¹ Inaha, to ho ahitihi ijie lati lahapiahak hula olwaji, ipirese nareji fad huja oniare ite ijie nifok ho nepalita na ilulur ijie.Inamata nengwala na ihwanahini nihatemeni hojie. ² Ihwanahisi nohonyehite hojie niho Yesu, lahegiereni cebu lahetipitani ho hiruk hojie, la to nakwama lo fa oterehini nihatemeni ho ngete odik nihite na ikwala, ilanyuo nariri hongete ho nahitwongo neteten hehene ho lohitwengere ho Najyok. ³ Iruhoto ngete la odihu namoro ho lahepalak ongida te obu isawudoto kuya itemiajati natajio. ⁴ Hobu te idayasi kuya ijoriati to nepal many nihisiahitari nahijuhuniso nohoto. ⁵ Elulweretete netogolita na iramahi ite emusak: "Iha ne, itabasaya nahisinga ho Lohobu, kuya ilongojita nomo nahireng ngete iji." ⁶ Isinga Lohobu latwani la okwama ngete, cebu obeho lahito la omoju ngete. ⁷ To dihusu netemita ahisingita. Isinga Najyok ite to ho niho lonyirok, ali hito lobwon la obu monye ising? ⁸ Nyuo hati nebwon ji la obu isinge, na ohihor ijie fad, itelehi ojo irahatate emusak ho lipila obu lemusak hongete. ⁹ Hari, ohibwonitere jie monyie hojie iji nifok ongida ohisinge ijie, cebu ijie ohibayang sing. Habu jie ohitum ohibayang Lamonye ho lohailongi ho nahisu? ¹⁰ Ohisinge ijie monyie hojie tarihe to nengaji kai toho ongidarari nihosing, nyuo hati ohisinga ijie Najyok to nangidari hojie ongida ijie ohihor ninyilaji hongete. ¹¹ Obu nahisinge ongida tahanya nyuo hati ome. Nihalu, olotu iyeno nangidari hemanyita ho pitan niho hula itejieni to ngete. ¹² Inaha todingoto nehes hote huja jijore nifok cebu itogoloto nahungita hote huja oniama hari; ¹³ itipitahisi nehoiha hehejiaha hote, ongida latwani la ongura obu olo niger nyuo hati odwanyi. ¹⁴ Ijifitete nayomo ho latu fad, cebu nanyilaji na nabe, obe lobo otum otel Lohobu. ¹⁵ To jianata angida, ongida lobo obu otong to mehino ho Najyok, ongida namori ho hilangojita obu obuji nihisiarahiso nahitegemita cebu ipalaya hula olwaji. ¹⁶ To jianata ojo ikie nasomon obe kuya latwani la obu iruk niho Najyok to ho Esau, la itenyangaya natirahiso hongete to nangirang. ¹⁷ Ijianatate ojo nihalu, lo fa nawak ngete ilunyohiso nareji, edayari fa niho ngete, tanabiangan ho ngete ihorihinere nehoi ho hiwaha niho monye hongete, dobu fa ilelia bebe ngete to nahiyok. ¹⁸ Obu te ifwosu niho nadenge na otum otiri, nadenge na owulo nahima, nedimele, narok, cebu nolobwangi. ¹⁹ Obu te ifwosu nilohutari ho ngobwoji, kuya niho netenyita ho murut na isiarahi ehule itiyire ngete ilelia ojo obe ibwo natianya na otum otenyini nihosing. ²⁰ Habu sing otum odihini nanyuo iramahini niho sing: "Dobu hatir natiang nadenge, ongida ifadi ngete." ²¹ Obwon fa nabayangi niho anya maji lo fa ojo Muse, "Abayang ne bebe many ehihira ne." ²² Ati, efwosu te nidenge ho Sayon cebu nihang nesu noho Najyok, Yerusalem noho nihde, niho anjiloji nalif tomon nilokwamari. ²³ Efwosu te nilotubari ho lolokangi hula egierehini nihide, niho Najyok la ha ngotoni fad, cebu niho nolohailongi ho lahapitak hulo fa etipitahini. ²⁴ Efwosu te niho Yesu, lajayo ho yomo nangejuk, cebu nihoto na iruruhuni na otianya ilany nohoto ho Abele. ²⁵ To tialata ojo obu idayasi la otianya. Nabu sing iluyi nomo nedayari sing la irianga sing nifok, obu ba jie ohifuru nomo nahibielo jie nihalu ho la ohirianga ijie to hide. ²⁶ Nihene holong itihihir namurut hongete nafok. Nyuo hati tahanya angat ngete ho najiman, "Nyuo hati hari abu ba ne iteteneng nafok hama, cebu nahide." ²⁷ Hunya tenyita," Nyuo hati hari, "itetelehi nahiduhariso hehwe reji huja itininingi, ngete naja,nareji huja obieni, ojo ongida ehwe reji huja obu itiningi otongi. ²⁸ Inaha, nohorihiso nahang na obu itiningi, akwamati tanya tomojete Najyok to nangidari, ²⁹ ora Najyok hojie ahima na onyasu.