¹ Tinyia lobo lateani la odiaha onya nafure Lazarus. Ngete fa ho Betania, nahang na oisierete Maria hohinasi Maritha. ² Ngete fa Maria nahatum lodon Lohobu to nelata na owur cebu ho nahifufusu nehejiaha hongete to nafofi ho ngete, lofa odiaha hilasi ho ngete Lazaru. ³ Hinasira ho nahibatariso nahiram nimho Yesu hona jiman, '' ⁴ Lohobu, totiale, ngete lomo ikwame iji adiaha.'' No fa netiyir Yesu ngete, ngete hona jiman, ''Obu anya diaha otum icung niyeyi, nyuo hati ce nohonakwatan ho Najyok Lahito ho Najyok okwwat tongete.'' ⁵ Tinya akwama Yesu fa Martha hohinasi hongete hoce bu Lazaru. ⁶ Nofa netiyir ngete ojo odiaha Lazaru, Yesu hona hituongo niho namaji no fa obwonitere ngete. ⁷ Tiye nihalu ho anya, ngete ho na jiman nimjo nolohejiehe, ''Adati Yudeya hari.'' ⁸ Nolohejehi ho najiman niho ngete, ''Lohobu,(Rabbi)lati ho Yahud fa atemi hifad iji, hoce bu iyitoyo iji da harii?'' ⁹ Yesu ho na hitarangahiso, ''Obe enemaji obwonitere hona saji tomon hoharik niholong? Nahorihi latwani lobo odaha tonoholong, habu otum ngete otwamahino(stumble), nyuo otiala ngete tona fangan. ¹⁰ Nyuo hati , nadaha ngete tanaharie, many okolihi ba nyuo obe nafangan niho ngete.'' ¹¹ Yesu lojo hunya hiramita, hoce bu nihalu hohunya hiramita, ngete ho najiman niho sing, ''Morite hojie Lazaru agetoro, hatii alone ongida ne etedetu ngete tojio.'' ¹² Nolohejehi toda hona jiman niho, ngete, ''Lohobu, nagetoro ngete, oyiak ba.'' ¹³ Tinya Yesu ho natianya ojo, to nayeyi ho Lazarus, nayeyi,nyuo hati igigile sing ojo otianya ngete nageto howiri. ¹⁴ Yesu ho na tianya niho sing tonamiajan, ''ayee Lazaru. ¹⁵ Akwama ne, tote, ojo abe fane toda ongida ite ituma hiruhohiso. ''Afwo ni ho ngete.'' ¹⁶ Tomas, lofa ongele Didymu, lojo niho hoto ngete lohejehi, ''Afwo cebu ongida kuya ohiye ho yesu.'' ¹⁷ Nofa nalotu Yesu, ohorihi Lazarus nabwon many berien nilume noho noholongi ongon. ¹⁸ Tinya onyiha fa Betania Jerusaleme, otum (nakm185). ¹⁹ Nalohoi holati hojews hona foniso fa niho Marta ho Maria, niyihinere sing tohilasi hosing. ²⁰ Tiye Marta, nofa netiyir ngete ojo olotiniso Yesu, hanoloten horihiso ngete,nyuo hati Maria hebuha itwongo nihaji. ²¹ Marta tiye hona jiman nihoYesu, ''Lohobu, hara ohorihi iji ibwon fa inmyi, habu fa bu hilasi hone oyee. ²² Dobu tahanya, nisinge nefiasu iji niho Najyok, isiarahi ngete niho iji.'' ²³ Yesu ho najiman nihongete, ''Ibuhu ba hilasi ho ji hari.'' ²⁴ Marta ho najiman niho ngete, ajien ne ojo odetino ba ngete to niholong ho hibuhuniso.'' ²⁵ Yesu ho najiman niho ngete, ''Ne alee lahihuniso cebu nahisu; ngete la iruk niho ne, dobu oyee ngete, ²⁶ nyuo hati isu ba ngete; cebu latwani la iruk niho ne obu hadi oye.Iruhotote anya?" ²⁷ Ngete ho najiman nihongete, ''Eee, Hobu, eruk ne ojo iji Kristo, Iha Najyok, ngete la olotiniso inyi nifok.'' ²⁸ Nofa nateny ngete anya, ngete ho naloten ngeleniso hinasi hongete Maria hama'a. Ngete ho na jiman, ''Lahetejianani ale inyi ho ohingeleso iji.'' ²⁹ Nofa netiyir Maria anya, ngete ho na deto kerem ho naloten niho Yesu. ³⁰ Tahanya hobu Yesu olotu nihang lomuta nyuo hati hobwon fa ngete nimaji na ohorihinere Martha ngete. ³¹ Lati ho Yahud hulo fa obwoni ho Maria nihotwa ho haji ce bu hulo fa otanite ngete,lo fa nateli ngete ho nadeto kerem ho nafoten niloke, ichifaru ngete; igigile fa sing ojo olo fa ngete nilume iyo da. ³² Maria tiye, no fa nalotu