakwan hongete; nyuo hati nasinge na itiyiri ngete, oteny ba ngete ehwe reji; cebu ohitujiohi ba ngete nihote nareji huja ofwonise. ¹⁴ Itokwata ba ngete ne, iyaru ba ngete nareji ho ne cebu itujohi nihote. ¹⁵ Nareji fad huja obwonitere Lamonye orahi anoho ne; inaha, ajo ne ojo iyaru ba Nolohailong nareji ho ne cebu ho natujiohiso nihote. ¹⁶ Kai, ite ba abu itialata ne; nihalu kai, ite ba etelusu ne.''' ¹⁷ Nolohejehi hongete hilihe ho natianya fa nikwanite hosing, ''Nanyuo naja lojo ngete nihojie, ''Noho kai, ite abu itialata ne, 'cebu hari, 'Kai hari, ite ba etialata ne,'ce bu, 'Tona nyuo alo ne niho Lamonye'?'' ¹⁸ Sing ho najiman inaha, ''Nanyuo anya lojo ngete, 'Niho kai'? Obu jie ohijien nanyuo ngete otianya.'' ¹⁹ Yesu ho nateliniso ojo owahi fa sing ifiasu ngete, ngete ho najiman niho sing, ''Ifiasetete nakwanite hote niho anya, ajone, 'Niho kai, obu ba te itelusu ne; nihalu kai harii, ite etelusu ne'? ²⁰ Tarihe,tarihe, ajo ne nihote, iyete ba te cebu imehinete, nyuo hati nafok okwama ,imehinete ba te nyuo hati namehino hote ibieli ba akwama. ²¹ Omehino nangorite lomo niboriasu tananyuo alotu noholong hongete nitomonari; nyuo hati lomo natomon ngete lahito/nahito, ngete ho nalulworo namiajan hongete tananyuo ta nakwama ojo ayisini fa lahito inyi nifok. ²² Ite cebu, ibwanatate hona himujuta tahanya, nyuo hati atel ba ne ite hari; cebu okwame ba najio hote, obe hadi lobo otum iyaru niger nakwama hote nihote. ²³ Nihene holong obu hadi te ifata ne hinihe nahiramita. Tarihe, tarihe, ajo ne niho te, nefiatate ibwo nasinge niho Lamonye, ohisiarahi ngete ite tanafure ho ne. ²⁴ Many tahanya hobu te ifiata ibwo nasinge tanafure ho ne; ifiata, cebu ifwotusu ba te ojo ongida nakwama hote obwon nefut. ²⁶ Nihene holong ifiata hadi te tanafure ho ne, abu hadi ne ajo nihote amojo ba ne niho Lamonye to te; ²⁷ toho Lamonye tonakwan hongete ohikwama ite nyuo ikwamatite ne hoce bu iruhoto ne ojo alotu fane niho Lamonye. ²⁸ Alotu ne niho Lamonye, alotu ne inyi nifok; hari, adahiso ne nafok,adaha ne niho Lamonye.'' ²⁹ Nolohejehi hongete ho najiman, ''Totiale, tahanya itianya ji natianya na onyila ; obu ji itianya natianya na obu lati ojieni. ³⁰ Tahanya ahijien ijie ojo ijien iji nareji fad, cebu obu ji iwak lobo latwani ohifi iji nahiramita. Nyuo to anya, ohiruk ijie ojo ilotu iji niho Najyok. ³¹ Yesu ho na hitarangahiso sing, ''Eruhotote tahanya?'' ³² Totialata, alotiniso noholong, ee, cebu alotu tarihe, lomo ba nesarahisi te, lobo nimaji hongete, cebu irwatahisi ba te ne hama.Nyuo hati obu ne abwon hama tansnyuo obwon Monye ho ne. ³³ Ateny ne hunya hiramita niho te ojo ongida niho ne,ite ibwanata ho nayomo. Inyi nifok ibwanatate ho nahiramita, nyuo hati etogoloto nakwanite: Elanyu ne nafok."