¹ Tahanya dobu nolochifit ho yomo obwon hanamaji ho lomojere inyi nifok ho necihita ho mojo. ² Niho nahaji obwon nahaji nehwanahini, nahaji na obwon niger ongele ngete ojo namaji na onyila. Niho anya maji nowulerere ho hima, nateremejaji, nolohihwanahitari ho nangirang ho lwaha. ³ Cebu to horwong ho bongo noho harik na itihehini ji ho haji, obwon ibwo nahaji na ongele namaji na onyila bebe. Obwon ho nabilet na omimil noho naheru. ⁴ Obwon cebu ho natifine noho nayomo, lo fa ifahahini to nabilet. Obwon necholi ho hari na ora abilet na obwon nangirang da, neluk ho Arone na iluluro, cebu namori nahigierita ho yomo. ⁵ Nitodo ho tifina ho yomo obwoni nahafila ho kwatan noho Sherubim na ifirita nituhit ho helata, na obu jie ohitum ohiramahi natarihe ho ngete. ⁶ Nihalu lo fa nehuhumahini hunya reji, lapadiri ho nahiruhita nihaji na obwon niger ho tifine nihihuhumari nahigemita hosing. ⁷ Nyuo hati lapadiri iruyorita nihaji noho harik ngete hama noholong abito ninga, ho nehiyalahinere nohoto nihihuhumari nakwan hongete ho nepalita huja ipalari lati to nolohiriafit. ⁸ Itetelehiso Nolohailong Na-Onyila ojo nehoi ho maji na onyila hobu iramahini ho botia natifine nolochifit. ⁹ Itetelehi anya noholong ho baya. Fad neyalita ho nahihumuta huja isiarahise tahanya obu otum itinyilaj nahigigilita ho lahamojok. Orahi sing angirang ho namatat, huja ilihite to nahihumuta ho hilalasu. ¹⁰ Orahi fa hunya ichihita ho tiang hu nofa isieri many ba nehuhumahini natianya nangejuk. ¹¹ Olotu Kristo apadiri la obolo noho nareji hunya ongidari huja afwoni, hara niho nahaji na obolo cebu onyila na obu ihuhumuni to nehes ho lati, na obu ora nahanya fok. ¹² Obu ora to nohoto ho hide kuya noho hasak, nyuo hati to nohoto hongete Kristo iruhi nimaji na onyila bebe niholong ibwo to lati fad ho nahitohoriniso nahitalahino hojie na osio jik. ¹³ Nisiarahi nohoto ho hide cebu nohoto ho tamoti kuya narwasahiso nahunara ho hase niho lati hula obu onyilaji sing niho Najyok isiarahi sing onyilaji, ¹⁴ baya hati ba nohoto ho Kristo, isiarahi nakwan hongete hara Nilohailong nebe pal niho Najyok, itinyila nahigigilita hojie tegemita huja oyeyi ohigiama niho Najyok La isu? ¹⁵ Tanya tianya, ora Kristo ajayo ho yomo nangejuk.To nanyuo, olotu nayeyi nihidahinere lati hula fa obwoni niho nayomo nolochifot to hitegiama ho hipalita hosing, ongida ehule ongeleu Najyok ohorihini ningatita hosing noho nalunyohiso na osio. ¹⁶ Nimaji na idahinere lobo nawahan nihalu, osiriu nihorihinere nayeyi hele twani la ihuhumu ngete. ¹⁷ Obwon nawahan ho nagolon nimaji na obwonitere nayeyi, to nanyuo obe ngete obwon ho nagolon hesu ele twani la ihuhumu ngete ¹⁸ Dobu nolochifit ho yomo obu fa ihuhumahine nebe hoto. ¹⁹ Lo fa isiarahinere Muse nichihita niho lati, iduhu fa ngete noho ho hasak ho noho hide, ho nahari, ho nagutuj, ho nabene ho narwasahiso niho lati. ²⁰ Ngete ho najiman, "Ngete anya noto ho yomo lo fa isiarahinere Najyok nichihita nihote. ²¹ Niho anya hoi, orwasahi ngete nohoto nitifinr ho nihobwaha huja igiamariti nihigiama ho padiriji. ²² To nawahan hechihita, nareji fad itinyilaji to nohoto. Nabe nohoto oyiju obe nalahahiso hepalita. ²³ Inaha osiriu ojo ongida nareji huja okialare ho nareji ho nihide itinyilaji to nahihuhumuta ho tiyangi. Nyuo hati, nareji ho nihide to nakwanite hosing ongida itinyilaji to nahihuhumuta huja ongidari. ²⁴ Obu Kristo iruhi nimaji na onyila bebe na ihuhumi to nehes, na ora akialare ho na otir. Ati, iruhi ngete nihide, nimaji na olotu ngete nihatemeni ho Najyok to jie. ²⁵ Obu ngete olo da nihisiarahitari nakwan ho ngete dihitik, to ho ihwanari lapidiri lobolo, la iruyo nimaji na onyila to nengaji ho nohoto ibwo. ²⁶ Hara dwo otir, hasiriu dwo niho ngete nahipadata noholongi olwaji many to lochifot ho fok. Nyuo hati tahanya nolong abito ija nilohichungi hengaji lo fa itetelehinerete ngete nihwanahinere nepal to neyalahinere nakwan hongete. ²⁷ To ho ihuhumahinerete lati fad nolohichungi hosing nayeyi, nihalu ho yeyi nangoto ho hiramita, ²⁸ Kristo cebu, lo fa isieri harabito nihiyajiere niger nepalita ho lati olwaji, olotu hadi leyeji niholong ho harik, obu to nahifufusoriso hepalita, nyuo hati to nahitalahino he hule itilase ngete to nariajan.