ngete namaji i na obwonitere Yesu ho nateliniso ngete ho najiman nihongete, ''Hobu, hara ohorihi iji fa ibwon inyi, habu fa hilasi ho ne obiangarahi.'' ³³ Nofa natel Yesu ngete nayo, lati ho Yahud hula ofwoni hongete cebu ho nayo, ngete ho nahilongojita nilohailong; ³⁴ ngete ho na jiman, ''Aji te inuhahisi fa ngete?'' Sing ho najiman niho ngete, ''Lohobu, kwo totiala.'' ³⁵ Yesu ho nayo. ³⁶ Tiye lati ho Yahud ho najiman, ''Totialati nakwama ho ngete niho Lazaru!'' ³⁷ Nyuo hati hilihe ho sing ho najiman, ''Obe lo fa twani ale onga nohonyiehite ho lahangodoni, cebu esiarahi ale twani obu oyee?'' ³⁸ Tiye Yesu, ho nayo harii nikwan hongete, ho naloten fa nilume. Tinyi fa ara ahunom, ihwanahini namorwo nitodo honngete. ³⁹ Yesu ho najiman, ''Iduhasi namorwo niger.'' Marta, hinasi ho Lazaru, lahayeyani, ho najiman niho Yesu, ''Lohobu, niho anya holong atum nakwan omudangariso, toho niho ngete oyee fa many noholongi ongon.'' ⁴⁰ Yesu ho najiman niho ngete, ''Abe fa ne ajo niho iji ojo, neruk iji, itel beji nakwatn ho Najyok?'' ⁴¹ Tiye sing ho nahiduhariso namorwo. Yesu ho natingon nohonyehite hongete ho na jiman, ''Baba, ajo ne awaa nihitiyirari hoji ne. ⁴² Ajien fa ne ojo itiyiratito beji ne, nyuo hatii to nalohoi ho lati hula obotie inyi ho ne duo ajo ne anya,ojo ongida sing iruhi ojo iji libati ne.'' ⁴³ Nihalu fa nateny ngete anya, ngete ho nangialan tanamurut na okwat, 'Lazaru, kwo niger!'' Lahayeyani ho na lotiniso niger, la obibire nehes ho nehejiaha to nabongoji huno fa onuhahinerete ngete, cebu nohomom obubura to nabongo. Yesu ho najiman niho sing, ''Tolahata ngete, idahisi ngete olo.'' ⁴⁵ Nalohoi ho lati ho Yahud hulo fa ofwoni niho Maria ho nateliniso nareji huja iho Yesu, ho nahiruk niho ngete; ⁴⁶ nyuo hati hilihe ho nafwoten niho lati ho Farise ho na hiramahiso sing nareji huja ihon Yesu. ⁴⁷ Tiye lolohitwaha ho padiri cebu lati ho Farise ho nahifuro harabito ho najiman, ''Nanyuo ijie hahihon? ''Ehon ale twani neteleyehita huja olwaji. ⁴⁸ Nahidahi jie ngete ngete hama tohoja; lati fad iruhi ba niho ngete; ofwoni ba lati ho Roma hiyaru namaji hojie ho nahang hojie.'' ⁴⁹ Nyuo hati, lobo latwani to hiji hosing, Kaiapa, lofa ora alohitwahaji ho padiri fad nihene nga, ho najiman, Obu te ijianata ibwo nasinge tur. ⁵⁰ Obu te ihwanahisi ojo ongida niho latwani abito oye to lati ilany nahang fad namudangi.'' ⁵¹ Tahanya ngete ho najiman obu noho ngete; ati, nirahitere alohitwahaji ho padiri nihene nga, ngete ho nahiramahiso ojo ongida Yesu oyee to nahang, ⁵² cebu obu to nahang ijia, nyuo hati ongida Yesu hetutubahi lemusak ho Najyok nimaji abito huo isarahini nimasik hinihe. ⁵³ Tiye sing ho nahihuhumahino ojo tatali ohihwanahi Yesu niyeyi. ⁵⁴ Abu Yesu odaha atulang nihiji ho Lati ho Yahud, nyuo hati ngete ho naloten toda to ho nihang na obolo na onyiha niloleng niho nahang na onyila na ongele Efram. Toda ngete ho nahitwongo ho nolohejehi. ⁵⁵ Tahanya anyihi fa nakwamahino ho lati ho Yahud, lati hula olwaji afwe fa to Yerusalem tohang na obolo hobe nanyahino nihitinyilajari nakwanite hosing. ⁵⁶ Otahite fa sing Yesu, otianye nikwanite hosing obotie nitempol, ''Nanyuo te igigilete? Ojo ngete obu olotiniso nilonyesere ?'' ⁵⁷ Tahanya ohorihini lolohitwaha ho padiri ho lati ho Farise nesieri natianya ojo najian lobo namaji na obwonitere Yesu, ikie ngete iramahi ongida sing inefini ngete.