¹ Ngete fa ale Melchisedek, lohobu ho Salem, lapadir ho Najyok lo Obolo, ngete fa liriamahine ho Abramo nebielino to longotere ho lohobuk cebu ho mitahiso nahamilak nihongete. ² Abramo hanahisiarahiso ngete nohosi ho nareji huja inefu ngete. Nafure "Melchisedek" ojo nafutiri hongete lohobu ho lahangidarak," cebu lohobu ho salem," ngete naja, "lohobu ho hoyomo." ³ Obwon fa ngete obee monye, obee hotenge, obeng ho nolohichahi ho holong kuya nolohichungi ho hisu. Ati, owasi ngete rahan apadir jik ho jik, toho Iha Najyok. ⁴ Tahanya to jiana nabolori haletwani. Isiarahi fafai hojie Abramo nohosi ho nareji huja ongidari hu nofa iyaru ngete nimaji hongalasu. ⁵ Tarihe, lemusak ho nikat ho Lefi hula ohorihini nahaji hopadir obwoni ho nagolon techihita nihiduduhari nelwahita niho lati, niho lamorit hosing Isarayil,dobu sing, cebu, orahi lemusak Abramo. ⁶ Nyuo hati Melchisedek, lo fa obu ora ihito ho nikat ho Lefi, ahorihi ngete nilwahita niho Abramo, ho namitahiso nahamilak niho ngete, ngete la obwon ho na ngatan. ⁷ Obe narisia ojo, otum latwani la obolo omitahi nahamilak litwani la omuta. ⁸ Tanya tianya latwani la ohorihi nelwahita oye hadi ibwo noholong, nyuo hati tebwo natianya, latwani la ohorihi nelwaha niho Abramo itarahi ngete lahesujoni. ⁹ Nihoi hotianyari, Lefi, la ohrihi nelwahita, cebu oduma nelwahita hara niho Abramo, ¹⁰ tonanyuo, obwon fa Lefi hama nimaji ho koko ho ngete Abramo lo fa iriamahinerete Melchisedek ho Abramo. ¹¹ Tahanya kuya hatum nahitingidara obwon hara nihaji ho Lefi nirahitere apadiri ( niho ngete ohorihini lati nechihit), nasinge lobwon na owahi niho lobo lapadir nilotiniso nihalu neramahi Melchisedek, cebu obu itanyahini nihalu ho hiramahiso ho Arone? ¹² Nomo nedahari nahilopadir, ongida cebu iduhari necihit. ¹³ Niho latwani la otianye hunya reji orahi noho ibwo nemanit, lahobe lobo latwani igiamari niho nolobotiari nilomojere. ¹⁴ Tahanya ara ahitetelehiso ojo adetino Lohobu hojie to Yudeya, nemanit lofa obu Muse iramahi to lapadir. ¹⁵ Nasinge na ohitianya jie nyilaji nyuo hati nalotu lobo lapadir nikialare ho Melchisedek. ¹⁶ Lapadir langejuk obu ora apadir la olotu rahan apadiri to necihit to nimanyita ho lati, nyuo hati to nagolon ho hisu na obu ipalaru. ¹⁷ Iramahi nabuk to ngete "Iraji apadir la osio jik lo fa neramahi Melchisedek." ¹⁸ Eduhuhari nolongore hechihit niger tonanyuo obu ngete ongida. ¹⁹ Obu necihit ihon ibwo nasinge. Nyuo hati, obwon natarihe niho namoi hara nifwoniso ho jie ohinyiha niho Najyok. ²⁰ Anya hiruk obu olotu na obe nahitungo,niho hule padiri hilihe obu sing itungi. ²¹ Nyuo hati itung Najyok lo fa najo ngete to Yesu, "Itung Lohobu obu ba ibiel nohou hongete: 'Ira ji apadir loho jik."' ²² Tanya cebu alotu Yesu rahan angatan la ongida noho nayomo. ²³ Tarihe, ititihito nayeyi lapadiri nihigiamari noho jik. Ngete naja lolwajariti lapadiri, lobo nihalu ho lobo. ²⁴ Nyuo hati to nahisu ho Yesu jik, nahi lopadir ho ngete obu ibielo. ²⁵ Naha otum cebu ngete italahu lati hula ofwoni onyihaji niho Najyok hara niho ngete, tana nyuo omanyito ngete tihitik nimojere to sing. ²⁶ Lapari to ho ale ongida niho jie. obu ngete obwonitere henepal, na obe ho nangiriasu, egialari tepalita ho nabolori ilany nahide. ²⁷ Obu ngete owak, mayak lapadiri hula obolori, siarahite nahihuhumuta noholongi fad, nahabito to nepalita noho ngete, tianya to nepalita ho lati. Ihon ngete anyani harabito, lo fa nesiarahi ngete nakwan ho ngete. ²⁸ Awutunuta nechihit laliawa ho neniamita ho sing apadiri, nyuo hati natianya ho nahitungo, na olotu nihalu hecihit, ho nawutuniso Lahito, lo fa ihuhumuni la onyila jik.