¹ Ora nechihit erifi ho reji huja ofeonise angida, obu lora ehwe narehe. Habu nechihit itingidar hula ofwoni onyihaji niho Najyok to nahihumuta huja isiarahita lapadiri te nengaji. ² Kuya habe ihwe hihumuta itobwoji nahisiarahita? Ta natianya lahamojok, nihitinyilaj sing, obu sing obwoni ho nepalita. ³ Nyuo hati niho ehwe ihuhumuta obwon nahituhuyahita hepalita huja ipalarite tenengaji. ⁴ Ogol nihoto ho hide ho noho tamoti nihiduhajiere niger nepalita. ⁵ Lo fa nalotu Kristo niho anya fok, ojo ngete, "Obu ji iwak nahihumuta kuya neyalita. Ati, ihuhumahisi nakwanite hote niho ne. ⁶ Obu ji ibwon ho nakwama niho neyalita huja idwose kuya nihihumuta hepalita. ⁷ Ajo ne, "Totiale,ne ale legiama nawahan hoji, Najyok, to ho igierehinerete to ne nebuk." ⁸ Ojo ngete to iramahinerete: "Obu ji iwak nahihumuta, neyalita, kuya neyalita huja idwose noho nepalita, kuya ikwama ji nihosing"-nahihumuta huja iyalahini to nechihit. ⁹ Tinya ojo ngete, "Totiale,ne ale legiama nawahan hoji." Ngete ho nawalariso niger nahihiama noho abito niho huhumahinere noho harik. ¹⁰ Niho nahigiama ho harik, ahisieri ijie niho Najyok to nahiruk hongete to nahiyalahiso nakwan ho Yesu Kristo to lati fad. ¹¹ Tarihe, obwojite lapadiri fad to noholong ho naharie, nihisiarahitari nahihuhumuta, huja obu iduhari nepalita niger. ¹² Nyuo hati laholong nesiarahi Kristo nahihuma abito noho nepalita noho tur, itwongo ngete niteten hehene ho Najyok, ¹³ nihitilasere many orieji lamerok hongete ho nahitarak sing alobotiere hehejiaha ho ngete. ¹⁴ To nahihumi abito itingidar ngete noho tur lati hula igiame niho Najyok. ¹⁵ Iramahi cebu Nolohailong Na-Onyila nihojie. Noho abito ojo ngete, ¹⁶ "'Ngete anya nayomo na ba ehon ne hosing nihalu hehwe holongi,' ojo Lohobu: 'Ehwanahi ba ne nechihita ho ne nitajio hosing, cebu egierehi ba ne sing nihosi hosing."' ¹⁷ Tinya ngete ho najiman, "Abu hadi ne ehuyayu nepalita hosing cebu nabiangan hosing igiamari nechihita." ¹⁸ Tahanya, namaji na obwonitere nahibalahita hepalita, ebe nahiyalahita to nepalita. ¹⁹ Inaha, hilasirak, ohibwon ijie ho nahiruk nihiruhunere nimaji na onyila bebe to nohoto ho Yesu. ²⁰ Ngete naja nehoi na onga ngete nihojie to nakwan hongete, nangejuk cebu nehoi na isu hara nibongo netihi hekat. ²¹ To ho ohibwon ijie ho lapadiri la obolo nihaji ho Najyok, ²² ehutehisi tang to natajio huja ongidari ho nahiruk, toho arwasi natajio hojie itinyilaj to higigilita huja orohoji cebu elale nakwanite hojie to naharie na onyila. ²³ Eniafate cebu angida newahita hojie nihiwahari, na obe ohitatagata, tananyuo Najyok la ongat ora ngete ahangidarani. ²⁴ Ongida ijie ohijien tatali ijie ohilwaha nakwanite hojie, nikwamari cebu niho nahigemita huja ongidari. ²⁵ Ongida ijie obu ohitobwoj nahifurotito harabito, toho ehoni hilihe. Nyuo hati, itogolete nakwanite hojie bebe bebe, toho etialatate noholong anyiha tang. ²⁶ Nahitiringa ijie ipalarita nahati nomo nahihorihi jie najianan ho tarihe, obu nahihumuta hepalita obwon. ²⁷ Nyuo hati, obwon ibwo nawahan na itabayanga noho nangoto, cebu nahima na owulo bebe naba otuk lamerok ho Najyok. ²⁸ Lobo la idaya nechihit ho Muse oye nebe mehino nihatemeni ho lati harik kuya hutik. ²⁹ Baya hatiba nahitegiama ite igigilete ojo ongida lobo ohorihi la ideng Iha Najyok, lobo la itarak nohoto ho yomo ebwo nasinge na obu onyila, nohoto lo fa isiarahinerete ngete niho Najyok-lobo latwani la amor Nolohailong ho ngidari? ³⁰ Ohijien ijie latwani la ojo, "Lahifadak orahi anoho ne;Elianu ba ne." Cebu hari, "Ongoto hadi Najyok lati hongete." ³¹ Ora abayangi nihuyarahino nihes ho Najyok la isu! ³² Nyuo hati ihuyasu noholongi hulo fa aringari, nihalu lo fa nahiramahini ite- tatali nadihan ho miajan noho nahipadata. ³³ Ohimore fa ite nihiji ho lati cebu ohitegiama, cebu ite igiamati harabito he hule ohorihini nahipadata. ³⁴ Ibwanatate ho namehino niho lati hulo fa orahi ahatwarak, cebu iruhoto te to nakwama nahinifiniso nareji, ijianata hati ojo ite to nakwanite hote ibwanatate ho nareji huja ongidari cebu osie. ³⁵ He chwarahisi nahiruk hote, na obwon ho neyalita na obolo. ³⁶ Iwahatate narejian, ongida ite ihorihisi nasinge na ongat Najyok, lomo negiamatate nawahan hongete. ³⁷ "Anyiha kai, latwani la olotiniso, olotu ba kerem obu ba iguria. ³⁸ Latwani ho ne la ongida omanya ba to nahiruk. Nayitoyo ngete nihalu, abu ba ne akwama niho ngete." ³⁹ Nyuo hati obu jie ohira to hilihe hula oyitere nihalu nihipapala. Nyuo hati, ohira ijie alati hula ohibwon ho nahiruk ho tuna nolohailongi hojie.