¹ Hesiarahisi natajio hote itegiame. Iruhoto niho Najyok; iruhoto cebu niho ne. ² Nihaji ho Monye ho ne obwoni nalohoi ho masik huja omanyariti; hara obu fa ora tohojia, hahiramahi dwo ne ite, nalo ne ehuhumahi namaji nihote. ³ Na lo ne hehuhumahi namaji nihote, alotu hadi ne hari ahifwotu ite nikwan ho ne ongida namaji na abwonitere ne cebu ibwanatate. ⁴ Ijianatate nehoi homaji na alojiere ne.'' ⁵ Tomas ho najiman niho Yesu, ''Lohobu, obu ijie ohijien namaji na ilojiere iji; tatali ijie hahijien nehoi?'' ⁶ Yesu ho najiman niho ngete, ''Ne ale nehoi, natarihe, cebu nahisu; obe lobo otum olo niho Lamonye mayak hara niho ne. ⁷ Hara dwo ejianatate ne, hejianata dwo te Monye ho ne cebu; noho tahanya toho nihatemeni ejianatate ngete ce bu itialata ngete.'' ⁸ Filipo ho najiman niho Yesu, ''Lohobu, itelehi ijie Lamonye, atum niho jie.'' ⁹ Yesu ho najiman niho ngete, ''Ohibwonita mo ne hote, hobe te ijianata ne, Filipo? Ngete la ahitel ne atel Lamonye; tatali ite hejimata ojo, 'Itelehi ijie Lamonye'? ¹⁰ Heruhoto ojo abwon ne niho Lamonye, ce bu Lamonye obwon niho ne? Natianya na atianya ne nihote atianya ne obu noho ne; nyuo hati, ngete Lamonye la omanya niho ne ligiama nihigiama hongete. ¹¹ Iruhoto ne, ojo abwon ne niho Lamonye, ce bu Lamonye niho ne, kuya iruhoto to nahigemita ho ne ¹² Tarihe, tarihe, ajo ne nihote, ngete la iruk nihone, nahigemita huja egiama ne, igem ba cebu ngete hunya higemita; igem ba ngete huja obolori tananyuo alo ne niho Lamonye. ¹³ Nasinge na ifiasetete to nafure hone, ehon ba ne ongida Lamonye itokwati niho Lonyi. ¹⁴ Nefiasetete ibwo nasinge to nafure hone, ehon ba ne. ¹⁵ Nekwamatite ne, itunata ba te nechihita hone. ¹⁶ Cebu amojo ba ne niho Lamonye, isiarahi ba ngete ite lobo lahetotosoni nihote ongida ngete ibwanata hote jik many jik, ¹⁷ Nolohailong ho tarihe. Habu nafok ifwotu ngete nafok tananyuo obu nafok otel ngete kuya ojian ngete. Ite, nyuo hati, to jianata ngete, toho ngete itwongo ngete hote cebu obwon ba nihote. ¹⁸ Obu ba ne ahidahi ite hama; ayitu ba ne nihote. ¹⁹ Niho hinihe noholongi kai, obu ba nafok ohitel hari, nyuo hati atialatate ne.Tananyuo esu ne, cebu ite isujoto. ²⁰ Nihene holong ijianatate hadi te ojo abwon ne niho Lamonye ho ne, cebu ojo ebwanatate niho ne, cebu ojo abwon nihote. ²¹ Latwani la obwonitere ho nechihita ho ne cebu otun sing, ngete la ohikwama ne; ngete la ohikwamitito ne okwama ba Monye ho ne ngete, akwama ba cebu ne ngete cebu itelehi nakwan ho ne niho ngete.'' ²² Yuda(obu Iskariot)lojo niho Yesu, ''Lohobu, nanyuo lobwon na itetelehinereji nakwan hoji nihojie, obu niho nifok?'' ²³ Yesu ho nahitarang ho najiman niho ngete, ''Nahikwama ne lobo latwani, inef ba ngete nahiram ho ne.Okwama ba Monye ho ne ngete, cebu ohifwonu be jie niho ngete cebu ohihuhumahi namaji holomanyari nihongete. ²⁴ Latwani la obu okwama ne obu inefito netenyita ho ne. Natianya na itiyirusu te obu nohone nyuo hati noho Monye ho ne lofa ohisulu ne. ²⁵ Ateny fa ne hunya hiramita nihote, ne hamanya nihiji hote. ²⁶ Nyuo hati, lahataniteni, Nolohailong No- Onyila, na ba osulu Lamonye to nafure ho ne, ohitejien ba ite nareji fad cebu iyeno nihote nahihuyanita hovreji fad huno ateny ne nihote. ²⁷ Esiarahi ne nihote nayomo; esiarahi ne nayomo ho ne nihote. Abu ne esiarahi toho isiarahitari nafok . Hesiarahisi natajio hote oniame, cebu hebayangata. ²⁸ Etiyiriratate tatali ne ajone nihote, 'Alo ne, ' ayitu ba ne nihote.' Nekwamatite ne, hebwanatate dwo ahula ikwamati bebe tananyuo alo ne niho Lamonye, obolo Lamonye ohilany ne. ²⁹ Tahanya ahiramahi fa ne ite many berien hobe oleyo ongida, naleyo ngete, ongidate iruhoto. ³⁰ Abu ba ne atianya nihote bebe,lahito ho hobu hanya fok olotiniso.Obu ngete obwonitere ho nagolon niho ne, ³¹ nyuo hati ongida nafok ojien ojo akwama ne Lamonye cebu egiama nareji huja iramahi ne Lamonye, toho ohisiarahinere ne ngete nechihita.Todetete,edahisi anya maji.