¹ Tahanya hobe Noholong ho lonyesere hebune na obengi namula, tananyuo ajien fa Yesu ojo alotiniso noholong hongete ojo ongida ngete alo niho anya fok niho Monye, to ho okwamari ngete to nakwan hongete niho ehule obwoni fa nifok, okwama fa ngete sing many nilohichungi. ² Tahanya ehwanahi fa nolohailong na ibot nihotwa hotaji ho YudasIskariot, iha Simone, ojo ongida itenyiangaya Yesu. ³ Ojien fa Yesu nareji fad huja isiarahi Monye hongete nehes hongete cebu ngete olotu niho Najyok cebu oyiteriso ngete niho Najyok. ⁴ Odetino ngete tongirang ho nafiatahiso nabongo ho ngete. Ho nahiduhuniso nahifufusi ho natwarahiso ningagu hongete. ⁵ Ho nahijuhohiso nahari hohujori ho nahichak ilalasu nihejiaha ho lohejehi hongete cebu ifufus to nahifufusi nofa otwarahi ngete ningagu hongete. ⁶ Ngete ho nalotiniso niho Simone Petur, Petur ho najiman niho ngete, "Lohobu, ilo ji ilalasu nehejiaha ho ne?" ⁷ Yesu ho na hitarangihiso ho najiman, "Nasinge na ehwana ne obu te ijianata tahanya, nyuo hati ijianata ba te ngete tehalu." ⁸ Petur ho najiman niho ngete, Obu be ji ilala nehejiaha ho ne." Yesu ho nahitarang ngete, "Nabu ne elala iji, ibe ba ji ibwon hebwo namaji niho ne." ⁹ Simone Petur ho najiman niho ngete, "Lohobu, helalaya nehejiaha ho ne ijia, nyuo hati cebu nehes ho ne ho nohou ho ne. ¹⁰ Yesu ho najiman niho ngete, "Latwani la ahujoyo abu owak nihilalasu hebwo nasinge nyuo hati nehejiaha,anyila ngete fad; inyilajatate, nyuo hati obu ite fad." ¹¹ Ojien fa Yesu ngai hadi litenyangai ngete ; ngete naja lojitere ngete, "Obu ite inyilajata fad.'' ¹² Nofa nelala Yesu nehejiaha hosing ho na hijiafahiso nabongoji hongete ho na hitwongo hari, ho najiman niho sing, "Ijianatate nasinge na ehon ne nihote? ¹³ Ingelesete te ne ojo, 'Lahetejianani, cebu 'Lohobu,' ijimatate na opit, Ara ne. ¹⁴ Nara ne Lohobu cebu lahetejianani,lalalasu nehejiaha hote,ongida cebu te ilalasete nihejiaha ho haletok hote. ¹⁵ Esiarahi ne ite nahitetelehiso ojo ongida ite cebu igiamata toho anya ihon ne niho te. ¹⁶ Tarihe,tarihe, ajo ne nihote, obu lahigiamani ilany lahetegiamani hongete; kuya toho ngete lofa osuluni ilany ele lofa osulu ngete. ¹⁷ Nejianatate hunya reji, ohijohi ite nagiamatite sing. ¹⁸ Obu ne atianya nihote fad, ajien ne ehule anyumu ne-nyuo hati ajo ne anya ongida nabuk ba imudutahino: Ngete la onya nakwan ho ne oting natutunyoti hongete niho ne.' ¹⁹ Ahiramahi ne ite anya tahanya hobe ngete idwong ongida lomo nedwong, ongida te iruhoto ojo NE. ²⁰ Tarihe,tarihe, ajo ne nihote, ngete la ohifwotunita ne ifwotu ngete latwani la asulaya ne, cebu ngete la ifwotu ngete la ahisuluya ne,ifwotu ngete latwani la ohisulu ne.'' ²¹ Nofa nateny Yesu anya, omehino fa ngete nilohailong, ngete ho natujuniso ho na jiman, ''Tarihe,tarihe, ajo ne nihote ojo lobo tohiji hote,ohitenyangaya hadi ne.'' ²² Nolohejehi ho natiala nikwanite hosing, ingongolita nijianari ngai ba ngete otianya. ²³ Abwon fa da nilonyesere ho Yesu lobo niho lolohejehi hongete, ngete la okwama fa Yesu. ²⁴ Simone Petur ho nangurunyahino niho ale lohejek ho na jiman, ''Iramahi ijie ngai ngete otianya.'' ²⁵ Ele lohejek ho oganga nilocholo ho Yesu ho najiman niho ngete, ''Lohobu, ngai ngete?'' ²⁶ Tiye Yesu ho nahitarang, ''Ngete ba la etudutohi ne nebune cebu esarahi ngete.'' Lofa nadutu ngete nebune, ngete ho na hisiarahiso niho Yuda iha Simone Iskariot. ²⁷ Cebu nihalu hebune, lahorohojani ho na hiruhiso niho ngete. Yesu tiye ho najiman niho ngete, ''Nasinge na iwak ji ihwana tahanya, ihwanata kerem.'' ²⁸ Tahanya obe lobo la obwon nibali ojien nahiram naja oteny Yesu nihongete. ²⁹ Hilihe igigile ojo, tonanyuo to nahinefito ho Yuda nolokobol horobia, Yesu ho na jiman niho ngete, ''Inyiangu nareji huja ohiwak ijie inyasu,'' kuya ongida ngete isiarahi ibwo nasinge niho laparitak. ³⁰ Lofa namoju Yuda nebune, ngete ho naloten tiye kerem; ara fa aharie. ³¹ Lo fa nalo Yuda, Yesu ho najiman, ''Tahanya etokwati Iha Najyok, cebu Najyok itokwatahini niho ngete. ³² Itokwat ba Najyok ngete nikwan hongete, cebu ngete itokwat ngete tiye tiye. ³³ Lemusak, habwon ne hote soni kai. Itahitete ba te ne, toho cebu ajo ne niho lati ho Yahud, 'Namaji na alojiere ne, habu te ifwosu.' Tahanya ateny ne anya nihote,cebu. ³⁴ Ahisiarahiso ne ite ibwo nangejuk he chihit, na ojo ongida ite ikwamati lati abito abito; toho ahikwamari ne ite, nyuo hati ce bu ongia ite ikwamati lati abito abito. ³⁵ Tanya ajieni ba lati fad ojo ite hati lohejehi ho ne, nakwamati te nakwanite hote.'' ³⁶ Simone Petur ho najiman niho ngete, ''Lohobu, ajiji ilo?'' Yesu ho nahitarang, ''Namaji na alojiere ne habu te itumata ijifinete ne tahanya, nyuo hati ijifinete ba te tehalu.'' ³⁷ Petur ho najiman niho ngete, ''Lohobu, nanyuo hati ne abe ahiijifaru iji dobu tahanya? Esiarahi ba ne nahisu ho ne to ji.'' ³⁸ Yesu ho nahitarang, ''Hesiarahi ji nahisu hoji to ne? ''Tarihe, tarihe, ajo ne niho ji, hobe lohoro ikwohita iji lemon ne nenyiahita hutik.''