Nengat 15

1 ''Ne ale latarihe ho kiani(vine), cebu Monye ho ne lahenujani ho kiani. 2 Iyarita ngete nakana niho ne huja obu ongiji, cebu itinyilaj nakana abito abito na ongi ojo ongida ongi bebe. 3 Enyilajatate tananyuo to nahiram na ateny ne nihote. 4 Iwasihisi niho ne, cebu ne nihote. Toho obu nakanati ho kiani ongii nikwan hongete mayak nadafahino nikiani,habu otum ite, mayak niwasihisi te niho ne. 5 Ne ale lakiani(vine); irahatate akana. Ngete la iwasihi niho ne cebu ne nihongete, ngete ale twani ongi bebe, to ne hama ihwanata ba te nateji fad. 6 Nabu lobo iwasihi niho ne, ibireri ngete niger toho nakanati ho kiani itoyohojori; ifufurohini lati nakana ho nahibireriso sing nihima, sing ho naswahariso. 7 Newasihisi te niho ne, cebu netenyita ho ne iwasihini nihote, ifiasete nasinge na iwahatate, ihoni ba nihote. 8 Niho anya, etokwati Monye ho ne, ojo ongida te engijatate bebe cebu ojo irahatate alohejehi ho ne. 9 Toho okwamari Lamonye ne,ongida cebu ne abwon ho na kwama nihote; iwasihisi nikwama hone. 10 Neniafatate nechihita ho ne, iwasihisi ba te nikwama ho ne toho enefitere ne nechihita ho Monye ho ne cebu ewasihi nikwama hongete. 11 Ateny ne hunya reji nihote ojo ongida nakwama ho ne obwon nihote cebu ongida nakwama hote ihuhumahino nefut. 12 Ngete anya nechihit ho ne, ojo ongida ite ikwamati lati abito abito toho akwamari ne ite. 13 Obe lobo okwama ilany anya, ojo ongida ngete isiarahi nahisu hongete to la morit hongete. 14 Irahatate amorit ho ne negiamatite nareji huja ahichihahi ne ite. 15 Abu ne ahingeleso ite ojo ahigiamak, toho lahegiamani obu ojien ojo nanyuo Lahetegiamani hongete ihwana. Angele ne ite amorit, toho etejien ne nihote nareji fad huja etiyiru fa ne niho Monye ho ne. 16 Obu fa te inyumusu ne, nyuo hati ne lahinyumu ite cebu ahiwutu ite ojo ongida ifwasi ngijan, cebu nihanger hote iwasihini. Itelehi anya ojo niho nasinge na ifiasetete niho Lamonye to nafure ho ne, isiarahi ba ngete nihote. 17 Eramahi ne hunya reji niho te, ojo ongida ite ikwamati lati fad. 18 Nara nafok lohidaya ite, tojianata ojo ahidaya ne ngete hobe ngete ohidaya ite. 19 Hara irahatate alati ho lifok, akwama dwo nafok ite toho lati ho ngete; nyuo hati obu te irahata loho nifok cebu ahinyumu fa ne ite tofok, tanya hiram ojo ahidaya ite nafok. 20 Ihuyasu natianya nofa eramahi ne nihote, 'Obu lahegiamani obolo ilany lahetegiamani hongete.' Nahitegemi sing ne, ohitegemi ba cebu sing ite; nagoliterete sing natianya ho ne, ogoliterete ba cebu sing nohote . 21 Igemi ba sing hunya reji fad nihote tonhiram ho fure ho ne tananyuo obu sing ojieni ngete la ohisulu ne. 22 Hara abe ne alotu atianya niho sing, habu dwo sing obwoniterete ho nahipalita; nyuo hati tahanya obengi sing ho nahifiasu niho nepalita hosing. 23 Ngete la oswa niho ne oswa cebu niho Monye ho ne. 24 Hara abe ne ihon nahigemita nihiji hosing huja obu lobo igem fa, habu dwo sing obwoniterete nepal; nyuo hati tahanya ahiteli ne sing fad cebu idayari ne ho Monye ho ne. 25 Idwong anya ojo ongida natianya imudutahino no fa igierehini nichihit hosing: 'Oswe sing niho ne nebe ibwo nepali.' 26 Nalotu lahetatangani, laba asulu ne nihote tinyi ho Monye ho ne, ngete na, Nolohailong hovtarihe, na olotu niho Lamonye, iramahi ba ngete nihote. 27 Ite ce bu iramahisi ba te tananyuo ibwonitete ho ne many tolochifot.