¹ Tahanya natianya na ohitianya jie ngete anyani: obwon jie ho lapadir la obolo la itwongo niteten hehene ho lohitwengere ho Lahaboloroni nihide. ² Ora ngete ahigiamani nimaji na-onyila, nahimuhi notirahi lofa ihwanahi Lohobu, obu lahamudangani ho twani . ³ Niho lapadiri fad hula obolori onyumuni sing ojo ongida isiarahite nahiyalita ho nahihuhumuta; osiriu nibwonitere ibwo nainge nahiyalahinere. ⁴ Tahanya hara obwon fa Khristo nifok, habu ngete ora apadir tarihe, toho abwoni fa hula isiarahite nahiyalita berien toho ojo nechihit. ⁵ Igiemi sing nahigemita huja egemi ho narifiho ho reji noho nihide, otoho iriangari fa Najyok Muse lo fa nawak ngete ifaha namaji ho lomojere: "Totiala," ajo Najyok, "ongidaefak ji nareji fad toho iramahinerete iji todenge." ⁶ Nyuo hati tahanya ahorihi Kristo nahigiama na ogol tana nyu tana rahan ho ngete ajayo noho nayomo na ongida, no fa ifahahini tana ngatita huja ongidari. ⁷ Kuya nara fa eneyomo no fa oberien agesemi, habe dwo nawahan nitahitere nayomo noho harik. ⁸ Lofa nahorihi Najyok ngesemi niho lati, ngete ho najiman, " ' Totialati, afwonise noholongi ,' ojo Lohobu, 'nomo nehon ne nayomo nangejuk ho nahaji ho Isarayil cebu ho nahaji ho Yudeya. ⁹ Obu hadi okialare toho lo fa yomo ehon ne ho faifarok hosing niholong lo fa eyajere ne sing tene hene ongida sing to fok ho Ijib. Obu sing itiringe niyomo ho ne, abu cebu etiyira nihosing,' ojo Lohobu. ¹⁰ Ngete anyani nayomo na ehon ba ne ho nahaji ho Isarayil. No fa natuhohine ehwe holongi,' ojo Lohobu. 'Ehwanahi ba ne necihita ho ne nihosi hosing, cebu egierehi ba ne sing nitajio hosing. Ara ba ne Ajyok hosing, orahi ba sing alati ho ne. ¹¹ Obu ba sing itejiani lobo la omanya niger hongete cebu lobo hilasi hongete, ojo, "To jianata Lohobu," Lati fad ohijieni ba ne, niholahamutarak many niho lahabolorok ho sing. ¹² Telehi ba ne namehino niho nahigemita hosing huja obu ongidari, cebu abu ba ne ehuyawu nepalita hosing.' " ¹³ Nijimitere "nangejuk," ehuhumu ngete nayomo neragangi. Lo fa iramahi ngete ojo ongida iragang ongida olitaya.