1 Ora nahiruk atetelehiso na obwon niho latwani nomo netelasu ngete ibwo nasinge to nagolon. Ora ngete nahiruk niho nasinge na hobu oteli. 2 Tanya onyumuni fa fafairok hojie to nahiruk hosing. 3 To nahiruk ohijien jie ojo obieni fa nafok to natianya ho Najyok, ojo ongida nasinge na oleyo obu ihuhumuni to reji huja obu oleyeji. 4 Ora fa tanahiruk Abele isiarahi nahihumuta huja ongidari niho Najyok ilany noho Kaine. Ora fa tanya itokwate ngete to narahan ahangidarani. Okwama fa Najyok ngete ta nahiyalita huja iyeno ngete. Tanyani, ohitianya Abele dobu aye ngete. 5 Ora fa to nahiruk iyare Enoka nihide obu otel nayeyi." Obu fa ohorihini ngete tananyuo, Najyok liyaru ngete. "Ojimi fa to ngete ojo itokwam ngete Najyok hobe iyare ngete nihide. 6 Nabe nahiruk ogol nihitokwamari Najyok, niho latwani la olotu niho Najyok ongida iruk ojo obwon ngete cebu olwaha Najyok hula otahite ngete. 7 Ora fa ta nahiruk Najyok ireng Nowa to nareji huja hobe oteli, to nemanyita ho Najyok ifak natigol nilwahinere nahang ho ngete. Nihihwanara anya, iramahi ongot ngete nafok ho nalotuniso rahan ahalunyoni ho ngidari na olotu hara nihiruk. 8 Ora fa tanahiruk Abramo, lo fa nangele ngete, iruk ho naloten nimaji lofa olo ngete ilunyohiso. Olo ngete niger, la obu ojien aji ngete fa olo. 9 Ora fa ta nahiruk ngete itwong nifok ho ngatan hatomononi. Itwongo ngete nititio ngete ho Isako ojo Yakobo, haletok lololunyot niho nengatit harabito. 10 Ora fa anya to natiala hongete nihatemeni ho horihinere nahang la ora lahefahani hongete Najyok. 11 Ora fa Abramo ho Sara nagolon nihimohojere dobu tohirangang to nahiruk, lo fa natarahi sing Najyok ahangidarani, la ongot nihosing lahito. 12 Inaha cebu tale twani abito lo fa onyiha niyeyi, oyisini fa no obu lemusak hongete ikenine. Ofwoni fa sing lwajan to nahanger ho hide cebu to nasingati huja obu ikenine to dial 13 Hule fad ayeyi nihiruk obe ohorihini nengatita. Nyuo hati, lo fa nateli cebu ifwotu sing nololamaje, iruhi sing ojo orahi sing ahatomonok cebu amerok nifok. 14 Lati hula otianya hunya reji ihoni sing ojo otahite sing nolomanyari ho kwanite hosing. 15 Tarihe, negigile sing to nahang na ofwonirete sing, hasiriu dwo sing oyiteri. 16 Nyuo hati ora ngete, owahi sing nahang na ongida, ngete naja, noho nihide. Inaha obu Najyok iloriti nengelesere ojo Najyok hosing, to ho ehuhumahi ngete nahang nihosing. 17 Lora fa tanahiruk Abramo lo fa natemi ngete nihisiarahinere Isako. Ee, ngete la omoju nengatita to nakwama isiarahi fa iha langete abito, 18 lo fa ojimi,"Niho Isako ongeleni ba lemusak hoji." 19 Iruk fa Abramo ojo otum Najyok itubuhu Isako to yeyi, cebu to natianya ho ngete amoju ngete Isako hari. 20 Ora fa tanahiruk Isako ojo Yakobo ho Esau to nareji huja ofwonise. 21 Ora fa tanahiruk Yakobo, lofa nayeyiso, ojok lemusak ho Yakobo fad. Omojo fa Yakobo, itieno niluk hongete. 22 Ora fa tanahiruk Yosefo, lo fa nanyiha nolohichungi ho ngete, otianya to nafwoten ho lemusak ho Isarayil to Ijip ho nahiramahiso sing ongida iyare nohoyi ho ngete hosing. 23 Ora fa to nahiruk Muse, lo fa nayisini ngete, idimahini niyafaji hutik to hotenge ho monye to natialan hosing ngete ojo ledole la onyila, obu fa sing obayangi natianya ho lohobu. 24 Ora fa ta nahiruk Muse lo fa nabolo, ho nahidayariso nangeleso ojo iha hito ho Faro. 25 Ati, onyumu ngete nahitegiama harabito ho lati ho Najyok,ilany nahiriafiniso ningidarita hepalita. 26 Iduhu ngete nahiteliangara niho jifitere Kristo ebarita huja obolori ilany ningidarita ho Ijip, ihwanahi fa ngete nohonyehite hongete niho nedumuta noho namoi 27 Ora fa tanahiruk Muse idahi Ijip. Obu ngete obayang nahilongojita ho lohobu, odik ngete to natiala niho latwani la obu oleyo. 28 Ora fa ta nahiruk ngete ijifito nolohichungi ho nyasu cebu narwasa ho hoto, ongida lehepapalani ho lolokang obu otir lolokangi ho Isarayil. 29 Ora fa nahiruk sing olangajiereta namangor to ho itwong afok na oyohojoyo. Lo fa natemi lati ho Ijip langan, adiloyo fa nahari sing. 30 Ora fa ta nahiruk nadafiti ho Yeriko obunyori nifok, lo fa netihi sing noholongi metaharik. 31 Ora fa ta nahiruk Rahab nahasomoni obu oye ho huja fa obu obayangi, to nanyuo ahorihi ngete nakoboji ho lwahino. 32 Cebu nanyuo ba ne atenyu? Ohituhuya ba ne noholong nomo niramahi ne Jidion, Barak, Samson, Yepa ,Davide, Samuele ho loho laheramahitak ho hiramita ho Najyok, 33 hula ta nahiruk italini nahangite, igiama to nangidari, cebu ohorihini nengatita. 34 Itobwoji sing nahutuhe ho loyimeho, itudunyi nawulori ho hima, iluyi to hiram ho nyaliru, itingidari fa sing tediahita ho sing, ofwoni rahan ahagolok to ningalasu, isieri nasegere hula ofwoni teger inami. 35 Ohorihini nangorwo lahayeyak hosing to nahimuhuniso. Olumi fa hinihe, obu iruhi nalahahiso hosing ongida sing ohorihini nangidari ho hibuhuniso. 36 Inihi ipadate nakenitere, ho nabeho, ee, dobu nanyororoji ho natwara. 37 Ifadi fa sing. Ingunguti fa sing harik. Ifadari fa sing ta nanyaliru. Ofwo sing to nakieno he horiangi ho noho hide, itaare, ho nahitutuj, ho nahihon sing na orohojaya 38 (many obu nafok ongida), ibubunyuta nitimere, nidengeto, ninomi, cebu nihayi ho layaji nifok. 39 Dobu hanyumuni fa hule ti to Najyok to nahiruk hosing, obu sing ohorihini nasinge na ongat ngete. 40 Isiarahi Najyok berien ibwo nasinge na ongida niho jie, ongida nahibe ijie obu ba sing ongidari